రాయలసీమ న్యూస్, శ్రీ సత్యసాయి: కూటమి ప్రభుత్వంపై వైకాపా అధినేత జగన్మోహన్రెడ్డి, ఆ పార్టీ నాయకులు చేస్తున్న విమర్శలపై మంత్రి సవిత ప్రతిస్పందించారు. రాష్ట్రంలో గత రెండేళ్లుగా జరుగుతున్న అభివృద్ధి, సంక్షేమ కార్యక్రమాలపై బహిరంగ చర్చకు రావాలని వైకాపా నాయకత్వాన్ని ఆమె సవాలు చేశారు.
కూటమి ప్రభుత్వం రెండేళ్ల పాలన పూర్తి చేసుకున్న సందర్భంగా మంగళవారం పుట్టపర్తిలో నిర్వహించిన విజయోత్సవ సభలో తెదేపా, జనసేన, భాజపా నాయకులు, కార్యకర్తలు, ప్రజలు పెద్ద సంఖ్యలో హాజరయ్యారు. ఈ కార్యక్రమానికి మంత్రి సవితతో పాటు ఎం.ఎస్.రాజు, సత్యకుమార్యాదవ్, బీకే పార్థసారథి, పల్లె సింధూరరెడ్డి, పరిటాల సునీత, కందికుంట ప్రసాద్, జిల్లా కలెక్టర్ శ్యామ్ప్రసాద్, గుండుమల తిప్పేస్వామి తదితరులు వేదికపై ఉన్నారు.
సభలో మంత్రి సవిత మాట్లాడుతూ, కూటమి ప్రభుత్వం అమలు చేస్తున్న అభివృద్ధి, సంక్షేమ పథకాలను చూసి ఓర్చుకోలేక వైకాపా నాయకులు “వెన్నుపోటు” అంటూ కొత్త నాటకానికి తెరతీశారని విమర్శించారు. మళ్లీ అధికారంలోకి రావాలన్న లక్ష్యంతో అసత్య ప్రచారాలనే ఆధారంగా చేసుకున్నారని ఎద్దేవా చేశారు. ప్రజల నమ్మకాన్ని వమ్ము చేసిన జగన్మోహన్రెడ్డి చరిత్రలో పెద్ద వెన్నుపోటుదారుగా మిగిలిపోతారని ఆమె వ్యాఖ్యానించారు.
ఆంధ్రప్రదేశ్ను దేశంలోనే అగ్రగామి రాష్ట్రంగా నిలబెట్టేందుకు ముఖ్యమంత్రి చంద్రబాబు నాయుడు రేయింబవళ్లు కృషి చేస్తున్నారని మంత్రి సవిత పేర్కొన్నారు. జెట్ విమానాల నుంచి కియా కార్ల వరకు ఉమ్మడి అనంతపురం జిల్లాలో తయారీ పరిశ్రమలను తీసుకురావడంలో చంద్రబాబు పాత్ర కీలకమని ఆమె అభిప్రాయపడ్డారు.
మంత్రి సత్యకుమార్యాదవ్ మాట్లాడుతూ, కూటమి ప్రభుత్వం కరవు సీమగా పేరుగాంచిన రాయలసీమలో రూ.లక్ష కోట్ల వ్యయంతో హార్టికల్చర్ హబ్ ఏర్పాటు చేస్తున్నదని తెలిపారు. రాయలసీమ ప్రాంతం క్లీన్ ఎనర్జీ, సోలార్, ఎలక్ట్రానిక్స్, రక్షణ పరికరాల తయారీ కేంద్రంగా రూపుదిద్దుకుంటోందని చెప్పారు.
దేశవ్యాప్తంగా వచ్చిన రూ.24 లక్షల కోట్ల పెట్టుబడుల్లో రూ.6 లక్షల కోట్లకు పైగా ఆంధ్రప్రదేశ్కు రావడం కూటమి ప్రభుత్వంపై పెట్టుబడిదారుల విశ్వాసానికి నిదర్శనమని సత్యకుమార్యాదవ్ పేర్కొన్నారు. గత వైకాపా ప్రభుత్వం ఐదేళ్లలో ఆరోగ్యశ్రీ పథకం కింద కేవలం రూ.9 వేల కోట్లు మాత్రమే ఖర్చు చేయగా, కూటమి ప్రభుత్వం అధికారంలోకి వచ్చిన రెండేళ్లలోనే రూ.7 వేల కోట్లు ఖర్చు చేసిందని వివరించారు.
కార్యక్రమం అనంతరం డ్వాక్రా సంఘాలకు మెగా చెక్కును అందజేశారు. వివిధ శాఖలు ఏర్పాటు చేసిన స్టాళ్లను మంత్రులు, అధికారులు పరిశీలించారు. ఈ కార్యక్రమంలో జిల్లా కలెక్టర్ శ్యామ్ప్రసాద్, జేసీ మౌర్యభరద్వాజ్, ఎంపీ బీకే పార్థసారథి, తెదేపా జిల్లా అధ్యక్షుడు ఎం.ఎస్.రాజు, ఎమ్మెల్యేలు పరిటాల సునీత, కందికుంట వెంకటప్రసాద్, పల్లె సింధూరరెడ్డి, నాయకులు పరిటాల శ్రీరామ్, పల్లె రఘునాథ్రెడ్డి, గుండుమల తిప్పేస్వామి తదితరులు పాల్గొన్నారు.
