రాయలసీమ న్యూస్, వై.యస్.ఆర్: మైదుకూరు: దేశంలో జనాభా నియంత్రణ కంటే మానవ వనరుల అభివృద్ధిపైనే ఎక్కువ దృష్టి పెట్టాల్సిన అవసరం ఉందని దువ్వూరు, చింతకుంట ప్రాథమిక ఆరోగ్య కేంద్రాల వైద్యాధికారులు అభిప్రాయపడ్డారు. ప్రపంచ జనాభా దినోత్సవాన్ని పురస్కరించుకుని శుక్రవారం దువ్వూరు, చింతకుంట పీహెచ్సీల ఆధ్వర్యంలో అవగాహన ర్యాలీలు, ప్రత్యేక కార్యక్రమాలు నిర్వహించారు.
ఈ కార్యక్రమాల్లో పాల్గొన్న వైద్యాధికారులు డాక్టర్ సురేష్ బాబు, డాక్టర్ హేమలత, డాక్టర్ వికసిత, డాక్టర్ రోషిని దేశ జనాభా, సంతానోత్పత్తి ధోరణులపై వివరాలు వెల్లడించారు. భారతదేశ జనాభా ప్రస్తుతం 146 కోట్లకు చేరుకున్నప్పటికీ, సంతానోత్పత్తి రేటు 1.9కి తగ్గిందని వారు తెలిపారు. జనాభా స్థిరత్వానికి అవసరమైన ప్రమాణం 2.1 కంటే ఇది తక్కువ కావడంతో, ఇకపై జనాభాను తగ్గించడం లక్ష్యంగా కాకుండా, ఉన్న జనాభాను నైపుణ్యవంతులుగా తీర్చిదిద్దడం, వారి సామర్థ్యాన్ని దేశాభివృద్ధికి వినియోగించుకోవడంపైనే దృష్టి పెట్టాలని వైద్యాధికారులు సూచించారు.
జనాభా నియంత్రణ అంటే కేవలం కుటుంబ నియంత్రణ శస్త్రచికిత్సలు, గర్భనిరోధక పద్ధతులకే పరిమితం కాదని వారు స్పష్టం చేశారు. బాలికల విద్యాభివృద్ధి, మహిళల భద్రత, తల్లి–శిశు ఆరోగ్య సంరక్షణ, సమతుల్య పోషకాహారం, నాణ్యమైన వైద్య సేవల అందుబాటు, ఉపాధి అవకాశాల కల్పన వంటి అంశాలు సమగ్ర మానవ వనరుల అభివృద్ధికి కీలకమని వైద్యాధికారులు పేర్కొన్నారు.
అదుపు లేని జనాభా పెరుగుదల వల్ల సహజ వనరులపై తీవ్రమైన ఒత్తిడి ఏర్పడి, పర్యావరణ నాశనం, నిరుద్యోగం, పేదరికం, ఆరోగ్య సమస్యలు వంటి సామాజిక–ఆర్థిక ఇబ్బందులు మరింత పెరిగే ప్రమాదం ఉందని వారు హెచ్చరించారు. ఈ నేపథ్యంలో ప్రతి కుటుంబం బాధ్యతాయుతంగా వ్యవహరించి, సమతుల్య కుటుంబ నిర్మాణం, పిల్లల విద్య, ఆరోగ్యంపై ప్రత్యేక శ్రద్ధ పెట్టాలని సూచించారు. ‘చిన్న కుటుంబం – ఆరోగ్యకరమైన సమాజం’ అనే సందేశాన్ని ప్రతి ఒక్కరూ ఆచరణలో పెట్టాలని ప్రజలకు పిలుపునిచ్చారు.
దువ్వూరు, చింతకుంట ప్రాంతాల్లో నిర్వహించిన ప్రపంచ జనాభా దినోత్సవ అవగాహన ర్యాలీల్లో ఆప్తాలమిక్ ఆఫీసర్ చంద్రమౌళి, ఆరోగ్య విస్తరణ అధికారి రాజగోపాల్, ఆరోగ్య పర్యవేక్షకులు వీరాంజనేయులు, శివ గంగరాజు, ఆరోగ్య సహాయకుడు రవికుమార్, సీహెచ్ఓలు, ఆరోగ్య సిబ్బంది, ఆశా కార్యకర్తలు, ఆసుపత్రి సిబ్బంది, స్థానిక ప్రజలు పెద్ద సంఖ్యలో పాల్గొన్నారు. ర్యాలీల ద్వారా కుటుంబ సంకల్పం, మహిళా శక్తీకరణ, ఆరోగ్యకర జీవనశైలిపై నినాదాలు వినిపించడంతో పాటు, ప్రజలకు పత్రికలు, అవగాహన పుస్తికలు పంపిణీ చేసినట్లు నిర్వాహకులు తెలిపారు.
