రాయలసీమ న్యూస్, వై.యస్.ఆర్: కడప జిల్లా సికే దిన్నె మండలంలో ఏర్పాటు చేస్తున్న 765 కెవి విద్యుత్ హై వోల్టేజ్ లైన్కు వ్యతిరేకంగా రైతులు నిరసన వ్యక్తం చేశారు. విలువైన పంట భూములపై లైన్ నిర్మాణం జరగడం వల్ల రైతాంగం తీవ్ర నష్టాలను ఎదుర్కోవాల్సి వస్తుందని అభిప్రాయపడుతూ, లైన్ అలైన్మెంట్ను మార్చాలని డిమాండ్ చేశారు.
ఏపీ రైతు సంఘం కడప జిల్లా కమిటీ ఆధ్వర్యంలో కె.దిన్నెలోని NTPC Power Grid కార్యాలయం ఎదుట రైతులు ధర్నా నిర్వహించారు. లైన్ మార్గాన్ని మార్చి, పంట భూములను రక్షించాలని కోరుతూ Power Grid అధికారులకు వినతిపత్రం అందజేశారు.
ఈ కార్యక్రమంలో పాల్గొన్న ఏపీ రైతు సంఘం రాష్ట్ర ప్రధాన కార్యదర్శి కే ప్రభాకర్ రెడ్డి మాట్లాడుతూ, విద్యుత్ హై వోల్టేజ్ లైన్ ఏర్పాటు విషయంలో ప్రజాభిప్రాయ సేకరణ జరిగిన సమయంలోనే రైతులు తీవ్రంగా వ్యతిరేకించిన విషయాన్ని గుర్తుచేశారు. రైతుల విలువైన భూముల్లో లైన్ వేయకూడదని, ప్రత్యామ్నాయ మార్గాలను కూడా సూచించినప్పటికీ Sterlite యాజమాన్యం రైతుల అభిప్రాయాలను పట్టించుకోవడం లేదని ఆయన పేర్కొన్నారు.
రైతుల సమస్యలను, భూముల నష్టాన్ని పరిగణనలోకి తీసుకుని, వెంటనే లైన్ అలైన్మెంట్ను మార్చాలని సంఘం నాయకులు అధికారులను కోరారు. రైతాంగం జీవనోపాధి దెబ్బతినేలా నిర్ణయాలు తీసుకోవడం సరైంది కాదని, ప్రజా ప్రయోజనాలను దృష్టిలో పెట్టుకుని ప్రాజెక్టు అమలు చేయాలని వారు అభిప్రాయపడ్డారు.
ధర్నా అనంతరం Power Grid అధికారులకు వినతిపత్రం అందజేసినట్లు సంఘం నాయకులు తెలిపారు. రైతుల అభ్యంతరాలను, సూచనలను పరిగణనలోకి తీసుకుని తగిన చర్యలు తీసుకోవాలని వినతిపత్రంలో కోరినట్లు తెలిపారు.
ఈ నిరసన కార్యక్రమంలో ఏపీ రైతు సంఘం జిల్లా అధ్యక్షుడు, కార్యదర్శులు గోపాలకృష్ణయ్య, దస్తగిరి రెడ్డి, మండల రైతు సంఘం నాయకులు చిన్న సిద్దయ్య, శ్రీనివాస్ రెడ్డి, బాధిత రైతులు సుబ్బారెడ్డి, రమణారెడ్డి, శ్రీనివాసులు రెడ్డి, చంద్రశేఖర్ రెడ్డి, రఫీ, నాగమల్లారెడ్డి, కృష్ణారెడ్డి తదితరులు పాల్గొన్నారు.
