రాయలసీమ న్యూస్, పొలిటికల్ డెస్క్:
అయోధ్య అవినీతిపై సీబీఐ విచారణ జరపాలి
: కేంద్ర మాజీ మంత్రి చింతా మోహన్
అయోధ్య అభివృద్ధి పనుల్లో అవినీతి జరిగిందని ఆరోపిస్తూ, దీనిపై సీబీఐ విచారణ జరపాలని కేంద్ర మాజీ మంత్రి, కాంగ్రెస్ సీనియర్ నేత చింతా మోహన్ డిమాండ్ చేశారు. అయోధ్య పేరుతో వేల కోట్ల రూపాయలు వసూలు చేసి అవినీతికి పాల్పడ్డారని ఆయన విమర్శించారు. ఈ సందర్భంగా ప్రధాని నరేంద్ర మోడీ, ఆంధ్రప్రదేశ్ ముఖ్యమంత్రి నారా చంద్రబాబు నాయుడిపై ఆయన తీవ్రస్థాయిలో విమర్శలు చేశారు.
ఇజ్రాయిల్ పర్యటన సందర్భంగా ప్రధాని మోడీ ఏ అంశాలపై చర్చించారో దేశానికి తెలియజేయాలని చింతా మోహన్ కోరారు. గాజాలో వేలాది మంది చిన్నారులు ప్రాణాలు కోల్పోతున్నా భారత విదేశాంగ విధానం స్పందించకపోవడం విచారకరమని ఆయన వ్యాఖ్యానించారు. మోడీ అమెరికా మాజీ అధ్యక్షుడు డొనాల్డ్ ట్రంప్ ప్రభావంలో ఉన్నారంటూ ఆయన ఆరోపణలు చేశారు.
రాష్ట్ర అభివృద్ధి అంశంపై కూడా చింతా మోహన్ ప్రశ్నలు లేవనెత్తారు. రూ.20 లక్షల కోట్ల పెట్టుబడులు తెచ్చామని ప్రభుత్వం చెబుతున్నప్పటికీ, రాష్ట్రంలోని ఏ జిల్లాలోనూ ఆ స్థాయి అభివృద్ధి కనిపించడం లేదని ఆయన పేర్కొన్నారు. కుప్పం నియోజకవర్గంలో జరిగిన అభివృద్ధిని ప్రజలకు వివరించాలని చంద్రబాబును ఆయన డిమాండ్ చేశారు. మాటలకంటే పనులతో అభివృద్ధిని నిరూపించాలని చింతా మోహన్ సూచించారు.
వైఎస్ జగన్మోహన్ రెడ్డిపై ఉన్న అక్రమాస్తుల కేసుల విచారణలో జాప్యం జరుగుతోందని చింతా మోహన్ ప్రశ్నించారు. జయలలితకు ఒక న్యాయం, జగన్కు మరో న్యాయమా అనే సందేహం ప్రజల్లో ఉత్పన్నమవుతోందని ఆయన వ్యాఖ్యానించారు. రాజకీయ ఒత్తిడులకు న్యాయవ్యవస్థ లొంగుతోందనే అనుమానం ప్రజల్లో ఉందని చింతా మోహన్ అభిప్రాయపడ్డారు.
రాష్ట్రంలో పోలీసులు అత్యుత్సాహం ప్రదర్శిస్తూ అమాయకులపై అక్రమ కేసులు నమోదు చేస్తున్నారని చింతా మోహన్ ఆరోపించారు. ఈ పరిస్థితులు ప్రజాస్వామ్య వ్యవస్థపై ప్రతికూల ప్రభావం చూపుతున్నాయని ఆయన పేర్కొన్నారు.
వచ్చే ఎన్నికల్లో ఆంధ్రప్రదేశ్కు ప్రత్యేక హోదా, విభజన హామీల అమలు, దళిత క్రైస్తవులకు దళిత హోదా కల్పన వంటి అంశాలతో కాంగ్రెస్ ప్రజల్లోకి వెళ్తుందని చింతా మోహన్ స్పష్టం చేశారు. ఈ అంశాలపై ప్రజాభిప్రాయాన్ని తమవైపు తేవడానికి కాంగ్రెస్ కృషి చేస్తుందని ఆయన తెలిపారు.
