రాయలసీమ న్యూస్, తిరుపతి: తిరుమల : తిరుమల తిరుపతి దేవస్థానం పాలకమండలి పదవీకాలం పూర్తయ్యింది. నూతన పాలకమండలి ఏర్పాటయ్యే వరకు దేవస్థానం పరిపాలనలో ఎలాంటి అంతరాయం కలగకుండా చూడాలని ప్రభుత్వం నిర్ణయించింది. ఈ నేపథ్యంలో ముగ్గురు సభ్యులతో కూడిన ప్రత్యేక అధికారుల కమిటీని నియమిస్తూ ఉత్తర్వులు జారీ చేసింది.
ఈ కమిటీలో ముగ్గురు ప్రత్యేక అధికారులు ఉంటారు. కమిటీ ఛైర్మన్‌గా ఐఏఎస్ అధికారి, TTD ఈవో ముద్దాడ రవిచంద్రను ప్రభుత్వం నియమించింది. సభ్యులుగా ఆర్థిక శాఖ ప్రభుత్వ కార్యదర్శి వినయ్ చంద్, రెవెన్యూ (ఎండోమెంట్స్) శాఖ ప్రభుత్వ కార్యదర్శి ఐఏఎస్ కన్నబాబులు నియమితులయ్యారు.
ఆంధ్రప్రదేశ్ చారిటబుల్ అండ్ హిందూ రిలీజియస్ ఇన్‌స్టిట్యూషన్స్ అండ్ ఎండోమెంట్స్ చట్టం, 1987లోని సెక్షన్ 137 ప్రకారం ఈ ప్రత్యేక అధికారుల కమిటీ నియామకం జరిగింది. ఈ నిబంధనల ప్రకారం, పాలకమండలి లేకున్నా దేవస్థానం పరిపాలన కొనసాగేందుకు ప్రభుత్వం ప్రత్యేక అధికారులను నియమించే అధికారం కలిగి ఉంది.
ప్రభుత్వం నియమించిన ఈ ప్రత్యేక అధికారుల కమిటీకి, ప్రస్తుత TTD పాలకమండలికి ఉన్న అన్ని అధికారాలు కల్పించబడుతున్నాయి. పాలకమండలి నిర్వహించాల్సిన అన్ని విధులను ఈ కమిటీ చేపడుతుంది. దేవస్థానం పరిపాలన, ఆర్థిక వ్యవహారాలు, ధార్మిక కార్యక్రమాలు, అభివృద్ధి పనులు తదితర అంశాలపై ఈ కమిటీ నిర్ణయాలు తీసుకుంటుంది.
ఈ ప్రత్యేక అధికారుల కమిటీ పదవీకాలాన్ని ప్రభుత్వం ఒక సంవత్సరం పాటు లేదా నూతన పాలకమండలి ఏర్పాటు అయ్యే వరకు, ఈ రెండింటిలో ఏది ముందుగా జరిగితే అప్పటివరకు కొనసాగేలా నిర్ణయించింది. కొత్త పాలకమండలి నియామకం పూర్తయ్యే వరకు దేవస్థానం పరిపాలనలో ఎలాంటి ఖాళీ ఏర్పడకుండా ఈ కమిటీ బాధ్యతలు నిర్వర్తించనుంది.
