రాయలసీమ న్యూస్, వై.యస్.ఆర్: ప్రొద్దుటూరు పట్టణంలోని దొరసానిపల్లెలో రాష్ట్ర అధికార ప్రతినిధి రాచమల్లు శివ ప్రసాద్ రెడ్డి నివాసంలో YSRCP YOUTH MEET UP కార్యక్రమం నిర్వహించారు. యువత హక్కులు, ప్రభుత్వ జవాబుదారీతనం అంశాలపై జరిగిన ఈ సమావేశానికి రాచమల్లు శివ ప్రసాద్ రెడ్డి అధ్యక్షత వహించారు.
కార్యక్రమాన్ని యువనాయకులు రాచమల్లు రాఘవేంద్ర రెడ్డి, రాష్ట్ర యువజన విభాగం సెక్రటరీ బండి వినీత్ రెడ్డి ఆధ్వర్యంలో నిర్వహించారు. నియోజకవర్గంలోని YSRCP యువనాయకులు, కార్యకర్తలు, యువకులు పెద్ద సంఖ్యలో హాజరయ్యారు.
సమావేశంలో కూటమి ప్రభుత్వం ఎన్నికల సమయంలో యువతకు ఇచ్చిన హామీలపై చర్చ జరిగింది. ముఖ్యంగా నిరుద్యోగ యువతకు నెలకు 3000 రూపాయల నిరుద్యోగ భృతి అందిస్తామని, ఉద్యోగ అవకాశాలు కల్పిస్తామని ఎన్నికల సమయంలో చేసిన వాగ్దానాలను ఇప్పుడు విస్మరించిన పరిస్థితిని నాయకులు యువతకు వివరించారు.
కూటమి ప్రభుత్వం ఇచ్చిన హామీలు అమలు కాకపోవడంతో యువతలో నెలకొన్న అసంతృప్తి, ఆర్థిక ఇబ్బందులపై సమావేశంలో చర్చించారు. యువత హక్కులను కాపాడేందుకు, ప్రభుత్వాన్ని జవాబుదారిగా నిలిపేందుకు యువత ఏకతాటిపైకి రావాల్సిన అవసరాన్ని నాయకులు ప్రస్తావించారు.
ప్రస్తుత రాజకీయ పరిస్థితుల్లో యువత పాత్ర, వారి సమస్యలు, అవకాశాలపై కూడా ఈ సమావేశంలో చర్చ జరిగింది. నియోజకవర్గంలో యువతకు సంబంధించిన అంశాలను సమగ్రంగా అధ్యయనం చేసి, పార్టీ వేదికగా ప్రభుత్వ దృష్టికి తీసుకెళ్లేలా చర్యలు తీసుకోవాలని నాయకులు సూచించినట్లు కార్యక్రమంలో పాల్గొన్న వారు తెలిపారు.
ప్రొద్దుటూరు నియోజకవర్గంలో యువతతో ఇలాంటి సమావేశాలు కొనసాగిస్తూ, వారి అభిప్రాయాలు, సమస్యలను పార్టీ కార్యాచరణలో ప్రతిబింబించేలా ప్రయత్నాలు కొనసాగించాలని నాయకులు నిర్ణయించినట్లు సమావేశం అనంతరం పార్టీ వర్గాలు పేర్కొన్నాయి.
