రాయలసీమ న్యూస్, తిరుపతి: తిరుపతి మున్సిపల్ కార్పొరేషన్ ఎన్నికల్లో దొంగ ఓట్ల ఆరోపణలు వెల్లువెత్తుతున్నాయి. 49వ వార్డు సుందరయ్య నగర్ ప్రాంతంలో దొంగ ఓట్లు వేయడానికి వచ్చినట్లు అనుమానిస్తున్న మహిళలను సీపీఎం ఎన్నికల ఏజెంట్లు గుర్తించినట్టు సీపీఎం నగర కార్యదర్శి కె. వేణుగోపాల్ తెలిపారు.
మంగళం ప్రాంతానికి చెందిన కొందరు మహిళలు 49వ వార్డులో ఓట్లు వేయడానికి ప్రయత్నిస్తున్న సమయంలో సీపీఎం జనరల్ ఏజెంట్ నరేంద్రతో పాటు ఇతర ఏజెంట్లు వారిని ఆపి ప్రశ్నించినట్టు ఆయన వివరించారు. వారి వ్యక్తిగత వివరాలు, ఓటర్ వివరాలు అడిగినప్పుడు సరైన సమాధానాలు ఇవ్వలేకపోయారని చెప్పారు.
అధికార పార్టీ నాయకులు ఒక్కొక్క మహిళకు రూ.2,000 చొప్పున నగదు ఇచ్చి మంగళం నుంచి తీసుకువచ్చి 49వ వార్డులో ఓట్లు వేయించేందుకు ప్రయత్నించారని, ఈ విషయాన్ని ఆ మహిళలే వెల్లడించినట్టు కె. వేణుగోపాల్ ఆరోపించారు. ఈ ఘటనను తాము జిల్లా కలెక్టర్, ఎన్నికల అధికార యంత్రాంగం దృష్టికి తీసుకెళ్లినట్టు ఆయన తెలిపారు.
48, 49 వార్డుల్లో అధికార పార్టీ నాయకులు దొంగ ఓట్లు వేయించేందుకు, రిగ్గింగ్‌కు పాల్పడేందుకు తీవ్రంగా ప్రయత్నాలు చేస్తున్నారని, అయితే సీపీఎం కార్యకర్తలు వాటిని అడ్డుకుంటున్నారని వేణుగోపాల్ పేర్కొన్నారు. ఎన్నికల ప్రక్రియను వక్రీకరించే ఈ తరహా చర్యలను సహించలేమని ఆయన స్పష్టం చేశారు.
ఎన్నికల అధికారులు, పోలీసులు తక్షణమే జోక్యం చేసుకుని దొంగ ఓట్లను అరికట్టాలని, ఎన్నికలు స్వేచ్ఛగా, నిష్పక్షపాతంగా, ప్రశాంతంగా జరిగేలా కఠిన చర్యలు తీసుకోవాలని ఆయన డిమాండ్ చేశారు. అధికార యంత్రాంగం నిర్లక్ష్యంగా వ్యవహరిస్తే పరిస్థితులు ఉద్రిక్తంగా మారే అవకాశముందని హెచ్చరించారు.
దొంగ ఓట్ల ఆరోపణలపై ఎన్నికల అధికారులు, పోలీసులు ఏ చర్యలు తీసుకుంటారన్న దానిపై స్థానికంగా ఆసక్తి నెలకొంది. తిరుపతి మున్సిపల్ కార్పొరేషన్ ఎన్నికల్లో 48, 49 వార్డులపై ప్రత్యేక దృష్టి పెట్టాలని సీపీఎం నాయకత్వం కోరుతోంది.
