రాయలసీమ న్యూస్, నేషనల్ డెస్క్: నీట్-యూజీ 2026 ప్రశ్నాపత్రం లీక్ వివాదంపై కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేసే వరకు తమ ఉద్యమాన్ని కొనసాగిస్తామని కాక్రోచ్ జనతా పార్టీ (CJP) మరోసారి స్పష్టం చేసింది. పార్టీ వ్యవస్థాపక అధ్యక్షుడు అభిజీత్ దిప్కే ప్రకారం, ధర్మేంద్ర ప్రధాన్ పదవికి రాజీనామా చేసే వరకు ఢిల్లీలోని జంతర్ మంతర్ వద్ద జరుగుతున్న నిరసనలను విరమించే ప్రశ్నే లేదని పార్టీ నిర్ణయించింది.
26 రోజుల పాటు నిరాహార దీక్ష కొనసాగించిన సామాజిక కార్యకర్త సోనం వాంగ్చుక్ తన దీక్షను విరమించడంపై అభిజీత్ దిప్కే సంతృప్తి వ్యక్తం చేశారు. దేశానికి సోనం వాంగ్చుక్ జీవితం ఎంతో విలువైనదని ఆయన పేర్కొన్నారు. వాంగ్చుక్ నిరాహార దీక్ష ముగిసినా, నీట్-యూజీ 2026 ప్రశ్నాపత్రం లీక్ ఘటనపై జరుగుతున్న ఉద్యమం మాత్రం ఆగదని దిప్కే స్పష్టం చేశారు.
ఈ నేపథ్యంలో శుక్రవారం మధ్యాహ్నం కేంద్ర ప్రభుత్వ ప్రతినిధులతో తటస్థ వేదికలో చర్చలు జరగనున్నట్లు అభిజీత్ దిప్కే తెలిపారు. చర్చలు సానుకూలంగా సాగినా, ధర్మేంద్ర ప్రధాన్ రాజీనామా అంశంలో ఎలాంటి రాజీ ఉండదని ఆయన స్పష్టంచేశారు.
“ధర్మేంద్ర ప్రధాన్ రాజీనామా తప్ప మరో పరిష్కారం మాకు ఆమోదయోగ్యం కాదు” అని దిప్కే స్పష్టంచేశారు.
తమ నాలుగు ప్రధాన డిమాండ్లలో రెండింటికి కేంద్ర ప్రభుత్వం ఇప్పటికే సానుకూలంగా స్పందించినట్లు అభిజీత్ దిప్కే వివరించారు. జంతర్ మంతర్లో జరిగిన నిరసనల్లో పాల్గొన్న CJP కార్యకర్తలపై ఎలాంటి కేసులు నమోదు చేయబోమని కేంద్రం హామీ ఇచ్చిందని ఆయన చెప్పారు. అలాగే, నీట్-యూజీ 2026 పేపర్ లీక్ ఘటనతో మనస్తాపానికి గురై ఆత్మహత్యకు పాల్పడిన విద్యార్థుల కుటుంబాలకు పరిహారం అందించేందుకు కూడా కేంద్రం అంగీకరించినట్లు దిప్కే పేర్కొన్నారు.
మరోవైపు, దేశవ్యాప్తంగా శాంతియుత నిరసనలు కొనసాగించాలని CJP పిలుపునిచ్చింది. విద్యార్థి సంఘాలు, ప్రజా సంఘాలు కలిసి చట్టబద్ధమైన అనుమతులతో నిరసనలు నిర్వహించాలని పార్టీ కోరింది. విద్యార్థుల డిమాండ్లను ప్రజల ముందుకు తీసుకెళ్లాలని పార్టీ నాయకత్వం సూచించింది.
అభిజీత్ దిప్కే వ్యాఖ్యలతో కేంద్రంతో జరగనున్న చర్చలపై ఆసక్తి నెలకొంది. అయితే ప్రధాన డిమాండ్గా ఉన్న ధర్మేంద్ర ప్రధాన్ రాజీనామా నెరవేరే వరకు జంతర్ మంతర్లోని తమ ఆందోళనను కొనసాగిస్తామని CJP తేల్చిచెప్పింది.
