రాయలసీమ న్యూస్, శ్రీ సత్యసాయి: ధర్మవరం: ధర్మవరం నియోజకవర్గంలోని గ్రామీణ ప్రాంతాల్లో అభివృద్ధి వేగవంతం కావాలంటే స్థానిక సంస్థల ఎన్నికల్లో ఎన్డీఏ కూటమి అభ్యర్థులను గెలిపించాలని రాష్ట్ర వైద్య, ఆరోగ్య, కుటుంబ సంక్షేమ మరియు వైద్య విద్యాశాఖ మంత్రి, ధర్మవరం శాసనసభ్యులు సత్యకుమార్ యాదవ్ పిలుపునిచ్చారు. సోమవారం ధర్మవరం రూరల్ మండలంలోని పోతుకుంట, రావులచెరువు గ్రామాల్లో ఎన్డీఏ అభ్యర్థులతో కలిసి ఆయన విస్తృతంగా ఎన్నికల ప్రచారం నిర్వహించారు.
ధర్మవరం రూరల్ మండల జడ్పీటీసీ స్థానానికి తెలుగుదేశం పార్టీ అభ్యర్థి భీమినేని శ్వేత, పోతుకుంట ఎంపీటీసీ స్థానానికి భారతీయ జనతా పార్టీ అభ్యర్థి అంగజాల రాజు, రావులచెరువు ఎంపీటీసీ స్థానానికి తెలుగుదేశం పార్టీ అభ్యర్థి బీదల ఈరాదేవిలకు మద్దతుగా మంత్రి గ్రామాలను సందర్శించారు. అభ్యర్థులకు కేటాయించిన సైకిల్, కమలం గుర్తులపై ఓటు వేసి కూటమి అభ్యర్థులను గెలిపించాలని ప్రజలను కోరారు.
ఈ సందర్భంగా మంత్రి మాట్లాడుతూ ధర్మవరంలో గతంలో ఎన్నడూ లేని విధంగా ప్రశాంత వాతావరణంలో మున్సిపల్ ఎన్నికలు జరిగాయని, ప్రజలు స్వేచ్ఛగా తమ ఓటు హక్కును వినియోగించుకున్నారని తెలిపారు. ఎన్నికల అనంతరం వైఎస్సార్‌సీపీ రాజకీయ పరిస్థితిపై విమర్శలు చేస్తూ, ఆ పార్టీ అధినేత జగన్‌మోహన్‌రెడ్డి ఎన్నికల ఫలితాలపై ముందుగానే అంచనాకు వచ్చి పులివెందులకు వెళ్లిపోయారని వ్యాఖ్యానించారు. ప్రజల తీర్పు ఎలా ఉండబోతోందో అర్థం కావడంతోనే ఆయన వెనక్కి తగ్గారని అన్నారు.
జడ్పీటీసీ, ఎంపీటీసీ ఎన్నికల్లోనూ వైఎస్సార్‌సీపీ తప్పుడు ప్రచారాలు, అసత్య కథనాలతో ప్రజలను తప్పుదారి పట్టించేందుకు ప్రయత్నిస్తోందని మంత్రి ఆరోపించారు. గతంలో ఏం చేశారో, భవిష్యత్తులో ఏం చేయబోతున్నారో వివరించకుండా కేవలం ఆరోపణలు, విమర్శలతోనే ప్రచారం సాగించడం సరికాదని వ్యాఖ్యానించారు. ప్రజలు అన్ని విషయాలను గమనిస్తున్నారని, తమ నిర్ణయాన్ని ఓటు ద్వారా తెలియజేస్తారని పేర్కొన్నారు.
