రాయలసీమ న్యూస్, స్పోర్ట్స్ డెస్క్: ఇటీవలే ప్రపంచకప్ను కైవసం చేసుకుని, టీ20 ర్యాంకింగ్స్లో అగ్రస్థానంలో ఉన్న టీమ్ఇండియా ప్రస్తుతం అరుదైన ఒత్తిడిని ఎదుర్కొంటోంది. ప్రపంచ నంబర్ 1, 2 బ్యాటర్లు భారత జట్టులోనే ఉండగా, బౌలర్ల టాప్-10లో ఇద్దరు భారతీయులు ఉన్నారు. అయినప్పటికీ, ప్రస్తుత టీ20 సిరీస్ల్లో జట్టు ప్రదర్శన ఆ స్థాయికి ఏమాత్రం సరిపోకపోవడం ఆందోళన కలిగిస్తోంది.
ఐర్లాండ్తో సిరీస్ను 0-2 తేడాతో కోల్పోయిన భారత్.. ఇంగ్లాండ్తో జరుగుతున్న ప్రస్తుత సిరీస్లో మరింత నిరాశపరిచే ఆటను ప్రదర్శిస్తోంది. మూడు మ్యాచ్లలో రెండు ఓటములు చవిచూసిన నేపథ్యంలో, సిరీస్ చేజారకుండా ఉండాలంటే నాలుగో టీ20లో తప్పనిసరిగా విజయం సాధించాల్సిన పరిస్థితి ఏర్పడింది. ఈ మ్యాచ్ గురువారం రాత్రి 10 గంటలకు బ్రిస్టల్లో ప్రారంభం కానుంది.
శ్రేయస్ అయ్యర్ నేతృత్వంలోని భారత జట్టుకు ఇది కీలక సమరం. వరుస పరాభవాలతో జట్టు ఆత్మవిశ్వాసం దెబ్బతిన్నప్పటికీ, ఈ మ్యాచ్లో గెలిచి సిరీస్లో నిలబడాలని లక్ష్యంగా పెట్టుకుంది. ముఖ్యంగా బ్యాటింగ్ విభాగం పూర్తిగా విఫలమవడం జట్టుకు పెద్ద తలనొప్పిగా మారింది.
ఇంగ్లాండ్తో మూడో టీ20లో భారత్ ప్రదర్శన అత్యంత నిరాశాజనకంగా నిలిచింది. 202 పరుగుల లక్ష్యంతో బరిలోకి దిగిన టీమ్ఇండియా 11.4 ఓవర్లలో 76 పరుగులకే ఆలౌటైంది. 125 పరుగుల తేడాతో వచ్చిన ఈ పరాజయం టీ20 ఫార్మాట్లో భారత జట్టుకు పరుగుల పరంగా అతి పెద్ద ఓటమిగా నమోదైంది. ఆ మ్యాచ్లో కేవలం నలుగురు ఆటగాళ్లు మాత్రమే రెండంకెల స్కోరు సాధించగా, అత్యధిక వ్యక్తిగత స్కోరు 13 పరుగులే కావడం గమనార్హం.
వరుసగా నాలుగు టీ20ల్లో ఓటమి చవిచూసిన భారత్ తిరిగి గెలుపు బాట పట్టడం అంత సులభం కాదని విశ్లేషకులు భావిస్తున్నారు. కొంతవరకు అభిషేక్ శర్మను మినహాయిస్తే మిగతా బ్యాటర్లు లయలో లేరు. ఈ పరిస్థితిలో ఇంగ్లాండ్ పేస్ బౌలర్లు జోఫ్రా ఆర్చర్, జోష్ టంగ్ వేగానికి మరోసారి భారత బ్యాటర్లు పరీక్షకు గురికానున్నారు.
సంజు శాంసన్ స్థానంలో గత రెండు మ్యాచ్ల్లో బరిలోకి దిగిన 15 ఏళ్ల వైభవ్ కూడా పెద్దగా ప్రభావం చూపలేకపోయాడు. ప్రతిభావంతుడైన ఈ యువ ఆటగాడిపై భారీ అంచనాలు ఉన్నప్పటికీ, శాంసన్ను జట్టులోంచి తప్పించడంపై వచ్చిన విమర్శల నేపథ్యంలో మళ్లీ అతణ్ని జట్టులోకి తీసుకుంటారా, తీసుకుంటే ఎవరి స్థానంలో అనేది ఆసక్తికరంగా మారింది. సిరీస్లో శాంసన్ తిరిగి జట్టులోకి రాకపోవచ్చని కోచ్ గౌతమ్ గంభీర్ వ్యాఖ్యానించిన విషయం తెలిసిందే.
