రాయలసీమ న్యూస్, వై.యస్.ఆర్: వైఎస్సార్ కడప జిల్లా పరిధిలో అభివృద్ధి, సంక్షేమ కార్యక్రమాల అమలులో రాష్ట్ర ముఖ్యమంత్రి నారా చంద్రబాబు నాయుడు ఇచ్చిన సూచనలు, ఆదేశాలను కచ్చితంగా అమలు చేయాలని జిల్లా కలెక్టర్ డాక్టర్ శ్రీధర్ అధికారులను ఆదేశించారు. శుక్రవారం విజయవాడ నుంచి ముఖ్యమంత్రి నిర్వహించిన వీడియో కాన్ఫరెన్స్ అనంతరం స్థానిక కలెక్టరేట్ బోర్డు మీటింగ్ హాలులో ఆయన సమీక్షా సమావేశం నిర్వహించారు.

ఈ సమావేశంలో జాయింట్ కలెక్టర్ డాక్టర్ నిధి మీనా, వివిధ శాఖల జిల్లా అధికారులు పాల్గొన్నారు. ముఖ్యమంత్రి సమీక్షలో ప్రస్తావించిన అంశాలపై ఆయా శాఖల వారీగా తక్షణ చర్యలు చేపట్టాలని కలెక్టర్ సూచించారు. నిర్దేశించిన లక్ష్యాలకు అనుగుణంగా అభివృద్ధి కార్యక్రమాల పురోగతిని వేగవంతం చేయాలని ఆయన అధికారులకు స్పష్టం చేశారు.

కడప విజన్ యాక్షన్ యూనిట్స్, పీ4, పీజీఆర్ఎస్ తదితర అంశాలకు సంబంధించి ముఖ్యమంత్రి ఇచ్చిన మార్గదర్శకాలను ప్రాధాన్యతతో అమలు చేయాలని కలెక్టర్ ఆదేశించారు. విజన్ యాక్షన్ యూనిట్లకు నిర్దేశించిన లక్ష్యాలను సమయానికి పూర్తి చేయాలని, కార్యక్రమాల అమలులో ఎదురవుతున్న సమస్యలను గుర్తించి సత్వర పరిష్కారం చూపాలని సూచించారు.

పీ4 కార్యక్రమం ద్వారా అర్హులైన పేద కుటుంబాలు, వెనుకబడిన వర్గాలకు ప్రభుత్వ పథకాల ప్రయోజనాలు సమర్థవంతంగా చేరేలా చర్యలు తీసుకోవాలని కలెక్టర్ పేర్కొన్నారు. ప్రభుత్వ అభివృద్ధి, సంక్షేమ కార్యక్రమాల అమలులో వివిధ శాఖల మధ్య సమన్వయం మరింత బలోపేతం చేయాలని, క్షేత్రస్థాయిలో పురోగతిని నిరంతరం పర్యవేక్షించాలని ఆయన సూచించారు.

నిర్దేశించిన లక్ష్యాలను నిర్ణయించిన కాలపరిమితిలో పూర్తి చేసి, సాధించిన పురోగతిని ఎప్పటికప్పుడు సమీక్షకు తీసుకురావాలని కలెక్టర్ అధికారులను ఆదేశించారు. ప్రజలకు మెరుగైన సేవలు అందించడమే ప్రతి శాఖ ప్రధాన లక్ష్యంగా ఉండాలని, ఈ దిశగా బాధ్యతాయుతంగా వ్యవహరించాలని ఆయన సూచించారు.

ముఖ్యమంత్రి ఆదేశాల అమలులో ఎలాంటి జాప్యం చోటుచేసుకోకూడదని కలెక్టర్ డాక్టర్ శ్రీధర్ చెరుకూరి హెచ్చరించారు. ప్రభుత్వ ప్రాధాన్యతా కార్యక్రమాల అమలులో అలసత్వం ప్రదర్శించే అధికారులపై చర్యలు తప్పవని ఆయన స్పష్టం చేసినట్లు సమాచారం.

ఈ వీడియో కాన్ఫరెన్స్, అనంతర సమీక్షా సమావేశంలో సిపిఒ హజరత్తయ్య, డ్వామా పీడీ రాజజ్యోతి, జీఎస్‌డబ్ల్యూఎస్ జిల్లా అధికారి ప్రతాప్ రెడ్డి, ఏపీఎంఐపీ జెడ్ఎం శ్రీనివాస మూర్తి, సమగ్ర శిక్ష ఏపీసీ అనురాధ, కేఎంసీ కమిషనర్ భవానీ ప్రసాద్‌లతో పాటు వివిధ శాఖల జిల్లా అధికారులు పాల్గొన్నారు.