గ్రామీణ ప్రాంతాల్లో ఎన్నికల సమయంలో కొందరి ద్వారా భయాందోళనలు సృష్టించి దౌర్జన్యాలకు పాల్పడే ప్రయత్నాలు జరుగుతున్నాయని మంత్రి ఆరోపించారు. తీవ్రమైన నేరారోపణలు ఎదుర్కొంటున్న వ్యక్తులను రాజకీయ ప్రయోజనాల కోసం ఉపయోగించుకోవాలని చూస్తున్నారని విమర్శించారు. కూటమి అభ్యర్థులు, నాయకులు, కార్యకర్తలను బెదిరించడం లేదా ఎన్నికల ప్రక్రియకు ఆటంకం కలిగించడం సహించబోమని హెచ్చరించారు. ఎక్కడైనా దౌర్జన్యాలు జరిగితే చట్టప్రకారం కఠిన చర్యలు తీసుకుంటామని తెలిపారు.
కూటమి ప్రభుత్వం అధికారంలోకి వచ్చిన తర్వాత గత రెండున్నర సంవత్సరాలుగా ఇచ్చిన హామీలను అమలు చేస్తూ సంక్షేమ పథకాలను అందిస్తున్నట్లు మంత్రి వివరించారు. సామాజిక భద్రతా పెన్షన్ల పెంపు, దివ్యాంగులు, మంచానికే పరిమితమైన వారికి అధిక పెన్షన్లు, ఉచిత రేషన్, ఉచిత గ్యాస్ సిలిండర్లు, తల్లికి వందనం, నేతన్నలకు ఆర్థిక సహాయం, మహిళలకు ఉచిత బస్సు ప్రయాణం వంటి పథకాల ద్వారా వివిధ వర్గాలకు అండగా నిలుస్తున్నట్లు తెలిపారు. గత ప్రభుత్వం నుంచి వచ్చిన ఆర్థిక భారాన్ని అధిగమిస్తూ రాష్ట్రాన్ని తిరిగి అభివృద్ధి దిశగా నడిపించేందుకు ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ కృషి చేస్తున్నారని చెప్పారు.
ధర్మవరం నియోజకవర్గ గ్రామీణ ప్రాంతాల్లో తాగునీటి సమస్యకు శాశ్వత పరిష్కారం కోసం ప్రభుత్వం ప్రత్యేక దృష్టి సారించిందని మంత్రి తెలిపారు. గతంలో రాష్ట్ర ప్రభుత్వం మ్యాచింగ్ గ్రాంట్ ఇవ్వకపోవడంతో జల్ జీవన్ మిషన్ కింద కేంద్రం మంజూరు చేసిన సుమారు రూ.43 కోట్ల పనులు నిలిచిపోయాయని, కూటమి ప్రభుత్వం వచ్చాక ఆ పనులను మళ్లీ ప్రారంభించామని చెప్పారు. జల్ జీవన్ మిషన్ 2.0 కింద అదనంగా రూ.15 కోట్ల నిధులను తీసుకొచ్చేందుకు చర్యలు చేపట్టామని, ప్రతి ఇంటికీ తాగునీరు అందేలా పనులు కొనసాగుతున్నాయని వివరించారు.
గత ప్రభుత్వ హయాంలో గృహ నిర్మాణ పథకాల అమలులో అవకతవకలు జరిగాయని, జగనన్న కాలనీల పేరుతో ఇళ్ల కేటాయింపుల్లో అక్రమాలు జరిగినట్లు మంత్రి ఆరోపించారు. గతంలో మంజూరైన గృహ పథకాలను సమీక్షించి అర్హులైన ప్రతి ఒక్కరికీ ఇల్లు అందేలా చర్యలు తీసుకుంటున్నట్లు తెలిపారు. పట్టణ, గ్రామీణ ప్రాంతాల్లో ఇంకా ఇల్లు అవసరమైన కుటుంబాలను గుర్తించి గృహ నిర్మాణ సదుపాయం కల్పించేందుకు ప్రభుత్వం కృషి చేస్తోందని చెప్పారు.
