రాయలసీమ న్యూస్, తెలంగాణ డెస్క్: రాష్ట్రంలోని తలసేమియా, సికిల్సెల్ అనీమియా బాధితులందరికీ పింఛన్లు మంజూరు చేయాలని ముఖ్యమంత్రి ఎ. రేవంత్ రెడ్డి ఆదేశించారు. అర్హులైన వారిని వెంటనే గుర్తించి, పింఛన్ల మంజూరు ప్రక్రియను ప్రారంభించాలని సంబంధిత అధికారులకు సూచించారు. ఆగస్టు 15 నుంచి పింఛన్ల పంపిణీ ప్రారంభం కావాలని స్పష్టం చేశారు. బాధిత కుటుంబాలకు ఉపశమనంగా ఈ పింఛన్లు ఉపయోగపడతాయని ముఖ్యమంత్రి పేర్కొన్నారు.
పంచాయతీరాజ్, గ్రామీణాభివృద్ధి శాఖల పనితీరుపై మంత్రి ధనసరి అనసూయ సీతక్కతో కలిసి ముఖ్యమంత్రి సమీక్ష నిర్వహించారు. రాష్ట్రంలోని వితంతువులు, ఒంటరి మహిళలు, నేత, గీత కార్మికులందరికీ సంతృప్తికర స్థాయిలో పింఛన్లు మంజూరు చేసేలా చర్యలు తీసుకోవాలని ఈ సమీక్షలో ఆదేశాలు జారీ చేశారు.
దివ్యాంగులు మరణించినప్పుడు వారి భార్యలకు తక్షణమే పింఛన్లు మంజూరు చేయాలని ముఖ్యమంత్రి స్పష్టం చేశారు. ఈ విషయంలో ఎటువంటి ఆలస్యం జరగకుండా చూడాలని అధికారులను ఆదేశించారు.
మండల స్థాయిలో అన్ని శాఖల పరిధిలో చేపట్టే అభివృద్ధి పనులను MPDOలు పర్యవేక్షించేలా వ్యవస్థను బలోపేతం చేయాలని సూచించారు. ప్రతి 45 రోజులకు ఒకసారి మండల పరిషత్ సమావేశాలు నిర్వహించాలని, ఆ సమావేశాలకు MPs, MLAs, MLCsను ఆహ్వానించాలని తెలిపారు. సర్పంచులు తమ గ్రామ సమస్యలను అధికారుల దృష్టికి తీసుకురావడానికి ఈ సమావేశాలు ఉపయుక్తంగా ఉంటాయని అభిప్రాయపడ్డారు.
రాష్ట్రంలో తారు రహదారి లేని గ్రామం ఉండకూడదని ముఖ్యమంత్రి స్పష్టం చేశారు. ప్రతి గ్రామానికి తారు రహదారి నిర్మించాలని, ప్రతి పంచాయతీకి కార్యాలయ భవనం నిర్మాణం చేపట్టాలని ఆదేశించారు. పంచాయతీల జనాభా ఆధారంగా వాటిని A, B, C వర్గాలుగా విభజించి, అనుగుణంగా భవనాలు నిర్మించాలని సూచించారు. కార్యదర్శులు పారిశుద్ధ్య పనులు సహా ఇతర అంశాలపై పూర్తి బాధ్యత వహించేలా చర్యలు తీసుకోవాలని తెలిపారు.
వివిధ కారణాల వల్ల ఎన్నికలు జరగని పంచాయతీలకు పారిశుద్ధ్య మరియు ఇతర అభివృద్ధి పనులు ఆగిపోకుండా వెంటనే నిధులు విడుదల చేయాలని ముఖ్యమంత్రి ఆదేశించారు.
కోటి మంది మహిళలకు పంపిణీ చేసే చీరలు పూర్తి నాణ్యతతో, ఆకర్షణీయమైన డిజైన్లలో ఉండాలని ముఖ్యమంత్రి సూచించారు. డిజైన్ల రూపకల్పన కోసం NIFT విద్యార్థుల సేవలను వినియోగించుకోవాలని తెలిపారు. ఇందిరమ్మ చీరలకు మహిళల నుంచి మంచి స్పందన లభించిన నేపథ్యంలో, నాణ్యత, రంగుల విషయంలో ఎట్టి పరిస్థితుల్లోనూ రాజీ పడకూడదని స్పష్టం చేశారు.
El Nino పరిస్థితుల దృష్ట్యా తాగునీటి సరఫరా విషయంలో పంచాయతీల్లో తగిన జాగ్రత్తలు తీసుకోవాలని అధికారులకు సూచించారు. గ్రామీణ తాగునీటి సరఫరా, హైదరాబాద్ మెట్రో వాటర్ , నీటి పారుదల శాఖల అధికారులు పరస్పర సమన్వయంతో సమావేశాలు నిర్వహించాలని ఆదేశించారు. తాగునీటి సరఫరాకు తొలి ప్రాధాన్యం ఇవ్వాలని పేర్కొన్నారు.
గ్రామీణ తాగునీటి పథకాల పరిధిలో పనిచేసే సిబ్బందికి ప్రతి నెల అయిదో తేదీ లోపు వేతనాలు చెల్లించాల్సిందిగా ముఖ్యమంత్రి ఆదేశించారు. స్థానిక వనరుల ఆధారంగా తాగునీటి సరఫరా ప్రణాళికలు రూపొందించాలని సూచించారు. ఈ సమీక్ష సమావేశంలో ఉన్నతాధికారులు పాల్గొన్నారు.
