రాయలసీమ న్యూస్, కర్నూలు: కర్నూలు జిల్లా ఎమ్మిగనూరు లో అక్రమ రేషన్ బియ్యం రవాణా ముఠాను జనసేన నాయకులు బయటపెట్టారు. సుమారు 15 రోజులుగా గమనిస్తూ, ముందస్తు సమాచారంతో పన్నిన వ్యూహం ద్వారా అక్రమంగా బియ్యం తరలిస్తున్న బొలెరో ట్రాలీ వాహనాన్ని పట్టుకున్నారు. ఈ దాడిలో 30 క్వింటాళ్ల రేషన్ బియ్యం స్వాధీనం చేసుకున్నట్లు జనసేన నాయకులు తెలిపారు.
పట్టుబడిన బొలెరో ట్రాలీ వాహనాన్ని ఎమ్మిగనూరు పోలీస్ స్టేషన్కు తరలించి, అక్కడి పోలీసులకు అప్పగించారు. రూరల్ పోలీసులు ఈ ఘటనపై కేసు నమోదు చేసి దర్యాప్తు ప్రారంభించారు. వాహనం ఎవరికి చెందినది, బియ్యం ఎక్కడి నుండి సేకరించారు, ఎక్కడికి తరలిస్తున్నారనే అంశాలపై పోలీసులు విచారణ కొనసాగిస్తున్నారు.
ఎమ్మిగనూరు లో పేదలకు కేటాయించిన రేషన్ బియ్యం పక్కదారి పడుతోందని, దీనిపై కఠిన చర్యలు తీసుకోవాలని జనసేన నాయకుడు చల్లా వరుణ్ డిమాండ్ చేశారు. ఈ అక్రమ రవాణా వెనుక ఎవరున్నా, ఎవరి ప్రమేయం ఉన్నా, వారిని గుర్తించి శిక్షించాలని ఆయన కోరారు.
ఎమ్మిగనూరు నుండి బొలెరో ట్రాలీ వాహనాల్లో ప్రతి నెలా డీలర్ల నుండి సేకరించిన రేషన్ బియ్యాన్ని తరలించి, కోడుమూరు లో లారీ లో లోడ్ చేస్తున్నారని చల్లా వరుణ్ ఆరోపించారు. ఈ వ్యవహారం ఒక వ్యవస్థబద్ధంగా జరుగుతున్న అక్రమ రవాణా నెట్వర్క్ గా కనిపిస్తోందని ఆయన అభిప్రాయపడ్డారు.
ఈ ఘటన వివరాలను పార్టీ నాయకత్వానికి తెలియజేస్తానని చల్లా వరుణ్ పేర్కొన్నారు. ఎమ్మిగనూరు పరిధిలో రేషన్ బియ్యం పంపిణీపై సమగ్ర విచారణ జరిపి, పేదలకు చెందాల్సిన ధాన్యం అక్రమంగా మార్కెట్ కు మళ్లించే వారిపై ప్రభుత్వం, పోలీసులు కఠిన చర్యలు తీసుకోవాలని ఆయన డిమాండ్ చేశారు.