గ్రామీణ ప్రాంతాల్లో దశాబ్దాలుగా రహదారి సౌకర్యం లేక ఇబ్బందులు పడుతున్న గ్రామాలకు రహదారులు కల్పిస్తున్నట్లు మంత్రి వివరించారు. కత్తేకొట్టాల, బత్తాపురం తండా, చింతలపల్లి, వసంతపురం, చిగిచెర్ల, ముక్కనేసనపల్లి తదితర గ్రామాల్లో రహదారుల నిర్మాణానికి ప్రాధాన్యత ఇస్తున్నట్లు తెలిపారు. పల్లె పండుగ కార్యక్రమం ద్వారా మౌలిక సదుపాయాల కోసం నిధులు తెచ్చామని, పల్లె పండుగ 2.0 ద్వారా మరిన్ని అభివృద్ధి పనులు చేపట్టేందుకు ప్రభుత్వం సిద్ధమవుతోందని చెప్పారు.
ధర్మవరం నియోజకవర్గాన్ని కరువు ప్రభావం నుంచి బయటకు తీసుకువచ్చి ఉద్యాన పంటలకు అనువైన ప్రాంతంగా తీర్చిదిద్దేందుకు గ్లోబల్ హార్టికల్చర్ హబ్ ప్రణాళికలో భాగంగా సాగునీటి ప్రాజెక్టులు, అనుసంధాన ప్రతిపాదనలను ముందుకు తీసుకెళ్తున్నట్లు మంత్రి తెలిపారు. పీబీఆర్ రైట్ కెనాల్, హెచ్‌ఎల్‌సీ ద్వారా నీటిని తీసుకొచ్చి గ్రామీణ ప్రాంతాలకు అందించగలిగామని చెప్పారు. హెచ్‌ఎన్‌ఎస్‌ఎస్ 276వ కిలోమీటర్ నుంచి పీబీఆర్ రైట్ కెనాల్ 67వ కిలోమీటర్ వరకు ఇంటర్‌లింకింగ్ ప్రతిపాదనకు డీపీఆర్ సిద్ధమైందని, ఇది అమలైతే ధర్మవరం రూరల్ ప్రాంతంలోని 17 చెరువులు నిండే అవకాశం ఉందని వివరించారు. చిత్రావతి జలాశయం వరద జలాలను లిఫ్ట్ చేసి తాడిమర్రి, బత్తలపల్లి ప్రాంతాల్లో నీటి కొరతకు శాశ్వత పరిష్కారం చూపేలా ప్రతిపాదనలను గ్లోబల్ హార్టికల్చర్ హబ్ ప్రణాళికలో చేర్చేందుకు ముఖ్యమంత్రి చంద్రబాబు నాయుడు, సంబంధిత మంత్రులతో చర్చించినట్లు తెలిపారు.
ముదిగుబ్బ ప్రాంతంలో హెచ్‌ఎన్‌ఎస్‌ఎస్ ద్వారా స్లూయిజ్‌లు తెరిచి చెరువులను నింపుతున్నామని, దీనివల్ల అక్కడి రైతులకు ప్రయోజనం కలుగుతోందని మంత్రి పేర్కొన్నారు. స్థానిక సంస్థల ఎన్నికల ప్రాధాన్యతను వివరిస్తూ జడ్పీటీసీ, ఎంపీటీసీ, ఎంపీపీ, సర్పంచ్‌ల పాత్ర గ్రామాల అభివృద్ధికి కీలకమని అన్నారు. గత రెండేళ్లలో స్థానిక సంస్థల స్థాయిలో సమన్వయ లోపాలు, అభివృద్ధి పనులకు ఎదురైన ఆటంకాల వల్ల అనేక కార్యక్రమాలు ఆశించిన వేగంతో సాగలేకపోయాయని తెలిపారు. స్థానిక సంస్థల్లో కూటమి ప్రజాప్రతినిధులు ఉంటే గ్రామాల అవసరాలను త్వరగా గుర్తించి నిధులు తెచ్చి అభివృద్ధి వేగవంతం చేయవచ్చని చెప్పారు.
ధర్మవరం నియోజకవర్గంలో తాడిమర్రి జడ్పీట
