రాయలసీమ న్యూస్, స్పోర్ట్స్ డెస్క్: ఇండియన్‌ ప్రీమియర్‌ లీగ్‌లో కీలక మార్పులు చోటుచేసుకున్నాయి. లక్నో సూపర్ జెయింట్స్ మాజీ కెప్టెన్‌ రిషభ్‌ పంత్‌ మళ్లీ ఢిల్లీ క్యాపిటల్స్ జట్టుకు చేరాడు. ఢిల్లీ , లక్నో జట్ల మధ్య జరిగిన స్వాప్‌ డీల్‌లో భాగంగా ఈ మార్పు జరిగింది.
ఈ ఒప్పందం ప్రకారం రిషభ్‌ పంత్‌ లక్నో సూపర్ జెయింట్స్ నుంచి బయటకు వచ్చి ఢిల్లీ క్యాపిటల్స్ జట్టులోకి చేరాడు. అదే సమయంలో స్పిన్నర్‌ కుల్దీప్ యాదవ్ ఢిల్లీ నుంచి లక్నో జట్టుకు మారాడు. రెండు ఫ్రాంఛైజీలు ఈ స్వాప్‌ డీల్‌ వివరాలను X వేదికగా అధికారికంగా వెల్లడించాయి.
ఇటీవలి సీజన్‌లో లక్నో సూపర్ జెయింట్స్ ప్రదర్శన నిరాశపరిచింది. మొత్తం 14 మ్యాచ్‌ల్లో కేవలం నాలుగు విజయాలతోనే పరిమితమై, పాయింట్ల పట్టికలో అట్టడుగున నిలిచింది. జట్టు వైఫల్యాల నేపథ్యంలో రిషభ్‌ పంత్‌ ఇటీవల కెప్టెన్సీ బాధ్యతల నుంచి తప్పుకున్నాడు. ఇప్పుడు జట్టునే మార్చుకోవాలని నిర్ణయించుకున్నాడు.
కొత్త ఒప్పందంలో భాగంగా పంత్‌ తన పారితోషికంలో భారీ కోతను అంగీకరించాడు. ఢిల్లీ క్యాపిటల్స్ అతనికి ఇప్పుడు రూ.15 కోట్లు చెల్లించనుంది. మరోవైపు కుల్దీప్ యాదవ్ మాత్రం తన ప్రస్తుత ఫీజు అయిన రూ.13.50 కోట్లనే లక్నో జట్టులో కొనసాగించనున్నాడు.
2025 ఐపీఎల్‌ మెగా వేలంలో రిషభ్‌ పంత్‌ను లక్నో ఫ్రాంఛైజీ రూ.27 కోట్ల భారీ మొత్తానికి దక్కించుకున్న విషయం తెలిసిందే. అప్పటి నుంచి అతడు ఆ జట్టుకు కెప్టెన్‌గా వ్యవహరించాడు. అయితే పంత్‌ నాయకత్వంలో లక్నో సూపర్ జెయింట్స్ రెండు సీజన్‌ల్లో కలిపి కేవలం 10 మ్యాచ్‌ల్లో మాత్రమే గెలవడం గమనార్హం. 2025 సీజన్‌లో ఆరు విజయాలతో ముగించినా, ప్లేఆఫ్స్‌కు చేరుకోవడంలో జట్టు విఫలమైంది.
బ్యాటింగ్‌ పరంగా కూడా రిషభ్‌ పంత్‌ ఆశించిన స్థాయిలో రాణించలేకపోయాడు. గత సీజన్‌లో అతడు 14 మ్యాచ్‌ల్లో మొత్తం 269 పరుగులు మాత్రమే సాధించాడు. ఈ ఏడాది సీజన్‌లో కూడా అతని ఖాతాలో 312 పరుగులే నమోదయ్యాయి. వరుసగా రెండు సీజన్‌ల్లోనూ అతని వ్యక్తిగత ఫార్మ్‌, జట్టు ఫలితాలు రెండూ సంతృప్తికరంగా లేకపోవడం గమనించదగ్గ అంశంగా మారింది.
ఇలాంటి పరిస్థితుల్లో పంత్‌ మళ్లీ తన పాత జట్టు ఢిల్లీ క్యాపిటల్స్ కు చేరడం క్రికెట్ వర్గాల్లో చర్చనీయాంశమైంది. ఒకప్పుడు ఈ జట్టుతో కలిసి ఐపీఎల్‌లో అగ్రస్థానానికి పోటీ ఇచ్చిన పంత్‌.. తాజా స్వాప్‌ డీల్‌ తర్వాత మళ్లీ తన కెరీర్‌ను కొత్త దిశగా మలుచుకుంటాడా అన్నదానిపై అభిమానులు, విశ్లేషకులు దృష్టి సారిస్తున్నారు.
