రాయలసీమ న్యూస్, స్పోర్ట్స్ డెస్క్:

సూర్యకుమార్ బ్యాటింగ్‌ దూకుడు

టీమిండియా మాజీ టీ20 కెప్టెన్‌ సూర్యకుమార్ యాదవ్ తనపై వచ్చిన విమర్శలకు మైదానంలోనే సమాధానం ఇస్తున్నాడు. టీ20 ఫార్మాట్‌లో కెప్టెన్సీ బాధ్యతలు కోల్పోయిన తర్వాత, ముంబై టీ20 టోర్నమెంట్‌లో వరుసగా దూకుడు ఇన్నింగ్స్‌లు ఆడి తన ఫామ్‌పై ఉన్న అనుమానాలను చెరిపేస్తున్నాడు. ట్రయంఫ్స్ నైట్స్ MNE తరఫున ఆడుతున్న సూర్య, బ్యాటింగ్‌లో తన పాత దూకుడు మళ్లీ చూపిస్తూ జట్టును విజయాల బాటలో నడిపిస్తున్నాడు.

ఇటీవలే బీసీసీఐ, టీ20 జట్టుకు కొత్త కెప్టెన్‌గా శ్రేయస్ అయ్యర్‌ను నియమించింది. కొంతకాలంగా ఫామ్‌ సరిగా లేదన్న కారణంతో సూర్యకుమార్‌ను కెప్టెన్సీ నుంచి తప్పించడమే కాకుండా, టీమ్‌ నుంచి కూడా పక్కన పెట్టిన విషయం తెలిసిందే. ఈ పరిణామాల తర్వాత మైదానంలోకి దిగిన సూర్య, తన బ్యాటింగ్‌తో సెలెక్టర్లకు, విమర్శకులకు పరోక్షంగా బదులిస్తున్నాడనే అభిప్రాయం క్రికెట్ వర్గాల్లో వ్యక్తమవుతోంది.

ప్రస్తుతం జరుగుతున్న ముంబై టీ20 టోర్నమెంట్‌లో సోమవారం వాంఖడే స్టేడియంలో MSC మరాఠా రాయల్స్‌తో జరిగిన మ్యాచ్‌లో సూర్యకుమార్ అద్భుత ఇన్నింగ్స్ ఆడాడు. ట్రయంఫ్స్ నైట్స్ తరఫున ఆడిన అతను కేవలం 36 బంతుల్లోనే 72 పరుగులు చేసి నాటౌట్‌గా నిలిచి జట్టుకు ఆరు వికెట్ల తేడాతో విజయం అందించాడు. 13 ఫోర్లు, ఒక సిక్సర్‌తో వాంఖడే బౌండరీల్ని చీల్చిన అతని ఇన్నింగ్స్‌ ప్రత్యర్థి బౌలర్లను తీవ్రంగా ఇబ్బంది పెట్టింది.

ఈ మ్యాచ్‌లో ముందుగా బౌలింగ్‌లో సిల్వెస్టర్ డిసౌజా మెరిశాడు. అతను 3.5 ఓవర్లలో 21 పరుగులకే ఐదు వికెట్లు తీయడంతో MSC మరాఠా రాయల్స్ జట్టు 19.5 ఓవర్లలో 152 పరుగులకే ఆలౌట్ అయింది. 153 పరుగుల లక్ష్యంతో బరిలోకి దిగిన ట్రయంఫ్స్ నైట్స్, తొలి ఐదు ఓవర్లలోపే ఇద్దరు ఓపెనర్లను కోల్పోయి ఒత్తిడిలో పడింది.

ఈ దశలో క్రీజులోకి వచ్చిన కెప్టెన్‌ సూర్యకుమార్ యాదవ్, నూతన్ కుమార్ గోయల్‌తో కలిసి ఇన్నింగ్స్‌ను చక్కదిద్దాడు. ఇద్దరూ కలిసి మూడో వికెట్‌కు 103 పరుగుల కీలక భాగస్వామ్యం నమోదు చేసి మ్యాచ్‌ను ట్రయంఫ్స్ నైట్స్ వైపు తిప్పేశారు. నూతన్ 42 బంతుల్లో 56 పరుగులు చేసి విలువైన సహకారం అందించాడు. అతని ఇన్నింగ్స్‌లో నాలుగు ఫోర్లు, మూడు సిక్సర్లు ఉన్నాయి.

చివర్లో సూర్య బౌండరీతో ఛేజ్‌ను స్టైలిష్‌గా ముగించడంతో ట్రయంఫ్స్ నైట్స్ కేవలం 16 ఓవర్లలోనే లక్ష్యాన్ని చేరుకుంది. అంతకుముందు శ్రేయస్ అయ్యర్ కెప్టెన్సీలోని సోబో ముంబై ఫాల్కన్స్‌తో జరిగిన మ్యాచ్‌లో కూడా సూర్యకుమార్ 24 బంతుల్లో 48 పరుగులు చేసి తన దూకుడు బ్యాటింగ్‌ను చూపించాడు.

ఇలా ముంబై టీ20 టోర్నమెంట్‌లో వరుసగా మెరుగైన ఇన్నింగ్స్‌లు ఆడుతున్న సూర్యకుమార్ యాదవ్‌ను చూసి, సోషల్ మీడియాలో కొందరు అభిమానులు ఐపీఎల్‌లోనే ఇలాంటి ఫామ్‌లో ఉంటే టీ20 కెప్టెన్సీ కోల్పోయే పరిస్థితి వచ్చేదే కాదని కామెంట్లు చేస్తున్నారు. అయితే ప్రస్తుతం అతను చూపిస్తున్న బ్యాటింగ్‌ ఫామ్, తిరిగి జాతీయ జట్టులోకి అతని అవకాశాలను బలపరుస్తోందనే అభిప్రాయం క్రికెట్ విశ్లేషకులది.