రాయలసీమ న్యూస్, తిరుపతి: తిరుపతి నగరంలో మేస్త్రీపై జరిగిన దారుణ హత్యాయత్నం కేసును పోలీసులు ఛేదించారు. మద్యం సేవిస్తున్న సమయంలో స్నాక్స్ తెచ్చుకునేందుకు బైక్ ఇవ్వనందుకు ఇద్దరు యువకులు పాశవికంగా దాడి చేసిన ఘటనలో ముగ్గురిని అరెస్టు చేసినట్లు అదనపు ఎస్పీ రవి మనోహరాచారి తెలిపారు. ఓటేరు పరిసరాల్లో జరిగిన ఈ కేసు వివరాలను మంగళవారం మీడియాకు వెల్లడించారు.
కర్నూలు జిల్లా ఆదోని మండలం మదిరె గ్రామానికి చెందిన దాసరి శ్రీనివాసులు (36) ఏడేళ్లుగా తిరుపతిలో నివసిస్తూ మేస్త్రీ పనులు చేస్తూ జీవిస్తున్నారు. ఈ నెల 9వ తేదీ రాత్రి ఇంటి నుంచి బైక్పై బయటకు వెళ్లిన అనంతరం ఆయనపై దాడి జరిగినట్లు దర్యాప్తులో బయటపడింది. జాతీయ రహదారి పక్కన ఉన్న ఖాళీ స్థలంలో శ్రీనివాసులు ఒంటరిగా కూర్చొని మద్యం సేవిస్తున్న సమయంలో ఈ ఘటన చోటుచేసుకుంది.
పోలీసుల సమాచారం ప్రకారం, అదే సమయంలో ఓటేరు ప్రాంతానికి చెందిన ఉప్పుసెట్టి ఆకాష్ (24), శ్రీనివాసపురానికి చెందిన రాఘవేంద్ర (20) మద్యం తీసుకుని అక్కడికి చేరుకున్నారు. తినుబండారాలు తెచ్చుకునేందుకు శ్రీనివాసులు వద్ద ఉన్న బైక్ను ఇవ్వాలని ఇద్దరూ కోరగా, ఆయన నిరాకరించినట్లు విచారణలో వెల్లడైంది.
దీంతో మత్తులో ఉన్న ఆ ఇద్దరూ ఆగ్రహానికి గురై బీరు సీసాలతో శ్రీనివాసులు తలపై కొట్టినట్లు పోలీసులు తెలిపారు. అనంతరం సమీపంలో ఉన్న బండరాయితో ఆయన ముఖంపై మోదుతూ దాడి కొనసాగించినట్లు దర్యాప్తులో తేలింది. ఈ సమయంలో దాడి దృశ్యాలను మొబైల్ ఫోన్లో వీడియోగా చిత్రీకరించినట్లు కూడా విచారణలో బయటపడింది.
దాడి అనంతరం రక్తగాయాలతో మూలుగుతున్న శ్రీనివాసులకు ఆ వీడియోను చూపించే ప్రయత్నం చేసినట్లు పోలీసులు పేర్కొన్నారు. జరిగిన ఘటనను యోగిమల్లవరం గ్రామానికి చెందిన జయవేలు రాజ (20)కు ఇద్దరు నిందితులు వివరించగా, ఆయన ఆధారాలు నాశనం చేసేందుకు సహకరించినట్లు దర్యాప్తులో వెల్లడైంది.
సీసీ కెమెరాల దృశ్యాలు, సాంకేతిక ఆధారాలను విశ్లేషించిన పోలీసులు నిందితుల గుర్తింపును పూర్తి చేశారు. అనంతరం సోమవారం రాత్రి ఆర్సీపురం కూడలిలో ఉప్పుసెట్టి ఆకాష్, రాఘవేంద్ర, జయవేలు రాజలను అరెస్టు చేసినట్లు అదనపు ఎస్పీ రవి మనోహరాచారి తెలిపారు.
నిందితుల నుంచి ద్విచక్ర వాహనం, మూడు చరవాణులను స్వాధీనం చేసుకున్నట్లు పోలీసులు వెల్లడించారు. కేసు నమోదు చేసి, తదుపరి విచారణ కొనసాగిస్తున్నట్లు తెలిపారు.
