రాయలసీమ న్యూస్, తిరుపతి: తిరుపతి జిల్లా చంద్రగిరి నియోజకవర్గంలో ఎంపీటీసీ, జెడ్పీటీసీ నామినేషన్ల స్వీకరణ ప్రక్రియ కొనసాగుతోంది. జెడ్పీటీసీ నామినేషన్ల స్వీకరణను తిరుపతిలోని డీఆర్‌డీఏ కార్యాలయం సమీపంలో ఏర్పాటు చేసిన కేంద్రంలో నిర్వహిస్తున్నారు. ఎంపీటీసీ నామినేషన్లను ఆయా మండలాల ఎంపీడీవో కార్యాలయాల్లో స్వీకరిస్తున్నారు.
చంద్రగిరి ఎంపీడీవో కార్యాలయంలో ఏర్పాటు చేసిన నామినేషన్ కేంద్రంలో భద్రతా ఏర్పాట్లను తిరుపతి జిల్లా ఎస్పీ ఎల్. సుబ్బరాయుడు పరిశీలించారు. నామినేషన్ల దాఖలు ప్రక్రియ ఎలాంటి అంతరాయం లేకుండా సాగేందుకు పోలీసులు కట్టుదిట్టమైన ఏర్పాట్లు చేశారు.
నామినేషన్లు దాఖలు చేసే అభ్యర్థులు, వారి ప్రతిపాదకులను మాత్రమే నామినేషన్ కేంద్రంలోకి అనుమతిస్తున్నట్లు ఎస్పీ అధికారులు, సిబ్బందికి సూచించారు. అవసరమైన పత్రాలు, విధి విధానాల పరిశీలన కోసం ప్రత్యేక కౌంటర్లను ఏర్పాటు చేసి, అభ్యర్థులను వరుసగా లోపలికి అనుమతిస్తున్నారు.
నామినేషన్ కేంద్రం పరిసరాల్లో బారికేడ్లు ఏర్పాటు చేసి, సాధారణ ప్రజల రాకపోకలకు అంతరాయం కలగకుండా పోలీసులు ట్రాఫిక్ నియంత్రణ చేపట్టారు. మీడియా ప్రతినిధులు కూడా బారికేడ్ల అవతల నుంచే తమ విధులు నిర్వహిస్తూ పోలీసులకు సహకరించాలని ఎస్పీ సూచించారు.
నామినేషన్ల స్వీకరణ సమయంలో ఎలాంటి గందరగోళం, ఉద్రిక్తతలు తలెత్తకుండా అన్ని రాజకీయ పార్టీలు, అభ్యర్థులు, కార్యకర్తలు పరస్పర సహకారంతో వ్యవహరించాలని ఎస్పీ సూచించారు. నామినేషన్ల ప్రక్రియ ప్రశాంతంగా, సజావుగా కొనసాగేందుకు ప్రతి ఒక్కరూ నియమ నిబంధనలు పాటించాలని ఆయన పోలీసు అధికారులకు, సిబ్బందికి ఆదేశాలు జారీ చేసినట్లు సమాచారం.
నామినేషన్ల స్వీకరణ కేంద్రాల్లో సీసీ కెమెరాలు, అదనపు బలగాలను మోహరించి పరిస్థితిని పర్యవేక్షిస్తున్నారు. అభ్యర్థులు, ప్రతిపాదకులు తప్ప ఇతరులు నామినేషన్ కేంద్రాల వద్ద గుంపులుగా నిలవకుండా పోలీసులు అప్రమత్తంగా వ్యవహరిస్తున్నారు. మొత్తం మీద చంద్రగిరి నియోజకవర్గంలో ఎంపీటీసీ, జెడ్పీటీసీ నామినేషన్ల ప్రక్రియ ఇప్పటివరకు ప్రశాంత వాతావరణంలో కొనసాగుతున్నట్లు అధికారులు తెలిపారు.
