రాయలసీమ న్యూస్, వై.యస్.ఆర్:
ప్రొద్దుటూరు పొట్టిపాడు రోడ్డులో ఉద్రిక్తత:
టిడిపి–వైసీపీ కార్యకర్తల మధ్య ఘర్షణ
కడప జిల్లా ప్రొద్దుటూరు పట్టణంలోని పొట్టిపాడు రోడ్డులో సోమవారం ఉద్రిక్తత నెలకొంది. టిడిపి, వైసీపీ నాయకులు, కార్యకర్తల మధ్య వాగ్వాదం, తోపులాట చోటు చేసుకోవడంతో పరిస్థితి ఉద్రిక్తంగా మారింది. సమాచారం అందుకున్న పోలీసులు వెంటనే అక్కడికి చేరుకుని ఇరు వర్గాలను చెదరగొట్టి ఉద్రిక్తతను అదుపులోకి తీసుకువచ్చారు.
ఇటీవల పొట్టిపాడు రోడ్డులో చేపట్టిన రహదారి పనుల నాణ్యత సరిగా లేదని వైసీపీ నాయకులు ఆరోపిస్తున్నారు. ఈ నేపథ్యంలో రహదారి పరిస్థితిని ప్రత్యక్షంగా పరిశీలించేందుకు వైసీపీ మాజీ ఎమ్మెల్యే రాచమల్లు శివ ప్రసాద్ రెడ్డి, వైసీపీ నేత బంగారు రెడ్డి మంగళవారం అక్కడికి వెళ్లారు. రహదారి పనులపై వారు అక్కడ పరిశీలన కొనసాగిస్తున్న సమయంలో పరిస్థితి మారింది.
అదే సమయంలో ఆ ప్రాంతానికి ఎమ్మెల్యే వరదరాజుల రెడ్డి కుమారుడు కొండారెడ్డి, రోడ్డు కాంట్రాక్టర్ మహేశ్వర్ రెడ్డి రావడంతో టిడిపి, వైసీపీ వర్గాల మధ్య మాటల యుద్ధం ప్రారంభమైంది. ఇరువర్గాల మధ్య వాగ్వాదం తీవ్రరూపం దాల్చి తోపులాటకు దారి తీసింది. కొంతసేపు అక్కడ ఉద్రిక్త వాతావరణం నెలకొంది.
పరిస్థితి మరింత ఉద్రిక్తంగా మారే అవకాశముండటంతో పోలీసులు అదనపు బలగాలను మోహరించారు. పొట్టిపాడు రోడ్డులో భారీగా పోలీసులు మోహరై ఇరు వర్గాలను వేర్వేరు దిశలకు తరలించారు. స్థానికుల రాకపోకలకు అంతరాయం కలగకుండా ట్రాఫిక్ను మళ్లించారు.
ఈ ఘటనపై టిడిపి నాయకులు స్పందిస్తూ, ప్రభుత్వం ప్రతిష్ఠను దెబ్బతీయడానికి, బురద జల్లేందుకు వైసీపీ నేతలు కుట్రలు పన్నుతున్నారని ఆరోపించారు. రహదారి పనులపై అనవసరంగా వివాదం సృష్టించి, ప్రభుత్వాన్ని లక్ష్యంగా చేసుకుని వైసీపీ నాయకులు రాజకీయ లాభాల కోసం ప్రయత్నిస్తున్నారని టిడిపి వర్గాలు విమర్శించాయి.
ఇక వైసీపీ నాయకులు మాత్రం ప్రొద్దుటూరులో టెండర్ల కేటాయింపులో అవకతవకలు జరుగుతున్నాయని ఆరోపించారు. ఏ టెండర్ అయినా ఒకే నాయకుడే పొందుతున్నాడని, ఇతరులకు అవకాశమే ఇవ్వడం లేదని వారు మండిపడ్డారు. ప్రజా నిధులతో జరుగుతున్న పనుల్లో పారదర్శకత ఉండాలని, రహదారి నాణ్యతపై ప్రశ్నించడమే తమ ఉద్దేశమని వైసీపీ వర్గాలు పేర్కొన్నట్లు సమాచారం.
ఘటనపై స్థానిక పోలీసులు కేసు నమోదు చేసి విచారణ ప్రారంభించారు. ఇరు పార్టీల కార్యకర్తల నుంచి వివరాలు సేకరిస్తున్నట్లు తెలుస్తోంది. ప్రొద్దుటూరులో రాజకీయ వాతావరణం ఉద్రిక్తంగా మారిన నేపథ్యంలో మరిన్ని అపశ్రుతులు చోటు చేసుకోకుండా పోలీసులు అప్రమత్తంగా ఉన్నారు.
