రాయలసీమ న్యూస్, వై.యస్.ఆర్: రాజకీయంగా వరుస విజయాలతో ముందుకు సాగుతున్న MLA ఆదినారాయణరెడ్డి ఇప్పుడు పులివెందుల మున్సిపాలిటీపై దృష్టి సారించినట్లు రాజకీయ వర్గాల్లో చర్చ నడుస్తోంది. ఇటీవల కాలంలో ఆయన చేపట్టిన ప్రతి రాజకీయ సవాల్ విజయవంతం కావడంతో, తదుపరి లక్ష్యంగా పులివెందుల మున్సిపాలిటీని ఎంచుకున్నారనే టాక్ వినిపిస్తోంది.
2017లో జరిగిన నంద్యాల ఉప ఎన్నికలో ఆదినారాయణరెడ్డి కీలక పాత్ర పోషించిన విషయం తెలిసిందే. ఆ తర్వాత బీటెక్ రవిని MLCగా గెలిపించడంలో, లతారెడ్డిని పులివెందుల ZPTCగా గెలిపించడంలో కూడా ఆయన ప్రభావం స్పష్టంగా కనిపించిందని స్థానిక నేతలు చెబుతున్నారు. ఈ వరుస విజయాలు ఆయన రాజకీయ బలాన్ని మరింత పెంచినట్లు విశ్లేషకులు భావిస్తున్నారు.
ఇప్పుడు అదే ధోరణిలో పులివెందుల మున్సిపాలిటీని తన ఆధీనంలోకి తెచ్చుకోవాలని ఆదినారాయణరెడ్డి ప్రయత్నిస్తున్నారనే ప్రచారం సాగుతోంది. మున్సిపల్ ఎన్నికలు ఎప్పుడొస్తాయన్న దానికంటే ముందుగానే ఆయన తన వ్యూహాలను అమలు చేస్తున్నట్లు సమాచారం. స్థానిక నాయకత్వాన్ని బలోపేతం చేయడం, బూత్ స్థాయిలో కేడర్ను చురుకుగా మార్చడం, విభేదాలను సర్దుబాటు చేయడం వంటి చర్యలు ఈ దిశగా భాగంగా చూస్తున్నారు.
పులివెందుల మున్సిపాలిటీపై ఫోకస్ పెట్టిన నేపథ్యంలో, సమీపంలోని జమ్మలమడుగు మున్సిపాలిటీలో కూడా ఆదినారాయణరెడ్డి పావులు కదుపుతున్నారనే వార్తలు వినిపిస్తున్నాయి. జమ్మలమడుగులో సునాయాస విజయం సాధించేలా ఇప్పటి నుంచే ప్రణాళికలు రచిస్తున్నారని, అక్కడి స్థానిక నేతలతో సమన్వయం పెంచుతున్నారని పార్టీ వర్గాలు చెబుతున్నాయి.
పులివెందుల, జమ్మలమడుగు మున్సిపాలిటీలలో జరిగే రాజకీయ కదలికలు రానున్న రోజుల్లో మరింత ఆసక్తికరంగా మారే అవకాశం ఉందని పరిశీలకులు అంచనా వేస్తున్నారు. ఇప్పటికే ఆదినారాయణరెడ్డి వరుస విజయాలతో పార్టీ లోపల, వెలుపల తనకంటూ ప్రత్యేక గుర్తింపు తెచ్చుకున్న నేపథ్యంలో, మున్సిపాలిటీలు కూడా ఆయన ఖాతాలో చేరతాయా అన్నది ఇప్పుడు రాజకీయ వర్గాల్లో చర్చనీయాంశంగా మారింది.
