రాయలసీమ న్యూస్, శ్రీ సత్యసాయి: శ్రీ సత్య సాయి జిల్లా పెనుకొండలో రాష్ట్ర బీసీ, ఈడబ్ల్యూఎస్ సంక్షేమ, చేనేత మరియు జౌళి శాఖ మంత్రి ఎస్.సవిత ముఖ్యమంత్రి చంద్రబాబు నాయుడిని ప్రశంసిస్తూ, మాజీ ముఖ్యమంత్రి జగన్‌పై తీవ్ర విమర్శలు చేశారు. ప్రకృతి విపత్తుల సమయంలో ప్రజల మధ్యకి వెళ్లి కష్టాలు తెలుసుకునే నాయకుడు చంద్రబాబు నాయుడేనని, అలాంటి నాయకుడిని విమర్శించే నైతిక హక్కు జగన్‌కు లేదని ఆమె వ్యాఖ్యానించారు.
పెనుకొండలోని క్యాంపు కార్యాలయంలో శుక్రవారం నిర్వహించిన విలేకరుల సమావేశంలో మంత్రి సవిత మాట్లాడుతూ, ఎన్ని ఆర్థిక ఇబ్బందులున్నా రాష్ట్రంలో సంక్షేమం, అభివృద్ధి కార్యక్రమాలను సీఎం చంద్రబాబు పరుగులు పెట్టిస్తున్నారని తెలిపారు. అన్నదాత సుఖీభవ–PM Kisan నిధులు, పెన్షన్ల కోసం ఒక్కరోజులోనే రూ.5,825 కోట్లను లబ్ధిదారుల ఖాతాల్లోకి కూటమి ప్రభుత్వం జమ చేసిందని వివరించారు.
రైతులకు ఇచ్చిన హామీలను నిలబెట్టుకుంటూ ఈ ఏడాది రెండో విడతగా అన్నదాత–PM Kisan కింద రైతుల ఖాతాల్లో రూ.7 వేల చొప్పున మొత్తం రూ.3,125.47 కోట్లను జమ చేశామని ఆమె చెప్పారు. ఇప్పటికే జూన్‌లో మొదటి విడతగా కూడా రూ.7 వేల చొప్పున అన్నదాత నిధులు రైతుల బ్యాంకు ఖాతాల్లో జమ చేసిన విషయాన్ని గుర్తుచేశారు. తమది రైతు పక్షపాతి ప్రభుత్వం అని మంత్రి సవిత స్పష్టం చేశారు.
ప్రకృతి విపత్తుల సమయంలో ప్రజల పట్ల బాధ్యత చూపడంలో జగన్ వైఫల్యం పాలయ్యారని మంత్రి సవిత ఆరోపించారు. తుఫాన్లు, వరదలు ముంచెత్తిన సమయంలో ప్రజల కష్టాలను పట్టించుకోకుండా IMAX థియేటర్‌లో కూర్చొని సినిమా చూస్తూ ఎంజాయ్ చేసిన చరిత్ర జగన్‌దేనని ఆమె విమర్శించారు. ఆయన ముఖ్యమంత్రిగా ఉన్న సమయంలో High Power వేదిక నిర్మించి, అక్కడి నుంచి నీట మునిగిన పంట భూములను సినిమా సెట్టింగ్‌ల మాదిరిగా పరిశీలించారని వ్యాఖ్యానించారు.
అన్నమయ్య డ్యామ్ కొట్టుకుపోయినప్పుడు 42 మంది ప్రాణాలు కోల్పోయినా, బాధితులను పరామర్శించేందుకు కూడా జగన్ ముందుకు రాలేదని మంత్రి సవిత ఆగ్రహం వ్యక్తం చేశారు. మరోవైపు, గతంలో విజయవాడలో వరదలు వచ్చినప్పుడు సీఎం చంద్రబాబు నాయుడు స్వయంగా కలెక్టరేట్‌లో రాత్రింబవళ్లు ఉండి సహాయక చర్యలను పర్యవేక్షించారని ఆమె గుర్తుచేశారు.
ఆర్నాబ్ తుఫాన్ రాకముందే అధికారులను అప్రమత్తం చేసి, నష్టం తగ్గేలా చంద్రబాబు చర్యలు తీసుకున్నారని మంత్రి సవిత తెలిపారు. ఆర్నాబ్ తుఫాన్ ప్రభావిత ప్రాంతాల్లో సీఎం ఇప్పటికే పర్యటించి, బాధితులందరికీ న్యాయం చేస్తానని హామీ ఇచ్చిన విషయాన్ని ఆమె ప్రస్తావించారు. వరదలు, తుఫాన్ల సమయంలో సహాయక కార్యక్రమాల గురించి మాట్లాడే అర్హత జగన్‌కు లేదని, మోకాళ్ల లోతు బురదలో, నీటిలోకి దిగి రైతులకు అండగా నిలిచే చంద్రబాబును విమర్శించే హక్కు కూడా ఆయనకు లేదని మంత్రి సవిత వ్యాఖ్యానించారు.
సంక్షేమం, అభివృద్ధికి సీఎం చంద్రబాబు బ్రాండ్ అంబాసిడర్ అయితే, గుండాయిజం, రౌడీయిజానికి కేరాఫ్ అడ్రస్ గొడ్డలి పార్టీ అని మంత్రి సవిత తీవ్రంగా విమర్శించారు. డబుల్ ఇంజన్ సర్కార్‌తో రాష్ట్రంలో ఎన్నడూ లేనంత అభివృద్ధి జరుగుతోందని, స్థానిక సంస్థల ఎన్నికల్లో కూటమి అభ్యర్థులు గెలిస్తే ట్రిపుల్ ఇంజన్ సర్కార్ ఏర్పడి స్థానిక సంస్థల్లో మరింత అభివృద్ధి సాధ్యమవుతుందని ఆమె అభిప్రాయపడ్డారు.
మున్సిపల్ ఓటర్లు తమకు ఉన్న రెండు ఓట్లను కూటమి అభ్యర్థులకే వేయాలని మంత్రి సవిత పిలుపునిచ్చారు. పెనుకొండ మున్సిపాల్టీలో TDP అభ్యర్థి త్రివేంద్ర నాయుడు, కౌన్సిలర్లను అత్యధిక మెజార్టీతో గెలిపించాలని ఆమె కోరారు.
ఈ ప్రకటనను రాష్ట్ర బీసీ, ఈడబ్ల్యూఎస్ సంక్షేమ, చేనేత మరియు జౌళి శాఖామాత్యుల వారి కార్యాలయం విడుదల చేసింది.
