రాయలసీమ న్యూస్, వై.యస్.ఆర్: కడప జిల్లా బ్రహ్మంగారిమఠం పూర్వ మఠాధిపతి, మేనేజర్పై ప్రస్తుతం మఠానికి ఫిట్ పర్సన్ అధికారిగా వ్యవహరిస్తున్న శంకర బాలాజీ అధికారికంగా ఫిర్యాదు చేశారు. ఈ మేరకు ఆయన కర్నూలు డిప్యూటీ కమిషనర్కు లిఖిత పూర్వకంగా వివరాలు అందజేశారు.
శంకర బాలాజీ ఫిర్యాదులో పూర్వ మఠాధిపతి, మేనేజర్ హయంలో మఠం ఉద్యోగులకు చెల్లించిన జీతాలపై తీవ్ర అభ్యంతరం వ్యక్తం చేసినట్లు సమాచారం. అప్పటి వరకు ఉద్యోగులకు నెలకు కేవలం రూ.2 వేల నుంచి రూ.3 వేల మధ్య మాత్రమే వేతనం ఇచ్చినట్లు ఆయన ఆరోపించారు. తాను బాధ్యతలు స్వీకరించిన తర్వాత అదే ఉద్యోగులకు రూ.20 వేల వరకు జీతం చెల్లిస్తున్నట్లు ఫిర్యాదులో పేర్కొన్నారు.
మఠం ఉద్యోగుల గత జీతాల చెల్లింపులపై సమగ్ర విచారణ జరిపించాలని శంకర బాలాజీ డిప్యూటీ కమిషనర్ను కోరారు. పూర్వ మఠాధిపతి, మేనేజర్ తీసుకున్న నిర్ణయాల వల్ల ఉద్యోగులు నష్టపోయారా లేదా అన్న అంశంపై స్పష్టత రావాల్సిన అవసరం ఉందని ఆయన అభిప్రాయపడ్డారు.
ఈ ఫిర్యాదును పరిశీలించేందుకు కర్నూలు డిప్యూటీ కమిషనర్ స్వయంగా బ్రహ్మంగారిమఠాన్ని సందర్శించారు. విచారణ నిమిత్తం శుక్రవారం మఠానికి వచ్చిన డీసీకి శంకర బాలాజీ ప్రత్యక్షంగా ఫిర్యాదు పత్రాన్ని అందజేశారు. మఠం పరిపాలన, ఆర్థిక వ్యవహారాలకు సంబంధించిన పత్రాలను కూడా ఆయన డీసీకి సమర్పించినట్లు తెలిసింది.
డిప్యూటీ కమిషనర్ స్థాయిలో ఫిర్యాదు నమోదు కావడంతో బ్రహ్మంగారిమఠం వ్యవహారాలు మరోసారి చర్చనీయాంశంగా మారాయి. పూర్వ మఠాధిపతి, మేనేజర్పై వచ్చిన ఆరోపణలపై అధికారుల విచారణ ఏ దిశగా సాగుతుందో, తదుపరి చర్యలు ఏమిటో అన్న దానిపై మఠం ఉద్యోగులు, భక్తులు ఆసక్తిగా ఎదురుచూస్తున్నారు.
