రాయలసీమ న్యూస్, పొలిటికల్ డెస్క్:
పార్లమెంట్‌ వర్షాకాల సమావేశాల్లో ‘నేషన్‌ ఫస్ట్‌’ భావన ప్రతిఫలించాలి: జనసేన అధినేత పవన్‌ కల్యాణ్‌ దిశానిర్దేశం
అమరావతి: పార్లమెంట్‌ వర్షాకాల సమావేశాల్లో జరిగే చర్చల్లో జాతీయ దృక్పథంతో పాటు రాష్ట్ర ప్రయోజనాలను సమన్వయం చేస్తూ ‘నేషన్‌ ఫస్ట్‌’ భావన స్పష్టంగా ప్రతిబింబించేలా కృషి చేయాలని జనసేన పార్టీ అధ్యక్షులు, డిప్యూటీ సీఎం పవన్‌ కల్యాణ్‌ జనసేన ఎంపీలకు దిశానిర్దేశం చేశారు.
శనివారం సాయంత్రం హైదరాబాద్‌లో జనసేన పార్టీ ఎంపీలతో పవన్‌ కల్యాణ్‌ సమావేశం నిర్వహించారు. ఈ సమావేశంలో పార్లమెంట్‌ వర్షాకాల సమావేశాల్లో చర్చకు రానున్న బిల్లులు, వాటిపై జనసేన పార్టీ వైఖరి, అనుసరించాల్సిన వ్యూహాలపై సమగ్రంగా చర్చించారు. పార్లమెంట్‌ వేదికగా రాష్ట్రానికి ప్రయోజనం కలిగించే ప్రతి అంశంపై జనసేన తరఫున గళం వినిపించాలని ఆయన సూచించినట్లు పార్టీ వర్గాలు తెలిపాయి.
ప్రస్తుతం అమలులో ఉన్న ప్రాజెక్టులకు మరిన్ని నిధులు కేటాయించేలా కేంద్ర ప్రభుత్వాన్ని ఒప్పించే ప్రయత్నాలు చేయాల్సిన అవసరాన్ని పవన్‌ కల్యాణ్‌ ఎంపీల దృష్టికి తీసుకెళ్లారు. రాష్ట్రంలో నిర్మాణ దశలో ఉన్న రైల్వే ప్రాజెక్టుల పురోగతి, పెండింగ్‌లో ఉన్న ప్రాజెక్టులకు ఆమోదం, నిధుల కేటాయింపు, కొత్త రైల్వే లైన్ల నిర్మాణం, రైల్వే ఓవర్‌ బ్రిడ్జిల ఏర్పాటు, దక్షిణ కోస్తా రైల్వే జోన్‌ అభివృద్ధి వంటి అంశాలపై ఆయన ఎంపీలతో చర్చించారు.
ఈ వర్షాకాల సమావేశాల్లో కేంద్ర ప్రభుత్వం ప్రవేశపెట్టే అవకాశమున్న నియోజకవర్గాల పునర్విభజన, మహిళా రిజర్వేషన్ల అమలు వంటి కీలక బిల్లులపై పార్టీ అనుసరించాల్సిన వ్యూహాలను పవన్‌ కల్యాణ్‌ వివరించారు. పార్లమెంట్‌ చర్చల్లో జాతీయ ప్రయోజనాలు, రాష్ట్ర అవసరాలు రెండింటినీ సమతుల్యం చేసే విధంగా జనసేన ఎంపీలు వ్యవహరించాలని ఆయన సూచించినట్లు సమాచారం.
ఈ సమావేశంలో జనసేన లోక్‌సభ సభ్యులు వల్లభనేని బాలశౌరి, తంగెళ్ల ఉదయ్‌ శ్రీనివాస్‌, రాజ్యసభ సభ్యులు లింగమనేని రమేశ్‌ పాల్గొన్నారు.
