రాయలసీమ న్యూస్, వై.యస్.ఆర్: ప్రొద్దుటూరు పట్టణంలో ఈద్ మిలాద్-ఉన్-నబీ సందర్భంగా బుధవారం ముస్లిం సోదరులు సమైక్యతా ర్యాలీ నిర్వహించారు. ప్రవక్త మహ్మద్ జన్మదినోత్సవాన్ని పురస్కరించుకొని ప్రతి ఏడాది నిర్వహించే ఈ కార్యక్రమాన్ని ఈసారి కూడా ఘనంగా చేపట్టారు.
మైదుకూరు రోడ్డులోని నజీరుల్లా మఠం నుంచి సుందరాచార్యుల వీధిలోని మసీదు వరకు ర్యాలీ కొనసాగింది. మైదుకూరు రోడ్డు, శివాలయం వీధి, గాంధీ రోడ్డు, సుందరాచార్యుల వీధి మీదుగా ర్యాలీ ప్రదర్శన సాగింది. ర్యాలీలో పెద్ద సంఖ్యలో ముస్లిం యువకులు, పెద్దలు పాల్గొని ఈద్ మిలాద్-ఉన్-నబీకి సంబంధించిన ప్రార్థనలు, మదహ్లు చేశారు.
ర్యాలీ మార్గమంతా మసీదు, మఠం, మతపరమైన సంస్థల ప్రతినిధులు పాల్గొని కార్యక్రమానికి సహకరించారు. పట్టణంలోని ప్రధాన వీధుల మీదుగా వెళ్లినందున ర్యాలీ సమయంలో వాహనాల రాకపోకలకు కొంత అంతరాయం కలిగింది.
స్థానిక ఏఎస్పీ విభుకృష్ణ ఆదేశాల మేరకు పోలీసు అధికారులు బందోబస్తు, ట్రాఫిక్ నియంత్రణ చేపట్టారు. ర్యాలీ మార్గంలో కీలక చౌరస్తాలు, రద్దీ ప్రాంతాల్లో అదనపు సిబ్బందిని మోహరించి వాహనాల మళ్లింపు, నియంత్రణ నిర్వహించారు. ర్యాలీ ప్రారంభం నుంచి ముగింపు వరకు ఎలాంటి అవాంఛనీయ ఘటనలు చోటుచేసుకోకుండా పోలీసులు అప్రమత్తంగా వ్యవహరించారు.
ముస్లిం సోదరులు శాంతియుతంగా, క్రమశిక్షణతో ర్యాలీ నిర్వహించడంతో కార్యక్రమం ప్రశాంత వాతావరణంలో ముగిసింది. ఈద్ మిలాద్-ఉన్-నబీ సందర్భంగా పట్టణంలో మసీదులు, మతపరమైన స్థలాలు ప్రత్యేకంగా అలంకరించగా, రాత్రి ప్రత్యేక ప్రార్థనలు, మిలాద్ సమావేశాలు నిర్వహించేందుకు ఏర్పాట్లు చేశారు.
