రాయలసీమ న్యూస్, పొలిటికల్ డెస్క్:
ఎన్డీయే, నీతి ఆయోగ్ సమావేశాలకు హాజరు
అమరావతి : ఆంధ్రప్రదేశ్ ముఖ్యమంత్రి, టీడీపీ జాతీయ అధ్యక్షుడు నారా చంద్రబాబు నాయుడు ఢిల్లీ పర్యటన ఖరారైంది. జూన్ 10, 11 తేదీల్లో ఆయన ఢిల్లీలో పర్యటించనున్నారు. ఈ రెండు రోజుల పర్యటనలో ఎన్డీయే భాగస్వామ్య పక్షాల సమావేశం, నీతి ఆయోగ్ గవర్నింగ్ కౌన్సిల్ సమావేశంలో పాల్గొననున్నారు.
అధికారిక సమాచారం ప్రకారం, జూన్ 10వ తేదీ ఉదయం విజయవాడ నుంచి ముఖ్యమంత్రి చంద్రబాబు నాయుడు ఢిల్లీకి బయలుదేరి వెళ్లనున్నారు. అదే రోజు ఢిల్లీలోని భారత్ మండపంలో జరగనున్న ఎన్డీయే భాగస్వామ్య పక్షాల సమావేశంలో ఆయన హాజరవుతారు. ఈ సమావేశంలో కేంద్ర ప్రభుత్వం, ఎన్డీయే మిత్రపక్షాల మధ్య ప్రస్తుత జాతీయ రాజకీయ పరిస్థితులు, పాలనాపరమైన అంశాలపై చర్చలు జరిగే అవకాశమున్నట్లు భావిస్తున్నారు.
ఎన్డీయే సమావేశం అనంతరం ఆ రాత్రి న్యూఢిల్లీలోని ఏపీ భవన్‌లో ముఖ్యమంత్రి చంద్రబాబు బస చేయనున్నారు. రాష్ట్ర ప్రభుత్వానికి చెందిన ఈ అతిథి గృహంలోనే ఆయన అధికారులతో సమావేశాలు నిర్వహించే అవకాశం ఉన్నట్లు తెలిసింది.
తదుపరి రోజు జూన్ 11వ తేదీన నీతి ఆయోగ్ 11వ గవర్నింగ్ కౌన్సిల్ సమావేశానికి ముఖ్యమంత్రి హాజరవుతారు. భారత్ మండపంలో ఉదయం నుంచి సాయంత్రం వరకు జరిగే ఈ సమావేశంలో రాష్ట్రాల ముఖ్యమంత్రులు, కేంద్ర మంత్రులు పాల్గొననున్నారు. దేశవ్యాప్తంగా అభివృద్ధి, ఆర్థిక విధానాలు, రాష్ట్రాలకు సంబంధించిన కీలక అంశాలపై ఈ వేదికలో చర్చలు జరగనున్నాయి. నీతి ఆయోగ్ గవర్నింగ్ కౌన్సిల్ సమావేశం ముగిసిన అనంతరం అదే రోజు సాయంత్రం ఢిల్లీ నుంచి విజయవాడకు ముఖ్యమంత్రి చంద్రబాబు నాయుడు తిరుగు ప్రయాణం కానున్నారు. రాత్రికి ఆయన ఉండవల్లి నివాసానికి చేరుకోనున్నారు. ఈ పర్యటన సందర్భంగా కేంద్ర నాయకులతో కూడా ఆయన భేటీ అయ్యే అవకాశంపై రాజకీయ వర్గాల్లో చర్చ నడుస్తోంది.
ఢిల్లీ పర్యటనలో ఎన్డీయే భాగస్వామ్య పక్షాల సమావేశం, నీతి ఆయోగ్ గవర్నింగ్ కౌన్సిల్ సమావేశం ఉండటంతో, రాష్ట్ర ప్రయోజనాల అంశాలను కేంద్రం దృష్టికి తీసుకెళ్లే అవకాశం ఉందని అధికార వర్గాలు సూచిస్తున్నాయి. రెండు రోజుల పర్యటనకు సంబంధించిన పూర్తి షెడ్యూల్‌ను సీఎం కార్యాలయం సిద్ధం చేస్తోంది.
