రాయలసీమ న్యూస్, వై.యస్.ఆర్: కడప జిల్లాలోని చారిత్రాత్మక పట్టణం పోరుమామిళ్లలో శ్రీ పట్టాభి రామచంద్ర స్వామి విగ్రహ ప్రతిష్ఠా మహోత్సవం అత్యంత వైభవంగా, నేత్రపర్వంగా జరిగింది. పట్టణం మొత్తం ఆధ్యాత్మిక ఉత్సాహంతో కళకళలాడగా, స్థానిక భక్తులతో పాటు టాలీవుడ్ సినీ ప్రముఖులు హాజరుకావడంతో ప్రాంతం అంతా పండుగ వాతావరణాన్ని తలపించింది.
ఈ పవిత్ర మహోత్సవానికి టాలీవుడ్ ప్రముఖ సినీ నిర్మాత దిల్ రాజు సతీసమేతంగా, యువ కథానాయకుడు వంశీకృష్ణ ముఖ్య అతిథులుగా విచ్చేశారు. పోరుమామిళ్ల పట్టణంలోని వైఎస్సార్ సర్కిల్ వద్దకు చేరుకున్న వీరికి ఆలయ నిర్వాహకులు, స్థానికులు మంగళ వాయిద్యాలు, పూర్ణకుంభ స్వాగతంతో ఘనంగా ఆహ్వానం పలికారు. అనంతరం భారీ జనసందోహం నడుమ వారిని ఆలయ ప్రాంగణానికి తీసుకువెళ్లారు.
ఆలయానికి చేరుకున్న దిల్ రాజు దంపతులు, హీరో వంశీకృష్ణలకు వేద పండితులు శాస్త్రోక్తంగా స్వాగతం పలికారు. వేదమంత్రోచ్ఛారణలు, మంగళహారతుల మధ్య నూతనంగా ప్రతిష్ఠించిన శ్రీ పట్టాభి రామచంద్ర స్వామికి ప్రత్యేక పూజలు నిర్వహించారు. వేద పండితులు ముఖ్య అతిథులకు తీర్థప్రసాదాలు అందజేసి ఆశీర్వదించారు.
ఈ ప్రతిష్ఠా మహోత్సవం విజయవంతం కావడానికి ఆలయ వ్యవస్థాపకులు జడపోలు శ్రీరామ్, కుటుంబ సభ్యులు, నిర్వాహకులు దేరంగుల గురయ్య, జడపోలు రామచంద్రయ్య ప్రత్యేక ఏర్పాట్లు చేశారు. కార్యక్రమం సందర్భంగా ఆలయ పరిసరాలు భక్తులతో కిటకిటలాడాయి. చుట్టుపక్కల గ్రామాల నుంచి భక్తులు, ప్రజలు, అభిమానులు భారీ సంఖ్యలో తరలివచ్చి శ్రీరామచంద్ర స్వామివారి విగ్రహ ప్రతిష్ఠను తిలకించారు.
రామనామ స్మరణతో పోరుమామిళ్ల పట్టణమంతా మారుమోగింది. ఆలయ ప్రాంగణం, పరిసర ప్రాంతాలు అద్భుతమైన ఆధ్యాత్మిక వాతావరణాన్ని సృష్టించాయి. భక్తుల గానాలు, వేదమంత్రాలు, మంగళ వాయిద్యాల నినాదాలతో పట్టణం మొత్తం ఉత్సవ కాంతులతో మెరిసిపోయింది. స్థానికులు, భక్తులు ఈ మహోత్సవాన్ని చిరస్మరణీయంగా నిలిచిపోయే ఆధ్యాత్మిక వేడుకగా అభివర్ణించారు.
