రాయలసీమ న్యూస్, స్పోర్ట్స్ డెస్క్:
మహారాజా ట్రోఫీ టీ20 వేలంలో అన్‌సోల్డ్‌గా కేఎల్‌ రాహుల్‌
కొనుగోలుదారులే లేరు
బెంగళూరు: భారత క్రికెట్ స్టార్‌ బ్యాటర్‌ కేఎల్‌ రాహుల్‌ మహారాజా ట్రోఫీ కేఎస్‌సీఏ టీ20 టోర్నమెంట్‌ తాజా వేలంలో అన్‌సోల్డ్‌గా మిగిలిపోయాడు. ఈ టోర్నీలో పాల్గొనే ఫ్రాంచైజీలెవ్వరూ అతడిని తమ జట్టులోకి తీసుకునేందుకు ముందుకు రాలేదు. రాహుల్‌ జాతీయ జట్టు తరఫున మ్యాచ్‌లు ఆడాల్సి ఉండటంతో, ఈ టోర్నీ మొత్తం కాలానికి అతడు అందుబాటులో ఉండే అవకాశాలు తక్కువగా ఉండటం దీనికి ప్రధాన కారణంగా చెబుతున్నారు.
కర్ణాటక క్రికెట్ అసోసియేషన్‌ ఆధ్వర్యంలో జరుగుతున్న మహారాజా ట్రోఫీ ఐదో ఎడిషన్‌ ఈ నెల 20న ప్రారంభమై జూలై 12న ముగియనుంది. మైసూరు, హుబ్బళ్లి, బెంగళూరు వేదికలుగా మ్యాచ్‌లు నిర్వహించనున్నారు. దేశీయ క్రికెట్‌లో పేరుపొందిన పలువురు ఆటగాళ్లు ఈ టోర్నీలో వివిధ ఫ్రాంచైజీల తరఫున బరిలోకి దిగనున్నారు.
ఈ వేలంలో భారత బ్యాటర్‌ కరుణ్‌ నాయర్‌ అత్యధిక ధరకు అమ్ముడయ్యాడు. అతడిని కోస్టల్‌ కింగ్స్ మంగళూరు జట్టు రూ.18 లక్షలకు సొంతం చేసుకుంది. తొలిసారిగా ఈ సీజన్‌లో పోటీపడుతున్న శివమొగ్గ యోదాస్‌ ఫ్రాంచైజీ, ఐపీఎల్‌లో సుంరీసెర్స్ హైదరాబాద్ తరఫున ఆడిన రవిచంద్రన్‌ సమ్రాన్‌ను రూ.15.75 లక్షలకు దక్కించుకుంది.
హుబ్లీ టైగర్స్‌ జట్టు అభినవ్‌ మనోహర్‌ను రూ.13.50 లక్షలకు కొనుగోలు చేసింది. అదే జట్టు మయాంక్‌ అగర్వాల్‌ను రూ.11.50 లక్షలకు సొంతం చేసుకుంది. పంజాబ్ కింగ్స్ కు చెందిన పేసర్‌ వైశాఖ్‌ విజయ్‌ కుమార్‌ను మైసూర్‌ వారియర్స్‌ రూ.8.25 లక్షలకు దక్కించుకుంది.
అలాగే దేవ్‌దత్‌ పడిక్కల్‌, ప్రసిద్ధ్‌ కృష్ణలను మైసూర్‌ వారియర్స్‌ చెరో రూ.2.5 లక్షలకు కొనుగోలు చేసింది. అయితే వీరికి కూడా జాతీయ జట్టు బాధ్యతలు ఉండటంతో, టోర్నీ మొత్తం కాలానికి పూర్తిస్థాయిలో అందుబాటులో ఉండే అవకాశాలు తక్కువగానే ఉన్నాయని క్రికెట్ వర్గాలు భావిస్తున్నాయి.
మనీశ్‌ పాండేను గుల్బర్గా మిస్టిక్స్‌ రూ.12.75 లక్షలకు సొంతం చేసుకోగా, మాక్‌నీల్‌ నోరోన్హాను రూ.12.25 లక్షలకు దక్కించుకుంది. యువ క్రికెటర్ల విభాగంలోనూ ఆసక్తికర వేలం నమోదైంది.
భారత మాజీ కెప్టెన్‌ రాహుల్‌ ద్రవిడ్‌ కుమారుడు అన్వే ద్రవిడ్‌ను కోస్టల్‌ కింగ్స్ మంగళూరు రూ.90 వేలకే కొనుగోలు చేసింది. అతడి సోదరుడు సమిత్‌ ద్రవిడ్‌ను కళ్యాణి బెంగళూరు బ్లాస్టర్స్‌ రూ.1.70 లక్షలకు దక్కించుకుంది. ఈ ఇద్దరు యువ బ్యాటర్లపై ఫ్రాంచైజీలకు ప్రత్యేక ఆసక్తి కనబడింది.
మొత్తం మీద, అనుభవజ్ఞులైన ఆటగాళ్లతో పాటు యువ ప్రతిభావంతులు కూడా మంచి ధరలకు అమ్ముడవగా, కేఎల్‌ రాహుల్‌ అన్‌సోల్డ్‌గా మిగిలిపోవడం క్రికెట్ అభిమానుల్లో చర్చనీయాంశంగా మారింది.
