రాయలసీమ న్యూస్, కర్నూలు: ఎమ్మిగనూరు మున్సిపల్ ఎన్నికల ప్రచారంలో కూటమి వేగంగా ముందుకు సాగుతోంది. మున్సిపల్ చైర్‌పర్సన్ అభ్యర్థి శ్రీమతి మాచాని సునీతతో కలిసి ఎమ్మిగనూరు ఎమ్మెల్యే డాక్టర్ బీ.వీ. జయ నాగేశ్వర్ రెడ్డి ఐదు వార్డుల్లో విస్తృతంగా పర్యటిస్తూ ప్రచారం నిర్వహించారు.
ఈ క్రమంలో 30వ వార్డు తిలక్ నగర్‌లో శ్రీమతి విజయలక్ష్మి, 27వ వార్డు ఎం.ఎస్. నగర్‌లో శ్రీమతి పూజారి రాజేశ్వరి, 28వ వార్డు ఎం.ఎస్. నగర్‌లో శ్రీ పులిపాటి నాగరాజు (పట్టా), 33వ వార్డు మాలకొండయ్య హాస్పిటల్ పరిసరాల్లో శ్రీ కైరుప్పల బండారు వీరన్న, 34వ వార్డు సంజీవయ్య నగర్–లక్ష్మీపేటలో శ్రీ వాల్మీకి రామకృష్ణ నాయుడు అభ్యర్థిత్వాలకు మద్దతుగా ఇంటింటి ప్రచారం చేపట్టారు.
ప్రచార కార్యక్రమాల అనంతరం సోమప్ప నగర్‌లో నూతనంగా ఏర్పాటు చేసిన తెలుగు దేశం పార్టీ కార్యాలయాన్ని ఎమ్మెల్యే డాక్టర్ బీ.వీ. జయ నాగేశ్వర్ రెడ్డి, వార్డు నాయకులు సంయుక్తంగా ప్రారంభించారు. స్థానిక నాయకులు, కార్యకర్తలు, కూటమి అనుచరులు పెద్ద సంఖ్యలో ఈ కార్యక్రమానికి హాజరయ్యారు.
ప్రచార సభల్లో మాట్లాడుతూ ఎమ్మెల్యే డాక్టర్ బీ.వీ. జయ నాగేశ్వర్ రెడ్డి గత YSR కాంగ్రెస్ పార్టీ ప్రభుత్వ పనితీరును విమర్శించారు. ఆ ప్రభుత్వ కాలంలో ప్రజలపై పన్నుల భారం పెంచిన విధానాలను ఆయన ప్రస్తావించారు. మరోవైపు ప్రస్తుత కూటమి ప్రభుత్వం అమలు చేస్తున్న సూపర్ సిక్స్ సంక్షేమ పథకాలు, అభివృద్ధి కార్యక్రమాల వల్ల ప్రజలకు కలుగుతున్న ప్రయోజనాలను వివరించారు.
ఎమ్మిగనూరు ప్రజలకు 24 గంటల తాగునీరు అందించేందుకు సుమారు రూ.157 కోట్ల వ్యయంతో చేపడుతున్న తాగునీటి ప్రాజెక్టు వివరాలను ఆయన వెల్లడించారు. ఈ ప్రాజెక్టు పూర్తయితే పట్టణంలో తాగునీటి సమస్యకు శాశ్వత పరిష్కారం లభిస్తుందని పేర్కొన్నారు.
అలాగే బనవాసి సమీపంలో ఏర్పాటు చేయనున్న ఇంటిగ్రేటెడ్ హ్యాండ్లూమ్ అండ్ టెక్స్టైల్ పార్క్ ద్వారా చేనేత రంగానికి ప్రోత్సాహం లభించడమే కాకుండా మహిళలు, యువతకు పెద్దఎత్తున ఉపాధి అవకాశాలు సృష్టించబడతాయని తెలిపారు. ఈ ప్రాజెక్టు అమలులోకి వస్తే స్థానిక ఆర్థిక వ్యవస్థకు ఊతం లభిస్తుందని ఆయన అభిప్రాయపడ్డారు.
ఎమ్మిగనూరు అభివృద్ధి, ప్రజల సంక్షేమం కొనసాగాలంటే మున్సిపాలిటీలో కూటమి అభ్యర్థులను గెలిపించాలి. మీ అమూల్యమైన రెండు ఓట్లను సైకిల్ గుర్తుపై వేసి, వార్డు కౌన్సిలర్ అభ్యర్థితో పాటు మున్సిపల్ చైర్‌పర్సన్ అభ్యర్థిని కూడా గెలిపించండి
అని ఎమ్మెల్యే డాక్టర్ బీ.వీ. జయ నాగేశ్వర్ రెడ్డి ప్రజలను కోరారు. కూటమి అభ్యర్థుల విజయం ద్వారా ఎమ్మిగనూరులో అభివృద్ధి, సంక్షేమ కార్యక్రమాలు మరింత వేగం పడతాయని ఆయన నమ్మకం వ్యక్తం చేశారు.
