రాయలసీమ న్యూస్, వై.యస్.ఆర్: మైదుకూరు: తెలుగు భాషా దినోత్సవం, జాతీయ క్రీడా దినోత్సవాలను పురస్కరించుకొని శనివారం మైదుకూరు జిల్లా పరిషత్ బాలుర ఉన్నత పాఠశాలలో కార్యక్రమం ఘనంగా నిర్వహించారు. పాఠశాల ప్రధానోపాధ్యాయుడు గోశెట్టి రామ్మోహన్ ఆధ్వర్యంలో ఈ కార్యక్రమం జరిగింది.
తెలుగు వ్యవహారిక భాషా పితామహుడు గిడుగు రామ్మూర్తి పంతులు 163వ జయంతి సందర్భంగా తెలుగు భాషా దినోత్సవాన్ని, ప్రఖ్యాత హాకీ క్రీడాకారుడు ధ్యాన్ చంద్ జయంతిని పురస్కరించుకొని జాతీయ క్రీడా దినోత్సవాన్ని ఈ సందర్భంగా నిర్వహించారు. కార్యక్రమంలో ఉపాధ్యాయులు, విద్యార్థులు, బోధనేతర సిబ్బంది పాల్గొన్నారు.
విద్యార్థులు తెలుగు భాషలో ప్రావీణ్యత సాధించినప్పుడే ఇతర భాషలపై కూడా పట్టు సాధించగలరని, మాతృభాషపై మక్కువ పెంచుకోవాలని గోశెట్టి రామ్మోహన్ సూచించారు. ప్రపంచ ప్రఖ్యాత హాకీ క్రీడాకారుడు ధ్యాన్ చంద్ను స్ఫూర్తిగా తీసుకొని విద్యార్థులు క్రీడలలో నైపుణ్యాన్ని పెంపొందించుకోవాలని ఆయన అభిప్రాయపడ్డారు.
దేశభాషలందు తెలుగు లెస్స అని విజయనగర చక్రవర్తి శ్రీకృష్ణదేవరాయలు కొనియాడిన తెలుగు భాష అజరామరమైనదని, తెలుగు భాషను సంరక్షించుకోవాల్సిన బాధ్యత ప్రతి ఒక్క తెలుగువారిపై ఉందని ఈ సందర్భంగా వక్తలు పేర్కొన్నారు. భాషా పరిరక్షణతో పాటు విద్య, క్రీడా రంగాలలో విద్యార్థులు సమానంగా ముందుకు సాగాలని ఉపాధ్యాయులు సూచించారు.
కార్యక్రమంలో పాఠశాల సిబ్బంది కార్యదర్శి ఆవుల శ్రీనివాసులు, తెలుగు ఉపాధ్యాయుడు రచయిత తవ్వా ఓబుల్ రెడ్డి, తెలుగు ఉపాధ్యాయురాలు స్వర్ణలక్ష్మి, పాఠశాల క్రీడా ఉపాధ్యాయిని ఫాతిమా, ఉపాధ్యాయినీ ఉపాధ్యాయులు పద్మజ, ఏ రాముడు, నీరజ, మాధవిలత, స్వర్ణలత, రమాదేవి, నారాయణమ్మ, సుబ్బమ్మ, సురేంద్రనాయక్, ఆనందరావు, పద్మనాభం, రాజేంద్రప్రసాద్, బోధనేతర సిబ్బంది ప్రసాద్, తేజ, పరిమళ, అమరావతి, మీనాక్షి తదితరులు పాల్గొన్నారు.
ఈ సందర్భంగా తెలుగు తల్లి, గిడుగు రామ్మూర్తి పంతులు, ధ్యాన్ చంద్ చిత్రపటాలకు పూలమాలలు సమర్పించారు. జాతీయ, రాష్ట్రస్థాయి క్రీడలలో ప్రతిభ కనబరిచిన విద్యార్థులకు ప్రశంసా పత్రాలను అందజేశారు. కార్యక్రమం అంతటా విద్యార్థుల్లో భాషా ప్రేమ, క్రీడాస్ఫూర్తి పెంపొందించేలా వివిధ కార్యక్రమాలు నిర్వహించినట్లు పాఠశాల వర్గాలు తెలిపాయి.
