రాయలసీమ న్యూస్, స్పోర్ట్స్ డెస్క్: ఆంధ్ర ప్రిమియర్ లీగ్లో విజయవాడ సన్షైనర్స్ ప్లేఆఫ్స్ అవకాశాలను బలపరుచుకుంది. అమరావతిలో జరుగుతున్న చివరి అంచె లీగ్ మ్యాచ్లో గురువారం రాయల్స్ ఆఫ్ రాయలసీమపై 19 పరుగుల తేడాతో విజయం సాధించింది. ఈ గెలుపుతో విజయవాడ జట్టు పాయింట్ల పట్టికలో అగ్రస్థానాల కోసం పోటీలో నిలిచింది.
మొదట బ్యాటింగ్కు దిగిన విజయవాడ సన్షైనర్స్ నిర్ణీత 20 ఓవర్లలో 5 వికెట్లు కోల్పోయి 208 పరుగులు చేసింది. టోర్నీలో తన సత్తా చాటుతున్న ప్రశాంత్ కుమార్ మరోసారి అద్భుత ప్రదర్శన కనబరిచాడు. అతను 33 బంతుల్లో 5 ఫోర్లు, 2 సిక్సర్లతో 60 పరుగులు చేసి జట్టుకు బలమైన పునాది వేశాడు. అతనికి ‘ప్లేయర్ ఆఫ్ ద మ్యాచ్’ అవార్డు లభించింది.
ఇన్నింగ్స్ చివర్లో షేక్ జహీర్ అబ్బాస్ మెరుపు బ్యాటింగ్ చేసి స్కోరును 200 దాటించాడు. అతను 20 బంతుల్లోనే 1 ఫోర్, 7 సిక్సర్లతో 53 పరుగులు చేసి నాటౌట్గా నిలిచాడు. టాప్ ఆర్డర్లో హర్షవర్దన్ 36, అభినవ్ 21, అశ్విన్ హెబ్బార్ 27 పరుగులతో జట్టుకు తోడ్పడ్డారు. దీంతో విజయవాడ భారీ లక్ష్యాన్ని రాయలసీమ ముందుంచింది.
208 పరుగుల లక్ష్యంతో బరిలోకి దిగిన రాయల్స్ ఆఫ్ రాయలసీమ ఆరంభం నుంచే ఒత్తిడికి లోనైంది. విజయవాడ బౌలర్లు కట్టుదిట్టంగా బౌలింగ్ చేయడంతో ప్రత్యర్థి బ్యాటర్లు స్వేచ్ఛగా ఆడే అవకాశం లేకుండా పోయింది. నిర్ణీత 20 ఓవర్లలో 9 వికెట్లు కోల్పోయి 189 పరుగులకే పరిమితమైంది.
రాయలసీమ తరఫున సూర్యతేజ రెడ్డి 44 పరుగులతో, మామిడి వంశీకృష్ణ 37 పరుగులతో పోరాడినా జట్టును గెలిపించలేకపోయారు. మిగతా బ్యాటర్లు విఫలమవడంతో రాయల్స్ ఓటమి తప్పించుకోలేకపోయింది.
విజయవాడ బౌలర్లలో ప్రణవ్ రెడ్డి 4 వికెట్లు 43 పరుగుల ఖరీదుపై తీసి రాయలసీమ ఇన్నింగ్స్ను కుదిపేశాడు. తన్నీరు భరత్ 2 వికెట్లు 31 పరుగులిచ్చి కీలక సమయంలో బ్రేక్త్రూ అందించాడు. మిగతా బౌలర్లు కూడా అనుకూల సమయంలో వికెట్లు తీసి జట్టు విజయానికి తోడ్పడ్డారు.
ఈ విజయం తర్వాత పాయింట్ల పట్టికలో భీమవరం బుల్స్, విజయవాడ సన్షైనర్స్, సింహాద్రి వైజాగ్ లయన్స్, అమరావతి రాయల్స్ జట్లు తలా 8 పాయింట్లతో ఉన్నాయి. నెట్ రన్రేట్లో భీమవరం (1.080), విజయవాడ (0.665) జట్లు తొలి రెండు స్థానాల్లో కొనసాగుతున్నాయి. మిగతా లీగ్ మ్యాచ్ల ఫలితాలపై ప్లేఆఫ్స్ సమీకరణలు ఆధారపడి ఉండటంతో అభిమానుల్లో ఆసక్తి నెలకొంది.
