రాయలసీమ న్యూస్, శ్రీ సత్యసాయి: శ్రీ సత్యసాయి జిల్లా రొద్దం మండలంలో దళిత రైతుపై జరిగిన దాడిని బహుజన చైతన్య వేదిక నాయకుడు, హైకోర్టు న్యాయవాది బీసీవీ శివరామకృష్ణ తీవ్రంగా ఖండించారు. చట్టాలను ఉల్లంఘించిన వారిపై కఠిన చర్యలు తీసుకోవడంతో పాటు, చట్టాల తీవ్రతను ప్రజలకు తెలియజేయాల్సిన బాధ్యత ప్రభుత్వం, పోలీసు వ్యవస్థలపై ఉందని ఆయన పేర్కొన్నారు.
రొద్దం గ్రామానికి చెందిన దళిత రైతు గోవిందప్ప తన పొలంలో వ్యవసాయం చేసుకుంటూ జీవనం సాగిస్తున్నాడు. వ్యవసాయానికి ఉపయోగించే నీరు అదే గ్రామానికి చెందిన బీసీ సామాజిక వర్గానికి చెందిన రామాంజనేయులు పొలంలోకి వెళ్లిన విషయంపై ఇద్దరి మధ్య వివాదం తలెత్తినట్లు సమాచారం. ఈ వివాదం నేపథ్యంలో గోవిందప్పపై రాళ్లతో దాడి చేసి గాయపరిచినట్లు స్థానికులు చెబుతున్నారు.
ఈ ఘటన గురించి తెలుసుకున్న బీసీవీ శివరామకృష్ణ తన బృందంతో కలిసి గురువారం రొద్దం గ్రామానికి వెళ్లి బాధితుడు గోవిందప్పను పరామర్శించారు. ఆయనతో మాట్లాడి ఘటనకు సంబంధించిన వివరాలను అడిగి తెలుసుకున్నారు. అనంతరం రొద్దం పోలీస్ స్టేషన్‌లో కేసు నమోదుకు సంబంధించిన వివరాలను విచారించి, సంబంధిత ఉన్నతాధికారులతో మాట్లాడారు.
బాధితుడికి న్యాయం జరిగేలా చూడాలని, ఘటనపై సమగ్ర విచారణ జరిపి దాడికి పాల్పడిన వారిపై చట్టప్రకారం కఠిన చర్యలు తీసుకోవాలని ఆయన డిమాండ్ చేశారు. వ్యవసాయ నీటి విషయంలో వివాదం తలెత్తినప్పుడు చట్టపరమైన మార్గాల్లో పరిష్కారం కోరుకోవాలి తప్ప, దాడులకు పాల్పడటం ఏ విధంగానూ సమర్థనీయం కాదని శివరామకృష్ణ స్పష్టం చేశారు.
సమాజంలో ప్రతి ఒక్కరికీ సమాన హక్కులు, గౌరవం, భద్రత కల్పించాల్సిన బాధ్యత ప్రభుత్వంపై ఉందని ఆయన అభిప్రాయపడ్డారు. ప్రపంచ దేశాలు కాలంతో పాటు అనేక రంగాల్లో అభివృద్ధి సాధిస్తూ ముందుకు సాగుతున్నప్పటికీ, భారతదేశంలో కుల వివక్ష, కుల ఆధారిత దాడుల ఘటనలు చోటుచేసుకోవడం ఆందోళనకరమని పేర్కొన్నారు.
ఇలాంటి ఘటనలను అరికట్టేందుకు ప్రభుత్వాలు, పోలీసు వ్యవస్థలు చట్టాలపై ప్రజలకు విస్తృత అవగాహన కల్పించాలని శివరామకృష్ణ సూచించారు. చట్టాలపై అవగాహన ఉంటేనే ప్రజల్లో హక్కులపై స్పృహ పెరుగుతుందని, చట్టాలను ఉల్లంఘిస్తే శిక్ష తప్పదనే నమ్మకం కలగాలని ఆయన అభిప్రాయపడ్డారు.
బాధితులకు సత్వర న్యాయం అందించడంతో పాటు, ఇలాంటి ఘటనలు పునరావృతం కాకుండా సంబంధిత అధికారులు తగిన చర్యలు తీసుకోవాలని ఆయన కోరారు. కులం, మతం, సామాజిక హోదాతో సంబంధం లేకుండా ప్రతి పౌరుడికి సమాన న్యాయం అందినప్పుడే రాజ్యాంగ స్ఫూర్తి నిజమైన అర్థంలో అమలవుతుందని శివరామకృష్ణ పేర్కొన్నారు.
ఈ కార్యక్రమంలో చైతన్య వేదిక గౌరవాధ్యక్షుడు రొద్దం బాబూప్రసాద్, రాంపురం రామాంజనేయులు, రంగేపల్లి కదిరప్ప, గౌరాస్పల్లి నరేష్ తదితరులు పాల్గొన్నారు.
