రాయలసీమ న్యూస్, వై.యస్.ఆర్:
కడపలో ‘తాహర్ పిక్చర్ ప్యాలెస్’ లక్కీ డిప్ కలకలం:
థియేటర్, స్థలం పేరుతో మోసం?
కడప పట్టణంలో ‘తాహర్ పిక్చర్ ప్యాలెస్’ పేరుతో నిర్వహించిన లక్కీ డిప్ స్థానికులను కలవరపెడుతోంది. కేవలం రూ.1000 చెల్లిస్తే థియేటర్తో పాటు 30 సెంట్ల స్థలం గెలుచుకునే అవకాశం ఉందని ప్రచారం చేయడంతో వేలాది మంది ఆకర్షితులయ్యారు. అయితే ప్రస్తుతం ఈ లక్కీ డిప్ రద్దు, రీఫండ్ ఆలస్యం నేపథ్యంలో బాధితులు తీవ్ర ఆందోళన వ్యక్తం చేస్తున్నారు.
‘తాహర్ పిక్చర్ ప్యాలెస్’ యజమాని ఈ లక్కీ డిప్ కార్యక్రమాన్ని భారీ ఎత్తున ప్రచారం చేసినట్లు స్థానికులు చెబుతున్నారు. ముఖ్యంగా ఇంస్టాగ్రామ్ ఇన్ఫ్లుయెన్సర్లను ఉపయోగించుకొని యువతను లక్ష్యంగా చేసుకుని ప్రచారం సాగించినట్టు ఆరోపణలు వినిపిస్తున్నాయి. పోస్టర్లు, సోషల్ మీడియా వీడియోల ద్వారా ఈ లక్కీ డిప్ గురించి విస్తృతంగా తెలియజేశారు.
నిర్వాహకులు మార్చి 29న లక్కీ డిప్ కూపన్లను ఓపెన్ చేసి విజేతను ప్రకటిస్తామని ముందుగా హామీ ఇచ్చినట్లు బాధితులు పేర్కొంటున్నారు. ఈ ప్రకటనల నేపథ్యంలో అనేక మంది రూ.1000 చొప్పున చెల్లించి లక్కీ డిప్లో పాల్గొన్నారు. థియేటర్, 30 సెంట్ల స్థలం బహుమతిగా వస్తుందనే ఆశతో ప్రజలు ముందుకు వచ్చారు.
అయితే అనంతరం నిర్వాహకులు లక్కీ డిప్ను రద్దు చేస్తున్నట్లు ప్రకటించారు. అందరికీ డబ్బులు తిరిగి ఇస్తామని వెల్లడించినప్పటికీ, ఇప్పటికీ చాలామందికి రీఫండ్ అందలేదని బాధితులు ఆరోపిస్తున్నారు. పోస్టర్లలో ఇచ్చిన ఫోన్ నంబర్లు స్విచ్ ఆఫ్లోనే ఉన్నాయని, నిర్వాహకుల నుంచి ఎలాంటి స్పందన రావడం లేదని వారు చెబుతున్నారు.
డబ్బులు ఎలా తిరిగి పొందాలనే అయోమయంలో వేలాది మంది ఉన్నారని స్థానిక వర్గాలు అంటున్నాయి. థియేటర్ అమ్మకం పేరుతో లక్షలాది రూపాయలు వసూలు చేసిన ‘తాహర్ పిక్చర్ ప్యాలెస్’ యజమాని చర్యలపై ప్రజల్లో ఆగ్రహం వ్యక్తమవుతోంది. సోషల్ మీడియా ఇన్ఫ్లుయెన్సర్ల ప్రచారాన్ని నమ్మి డబ్బులు చెల్లించిన వారు ఇప్పుడు మోసపోయామని భావిస్తున్నారు.
ఈ వ్యవహారంపై అధికారికంగా ఎలాంటి వివరాలు వెలువడలేదు. బాధితులు తమ డబ్బులు తిరిగి పొందేందుకు ఏ మార్గం అనుసరించాలనే దానిపై స్పష్టత లేక ఇబ్బందులు పడుతున్నారు. లక్కీ డిప్ పేరుతో జరుగుతున్న ఇలాంటి కార్యక్రమాలపై సంబంధిత శాఖలు పర్యవేక్షణను కట్టుదిట్టం చేయాలనే అభిప్రాయాలు వ్యక్తమవుతున్నాయి.
