రాయలసీమ న్యూస్, వై.యస్.ఆర్: ప్రొద్దుటూరు: ఇన్ సర్వీస్ టీచర్లకు టీచర్ ఎలిజిబిలిటీ టెస్ట్ (TET) నుంచి మినహాయింపు ఇవ్వాలని ఆంధ్రప్రదేశ్ టీచర్స్ ఫెడరేషన్ (APTF) రాష్ట్ర ఉపాధ్యక్షుడు శ్యాంసుందర్ రెడ్డి ప్రభుత్వాన్ని కోరారు. ఆదివారం ప్రొద్దుటూరులో ఆయన మీడియాతో మాట్లాడారు.
2011కు ముందు విధుల్లో చేరిన ఉపాధ్యాయులకు TET నుంచి మినహాయింపు కల్పించేలా రాష్ట్ర ప్రభుత్వం ముందడుగు వేయాలని ఆయన అభిప్రాయపడ్డారు. ఇందుకోసం అసెంబ్లీలో ప్రత్యేక తీర్మానం ఆమోదించి, కేంద్ర ప్రభుత్వానికి పంపాలని డిమాండ్ చేశారు.
ఇన్ సర్వీస్ టీచర్లు ఇప్పటికే సేవలో కొనసాగుతున్న నేపథ్యంలో, వారికి మళ్లీ TET విధించడం సముచితం కాదని శ్యాంసుందర్ రెడ్డి అభిప్రాయాన్ని వ్యక్తం చేశారు. ఉపాధ్యాయుల సమస్యలను ప్రభుత్వం సీరియస్గా పరిగణించాల్సిన అవసరం ఉందని ఆయన సూచించారు.
ఉపాధ్యాయుల వివిధ డిమాండ్ల సాధన కోసం ఆందోళన కార్యక్రమాలు చేపడుతున్నట్లు శ్యాంసుందర్ రెడ్డి తెలిపారు. తమ సమస్యలను ప్రభుత్వం దృష్టికి తీసుకెళ్లేందుకు సమన్వయంతో చర్యలు కొనసాగిస్తున్నామని చెప్పారు.
ఈ క్రమంలో సెప్టెంబర్ 2 నుంచి విద్యా భవన్ వద్ద ధర్నా నిర్వహించనున్నట్టు ఆయన వెల్లడించారు. ఉపాధ్యాయుల హక్కుల పరిరక్షణ కోసం APTF తరఫున పోరాటం కొనసాగుతుందని శ్యాంసుందర్ రెడ్డి స్పష్టం చేశారు.