శివమ్ దూబె స్థానంలో సూర్యాంశ్ షెడ్జే, అక్షర్ పటేల్ స్థానంలో వాషింగ్టన్ సుందర్ తుది జట్టులోకి వచ్చే అవకాశం ఉందని జట్టు వర్గాలు భావిస్తున్నాయి. ఎలెవన్లో ఎవరున్నా, బ్యాటర్లు ఎలా పుంజుకుంటారు అన్నదానిపైనే నాలుగో మ్యాచ్లో టీమ్ఇండియా అవకాశాలు ఆధారపడి ఉన్నాయి. టాప్ ఆర్డర్తో పాటు తిలక్ వర్మ, కెప్టెన్గా తొలి విజయం కోసం ఎదురుచూస్తున్న శ్రేయస్ అయ్యర్ కూడా బ్యాట్తో మెరిపించాల్సిన అవసరం ఉంది. భారత బౌలర్లు కూడా మరింత క్రమశిక్షణతో బౌలింగ్ చేస్తూ జట్టుకు మద్దతు ఇవ్వాలి.
ఇదిలా ఉంటే, సిరీస్లో 2-0 ఆధిక్యంలో ఉన్న ఇంగ్లాండ్ జట్టు రెట్టించిన ఉత్సాహంతో బరిలోకి దిగుతోంది. కనీసం రెండు మ్యాచ్లున్న టీ20 సిరీస్లో భారత్పై ఇంతకుముందు ఎప్పుడూ సిరీస్ విజయం సాధించని ఇంగ్లాండ్ ఈసారి ఆ అవకాశాన్ని సద్వినియోగం చేసుకోవాలని పట్టుదలగా ఉంది. హ్యారీ బ్రూక్ నేతృత్వంలోని ఈ జట్టులో బ్యాటర్లు, బౌలర్లు ఇద్దరూ మంచి ఫామ్లో ఉన్నారు. గత 21 టీ20ల్లో 18 విజయాలు సాధించడం ఇంగ్లాండ్ ఆధిపత్యాన్ని స్పష్టంగా చూపిస్తోంది. ఆర్చర్, జోష్ టంగ్ పేస్ బౌలింగ్ ప్రస్తుతం ఆ జట్టుకు ప్రధాన బలం.
మ్యాచ్ వేదిక బ్రిస్టల్ పిచ్ సాధారణంగా పెద్ద స్కోర్లకు అనుకూలంగా ఉంటుంది. ఇక్కడ భారత్కు మంచి రికార్డు ఉంది. ఈ మైదానంలో ఆడిన గత నాలుగు టీ20ల్లోనూ టీమ్ఇండియా విజయం సాధించింది. ఆ అనుభవం ఈ కీలక సమరంలో భారత జట్టుకు ఎంతవరకు ఉపయోగపడుతుందో చూడాలి.
తుది జట్లు (అంచనా):
భారత్: అభిషేక్ శర్మ, వైభవ్, ఇషాన్ కిషన్, శ్రేయస్ అయ్యర్, తిలక్ వర్మ, శివమ్ దూబె/సూర్యాంశ్ షెడ్జే, అక్షర్ పటేల్/వాషింగ్టన్ సుందర్, హర్షిత్ రాణా, అర్ష్దీప్ సింగ్, ప్రిన్స్ యాదవ్, వరుణ్ చక్రవర్తి.
ఇంగ్లాండ్: ఫిల్ సాల్ట్, జోస్ బట్లర్, హ్యారీ బ్రూక్, జేకబ్ బెతెల్, టామ్ బాంటన్, సామ్ కరన్, విల్ జాక్స్, లియామ్ డాసన్, అదిల్ రషీద్, జోఫ్రా ఆర్చర్, జోష్ టంగ్.
