రాయలసీమ న్యూస్, స్పోర్ట్స్ డెస్క్: అంతర్జాతీయ క్రికెట్ మండలి ప్రకటించిన తాజా వన్డే ర్యాంకింగ్స్‌లో భారత పురుషుల జట్టు నంబర్‌వన్‌ స్థానాన్ని కొనసాగించింది. ఐసీసీ వార్షిక సవరణల అనంతరం టీమ్‌ఇండియా రేటింగ్‌ పాయింట్లు స్వల్పంగా తగ్గినా, అగ్రస్థానంలో మార్పు రాలేదు.
తాజా పట్టిక ప్రకారం టీమ్‌ఇండియా 118 రేటింగ్‌ పాయింట్లతో మొదటి స్థానంలో ఉంది. వార్షిక సవరణల్లో భాగంగా ఒక పాయింట్‌ కోల్పోయినప్పటికీ భారత జట్టు ఆధిక్యం నిలకడగానే కొనసాగింది. న్యూజిలాండ్‌ 113 పాయింట్లతో రెండో స్థానంలో నిలవగా, ఒక స్థానాన్ని మెరుగుపరుచుకున్న దక్షిణాఫ్రికా 102 పాయింట్లతో మూడో ర్యాంకుకు ఎగబాకింది.
ఆస్ట్రేలియా 101 పాయింట్లతో నాలుగో స్థానానికి జారిపోగా, పాకిస్థాన్‌ 100 పాయింట్లతో ఐదో స్థానంలో ఉంది. శ్రీలంక 96 పాయింట్లతో ఆరవ స్థానంలో, అఫ్గానిస్థాన్‌ 93 పాయింట్లతో ఏడో స్థానంలో కొనసాగుతున్నాయి. ఇంగ్లాండ్‌ 89 పాయింట్లతో ఎనిమిదో ర్యాంకులో ఉండగా, బంగ్లాదేశ్‌ 88 పాయింట్లతో తొమ్మిదో స్థానంలో ఉంది. వెస్టిండీస్‌ 73 పాయింట్లతో టాప్‌–10 జట్ల జాబితాను పూర్తిచేసింది.
వన్డే ఫార్మాట్‌తో పాటు టీ20 ర్యాంకింగ్స్‌లోనూ టీమ్‌ఇండియానే నంబర్‌వన్‌ స్థానంలో కొనసాగుతోంది. చిన్న ఫార్మాట్‌లో భారత జట్టు స్థిరమైన ప్రదర్శనతో అగ్రస్థానాన్ని దక్కించుకుని నిలబెట్టుకుంటోంది. మరోవైపు టెస్ట్‌ ర్యాంకింగ్స్‌లో మాత్రం ఆస్ట్రేలియా అగ్రస్థానాన్ని ఆక్రమించింది. ఐదు రోజుల ఫార్మాట్‌లో ఆ జట్టు ఆధిపత్యం కొనసాగుతోంది.
వివిధ ఫార్మాట్లలో భారత జట్టు ప్రదర్శన, ర్యాంకింగ్స్‌లోని ఈ స్థానాలు రాబోయే ద్వైపాక్షిక సిరీస్‌లు, బహుళ జట్ల టోర్నమెంట్లకు ముందు కీలకంగా భావిస్తున్నారు. ముఖ్యంగా వన్డే, టీ20ల్లో నంబర్‌వన్‌ స్థానంలో ఉండటం వల్ల టీమ్‌ఇండియాపై అభిమానులు, క్రికెట్ వర్గాల అంచనాలు మరింత పెరిగాయి.
