రాయలసీమ న్యూస్, తెలంగాణ డెస్క్:

రేవంత్–మోదీ సాన్నిహిత్య ప్రచారం.. తెలంగాణలో బీజేపీ రాజకీయ రణనీతా?

హైదరాబాద్: ప్రత్యర్థి శక్తి బలహీనంగానే ఉన్నా, ఆ శక్తిని నిలబెట్టే ఒక్క బలమైన నాయకుడు ఉంటే ముందుగా ఆ నాయకుడినే లక్ష్యంగా చేసుకోవడం రాజకీయాల్లో సాధారణ వ్యూహంగా భావిస్తారు. ఆ నాయకుడిని పార్టీ నుంచి వేరు చేయగలిగితే ఆ పార్టీ మొత్తం బలహీనపడుతుందని, తద్వారా రాజకీయ పోరులో విజయం సులభమవుతుందని విశ్లేషకులు చెబుతున్నారు. తెలంగాణ రాజకీయాల్లో ప్రస్తుతం ప్రధానమంత్రి నరేంద్ర మోదీ కూడా ఇలాంటి రణనీతినే ప్రయోగిస్తున్నారనే అభిప్రాయం వ్యక్తమవుతోంది.

తెలంగాణలో కాంగ్రెస్ పార్టీని గడచిన ఎన్నికల్లో అధికారంలోకి తెచ్చడంలో, ఇప్పుడు ప్రభుత్వాన్ని నిలబెట్టడంలో ముఖ్యమంత్రి రేవంత్ రెడ్డి కీలక పాత్ర పోషిస్తున్నారని రాజకీయ వర్గాలు అంచనా వేస్తున్నాయి. రేవంత్ రెడ్డి, కాంగ్రెస్ పార్టీ మధ్య విభేదాల విత్తనాలు చల్లగలిగితే తెలంగాణలో బీజేపీకి అవకాశాలు మెరుగుపడతాయని మోదీ భావిస్తున్నారనే విశ్లేషణ వినిపిస్తోంది.

ఇటీవల దిల్లీలో జరిగిన నీతి ఆయోగ్ సమావేశం అనంతరం నరేంద్ర మోదీ, రేవంత్ రెడ్డి కలసి మాట్లాడుతున్న ఫోటోలు వెలుగులోకి రావడంతో ఈ చర్చలు మరింత వేడెక్కాయి. ఆ ఫోటోను మానసిక కోణంలో విశ్లేషించిన ప్రముఖ సైకాలజిస్ట్ వంగీపురం శ్రీనివాస చారి, న్యూస్18తో మాట్లాడుతూ ఆ చిత్రంలో ఇద్దరి శరీర భాషపై తన అభిప్రాయాన్ని వెల్లడించారు.

ఈ ఫోటోపై సోషల్ మీడియాలో కూడా విస్తృత చర్చ నడుస్తోంది. మోదీ, రేవంత్ కలిసిపోయారని, ఇద్దరి మధ్య సాన్నిహిత్యం పెరిగిందని వ్యాఖ్యలు, ట్రోల్స్ పెద్ద సంఖ్యలో కనిపిస్తున్నాయి.

ఇక తెలంగాణ వ్యవహారాల ఇన్‌చార్జ్ మీనాక్షీ నటరాజన్‌కు రాజ్యసభ టికెట్ దక్కకపోవడానికీ రేవంత్ రెడ్డే కారణమని బీజేపీ వర్గాలు ప్రచారం చేస్తున్నాయి. మధ్యప్రదేశ్ మంత్రి కైలాష్ విజయ్ వర్గియా, మీనాక్షీపై తెలంగాణలో నమోదైన కేసుల విషయమై సమాచారం తమకు ఆ రాష్ట్ర కాంగ్రెస్ నేతల నుంచే వచ్చిందని వ్యాఖ్యానించడంతో అనుమానాల బాణాలు రేవంత్ వైపు మళ్లాయి.

మరోవైపు, మోదీ కూడా రేవంత్ రెడ్డితో సత్సంబంధాలు ఉన్నాయనే సందేశం వెళ్లేలా వ్యాఖ్యలు చేస్తున్నారనే అభిప్రాయం వ్యక్తమవుతోంది. మేలో హైదరాబాద్ పర్యటన సందర్భంగా “మేరే సే జుడో” అంటూ పిలుపునిచ్చిన విషయం, 2024 మార్చిలో రేవంత్ రెడ్డి మోదీని రాష్ట్రాభివృద్ధికి పెద్దన్నలా సహకరించాలని కోరిన వ్యాఖ్యలు రాజకీయ చర్చలకు దారితీశాయి.

ఇటీవల జరిగిన మీడియా సమావేశంలో బీఆర్ఎస్ కార్యనిర్వాహక అధ్యక్షుడు కేటీ రామారావు కూడా రేవంత్–మోదీ సంబంధాలపై తీవ్ర విమర్శలు చేశారు.

ప్రతిపక్షాలు ఒకవైపు, బీజేపీ మరోవైపు రేవంత్ రెడ్డిని నిరంతరం టార్గెట్ చేయడం ద్వారా కాంగ్రెస్ అధినాయత్వం, రేవంత్ మధ్య దూరం పెంచే ప్రయత్నం జరుగుతోందని విశ్లేషకులు భావిస్తున్నారు. 2028 శాసనసభ ఎన్నికల్లో తెలంగాణలో బీజేపీ ఎదుగుదలకు ఇదే ప్రధాన వ్యూహంగా కనిపిస్తోంది. రేవంత్ స్థాయి నాయకుడు కాంగ్రెస్‌లో మరొకరు లేరనే అంచనాతో, ఆయన బలహీనపడితే పార్టీ మొత్తం దెబ్బతింటుందని బీజేపీ లెక్కలు వేసుకుంటోందని రాజకీయ వర్గాలు చెబుతున్నాయి.

ఈ నేపథ్యంలో ఒక ప్రముఖ రాజకీయ విశ్లేషకుడు న్యూస్18తో మాట్లాడుతూ, ప్రస్తుతం రేవంత్ రెడ్డి పార్టీ మార్చాల్సిన అవసరం లేదని, మారినా ముఖ్యమంత్రి పదవి దక్కే అవకాశాలు లేవని పేర్కొన్నారు. బీజేపీ తన రాజకీయ ప్రయోజనాల కోసం రేవంత్ తమతో సన్నిహితంగా ఉన్నారనే ప్రచారాన్ని విజయవంతంగా నడిపించిందని ఆయన అభిప్రాయపడ్డారు. రేవంత్ కూడా ఈ ప్రచారాన్ని బలంగా ఖండించకపోవడం, కొన్ని సందర్భాల్లో దానిని తనకు అనుకూలంగా మలుచుకునే ప్రయత్నం చేస్తున్నారనే వ్యాఖ్యానాలు వెలువడుతున్నాయి.

ప్రస్తుతం కాంగ్రెస్‌కు తెలంగాణలో ప్రధాన అస్త్రం రేవంత్ రెడ్డేనని, ఎంత ప్రచారం జరిగినా ఆయనను దూరం చేసుకునే పరిస్థితి పార్టీకి లేదని విశ్లేషకులు సూచిస్తున్నారు. భవిష్యత్తులో ఎన్నికల అనంతరం ఏర్పడే రాజకీయ సమీకరణాలు ఎలా ఉన్నా, ప్రస్తుతం జరుగుతున్న ఈ పరిణామాలను అన్ని పార్టీల వ్యూహాత్మక ఎత్తుగడలుగానే చూడాలని వారు అభిప్రాయపడుతున్నారు.