రాయలసీమ న్యూస్, నేషనల్ డెస్క్:
ప్రధాని మోదీ విదేశీ పర్యటన
జీ7 శిఖరాగ్ర సమావేశానికి హాజరు
భారత ప్రధానమంత్రి నరేంద్ర మోదీ ఫ్రాన్స్, స్లోవేకియాలకు వారం రోజుల విదేశీ పర్యటనకు శనివారం బయలుదేరారు. ఈ పర్యటనలో ఆయన జీ7 శిఖరాగ్ర సమావేశంలో పాల్గొనడంతో పాటు పలు దేశాల అగ్ర నాయకులతో ద్వైపాక్షిక చర్చలు జరపనున్నారు. అలాగే వ్యాపార రంగ ప్రముఖులతోనూ సమావేశాలు ఏర్పాటు చేయనున్నట్టు అధికార వర్గాలు వెల్లడించాయి.
ఈ పర్యటన సందర్భంగా ఫ్రాన్స్‌ను భారత వ్యూహాత్మక దార్శనికతలో కీలక భాగస్వామిగా మోదీ అభివర్ణించారు. ఈ ఏడాది ఆరంభంలో భారత్–ఫ్రాన్స్ సంబంధాలను ప్రత్యేక ప్రపంచ వ్యూహాత్మక భాగస్వామ్య స్థాయికి ఉన్నతీకరించిన తర్వాత సాధించిన పురోగతిని సమీక్షించడంపై ఫ్రాన్స్ అధ్యక్షుడు ఇమ్మానుయేల్ మెక్రాన్‌తో తన సమావేశం కేంద్రీకృతమవుతుందని ఆయన పేర్కొన్నారు. ఇరు దేశాధినేతల భేటీలో పలు ప్రధాన ప్రాంతీయ, ప్రపంచ సమస్యలపై చర్చలు జరగనున్నట్టు సమాచారం.
ఫ్రాన్స్ పర్యటన అనంతరం స్లోవేకియాకు వెళ్లనున్న మోదీ అక్కడి అధ్యక్షుడు పీటర్ పెల్లెగ్రీని, ప్రధానమంత్రి రాబర్ట్ ఫికోలతో సమావేశం కానున్నారు. 1993లో స్లోవేకియాకు స్వాతంత్ర్యం వచ్చిన తర్వాత అక్కడ పర్యటిస్తున్న తొలి భారత ప్రధానమంత్రిగా మోదీ గుర్తింపు పొందనుండటం ఈ పర్యటనకు ప్రత్యేక ప్రాధాన్యతను తీసుకువచ్చింది. పెరుగుతున్న ద్వైపాక్షిక సంబంధాల నేపథ్యంలో ఈ పర్యటనను చరిత్రాత్మక మైలురాయిగా ఆయన అభివర్ణించినట్టు అధికార వర్గాలు తెలిపాయి.
ఎవియాన్‌లో జరగనున్న జీ7 శిఖరాగ్ర సమావేశంలో భారత్ పాల్గొనడంపై మోదీ ప్రత్యేకంగా ప్రస్తావించారు. వరుసగా ఎనిమిదో సారి జీ7 వేదికకు ఆహ్వానం అందుకోవడం భారత్‌పై అంతర్జాతీయ భాగస్వాములు ఉంచిన విశ్వాసానికి, ప్రపంచవ్యాప్తంగా భారత్ పెరుగుతున్న ప్రభావానికి ప్రతిబింబమని ఆయన అభిప్రాయపడ్డారు.
జీ7లో భారత్ తన వాదనను మాత్రమే వినిపించదు. గ్లోబల్ సౌత్ ఆకాంక్షలపైనా గళం విప్పుతుంది
అని మోదీ పేర్కొన్నారు.
ప్రధాని కార్యాలయం విడుదల చేసిన వివరాల ప్రకారం జూన్ 14, 15 తేదీల్లో స్లోవేకియాలో మోదీ అధికారిక కార్యక్రమాల్లో పాల్గొంటారు. అక్కడి అధ్యక్షుడు పీటర్ పెల్లెగ్రీని, ప్రధానమంత్రి రాబర్ట్ ఫికోలతో చర్చలు జరపడంతో పాటు వ్యాపార రంగ ప్రతినిధులతో సమావేశం కానున్నారు.
జూన్ 16, 17 తేదీల్లో ఫ్రాన్స్‌లోని ఎవియాన్‌లో జరిగే జీ7 శిఖరాగ్ర సమావేశంలో పాల్గొని, కీలక ప్రపంచ, ప్రాంతీయ అంశాలపై అంతర్జాతీయ నాయకులతో చర్చలు జరపనున్నారు. గ్లోబల్ సౌత్‌కు సంబంధించిన అంశాలపై కూడా భారత్ తన అభిప్రాయాలను స్పష్టంగా తెలియజేయనున్నట్టు సూచనలు లభిస్తున్నాయి.
జూన్ 18న పారిస్‌లో జరిగే VivaTech 2026 కార్యక్రమానికి ఫ్రాన్స్ అధ్యక్షుడు మెక్రాన్‌తో కలిసి మోదీ హాజరుకానున్నారు. ఫ్రాన్స్‌లోని భారతీయులతో కూడా ఆయన ఈ సందర్భంగా సంభాషించనున్నారు. నైస్‌లో ‘Bharat Innovates’ కార్యక్రమంతో ఈ పర్యటన ప్రారంభమవుతుందని మోదీ ముందుగా వెల్లడించారు. భారత్–ఫ్రాన్స్ ఆవిష్కరణల సంవత్సరంలో భాగంగా జరుగుతున్న ఈ కార్యక్రమం ద్వారా ఆవిష్కర్తలు, స్టార్టప్‌లు, కీలక భాగస్వాములను ఒక వేదికపైకి తీసుకురావడమే లక్ష్యంగా పెట్టుకున్నారు.
ఎన్‌డీఏ ప్రభుత్వం యువత నేతృత్వంలోని అభివృద్ధికి బలంగా కృషి చేస్తోంది. 12 ఏళ్లలో దేశంలోని యువత ఆత్మవిశ్వాసంతో తమ ఆకాంక్షలను సాధించడం విశేషం
అని మోదీ పేర్కొన్నారు.
