రాయలసీమ న్యూస్, తెలంగాణ డెస్క్: తెలంగాణ రాష్ట్ర ప్రభుత్వం ఖరీఫ్ పంట పెట్టుబడి సాయంగా అందిస్తున్న రైతు భరోసా నిధుల పంపిణీ ఈరోజుతో పూర్తిస్థాయిలో ముగియనుంది. ఇప్పటి వరకు దశలవారీగా రైతుల ఖాతాల్లోకి నిధులు జమ అవుతుండగా, తుది విడతగా రూ.1,009 కోట్లను విడుదల చేయడానికి ఏర్పాట్లు పూర్తయ్యాయి.
ఖమ్మం జిల్లా చింతకాని మండలం జగన్నాథపురంలో ఏర్పాటు చేసిన రైతు ఆశీర్వాద సభలో ముఖ్యమంత్రి రేవంత్ రెడ్డి పాల్గొననున్నారు. ఈ వేదిక నుంచే ఆన్లైన్ ద్వారా రైతుల ఖాతాల్లోకి తుది విడత నిధులను జమ చేయనున్నారు. గత తొమ్మిది రోజులుగా దశలవారీగా సాగిన ఈ ప్రక్రియతో ఖరీఫ్ సీజన్ పెట్టుబడి సాయం పంపిణీ లక్ష్యం నెరవేరనుంది.
గత నెల 30న హైదరాబాద్ శిల్పకళావేదికలో రైతు భరోసా నిధుల పంపిణీ కార్యక్రమాన్ని ప్రభుత్వం ఘనంగా ప్రారంభించింది. మొదటి రోజున రెండు ఎకరాల వరకు భూమి కలిగిన రైతులకు రూ.878 కోట్లను జమ చేశారు. అనంతరం 3, 4, 5, 6, 7 ఎకరాల భూమి కలిగిన రైతులకు కూడా దశలవారీగా సాయం అందించారు.
ఇప్పుడు మిగిలిన రైతుల కోసం రూ.1,009 కోట్లను విడుదల చేయడం ద్వారా మొత్తం పంపిణీ ప్రక్రియ పూర్తవుతుంది. ఈ కార్యక్రమం ద్వారా దాదాపు 74 లక్షల మంది రైతులకు, 1.45 కోట్ల ఎకరాల వ్యవసాయ భూమికి పెట్టుబడి సాయం చేరుతోంది. సాంకేతిక కారణాల వల్ల నిధులు అందని లబ్ధిదారుల ఖాతాల్లో కూడా త్వరలోనే నగదు జమ చేస్తామని ప్రభుత్వం ఇప్పటికే స్పష్టం చేసింది.
రాష్ట్రంలో వ్యవసాయ రంగాన్ని పండుగలా మార్చడమే కాంగ్రెస్ ప్రభుత్వం ప్రధాన లక్ష్యంగా ముందుకు సాగుతోంది. వ్యవసాయం, అనుబంధ రంగాలకు అత్యంత ప్రాధాన్యత ఇస్తున్నట్లు ప్రభుత్వం పదేపదే తెలియజేస్తోంది. అధికారంలోకి వచ్చిన తర్వాత రైతు సంక్షేమాన్ని కేంద్రబిందువుగా చేసుకుని పలు కార్యక్రమాలు అమలు చేస్తోంది.
రైతు భరోసా సాయం ద్వారా సాగు పెట్టుబడి భారాలు తగ్గుతున్నాయని, ఈ నిధులు రైతులకు ఉపశమనం కలిగిస్తున్నాయని వ్యవసాయ వర్గాలు అభిప్రాయపడుతున్నాయి. కొత్తగా దరఖాస్తు చేసుకున్న లబ్ధిదారులు, నిలిచిపోయిన ఖాతాలకు కూడా నిధులు విడుదల చేసేందుకు సంబంధిత శాఖలు కసరత్తు చేస్తున్నాయి.
సాగునీరు, ఉచిత విద్యుత్, పెట్టుబడి సాయం వంటి అంశాలతో తెలంగాణను బలమైన వ్యవసాయ రాష్ట్రంగా నిలబెట్టాలని ప్రభుత్వం భావిస్తోంది. రైతు భరోసా నిధుల తుది విడత విడుదలతో ఖరీఫ్ సీజన్కు సంబంధించిన పెట్టుబడి సాయం కార్యక్రమం పూర్తి స్థాయిలో అమలవుతున్నదని అధికార వర్గాలు పేర్కొంటున్నాయి.
