రాయలసీమ న్యూస్, వై.యస్.ఆర్: ప్రొద్దుటూరు మున్సిపల్ చైర్మన్ పదవి కేటాయింపు అంశం స్థానిక రాజకీయాల్లో తీవ్ర ఉద్రిక్తతకు దారితీసింది. ఈ పదవిని ఎవరికీ కేటాయించాలనే విషయంపై నాయకుల మధ్య విభేదాలు బహిరంగంగా వ్యక్తమవుతున్నాయి. ముఖ్యంగా బీసీలకు అన్యాయం జరుగుతోందనే ఆరోపణలతో ఈ వివాదం మరింత వేడెక్కింది.
ప్రొద్దుటూరు మాజీ ఎమ్మెల్యే, వైసీపీ నాయకుడు రాచమల్లు శివప్రసాద్ రెడ్డి ఈ అంశంపై ఎమ్మెల్యే నంద్యాల వరదరాజులరెడ్డి వైఖరిని తీవ్రంగా విమర్శించారు. బీసీలకు తీవ్ర రాజకీయ అన్యాయం జరిగిందని ఆయన ఆరోపిస్తున్నారు. సోమవారం తన నివాసంలో ఏర్పాటు చేసిన విలేకరుల సమావేశంలో రాచమల్లు శివప్రసాద్ రెడ్డి ఈ విషయంపై స్పందించారు.
మున్సిపల్ చైర్మన్ స్థానాన్ని ఓసీలకు కేటాయించాలంటూ మున్సిపల్ శాఖ మంత్రి నారాయణకు ఎమ్మెల్యే నంద్యాల వరదరాజులరెడ్డి లేఖ రాయడంపై రాచమల్లు శివప్రసాద్ రెడ్డి ఆగ్రహం వ్యక్తం చేశారు. బీసీల నుంచి సమర్థవంతమైన నాయకత్వం రాదనే అభిప్రాయంతో లేఖ రాయడం బీసీల ఆత్మగౌరవాన్ని దెబ్బతీసే చర్యగా ఆయన అభివర్ణించారు.
కేవలం తన సోదరుడు నంద్యాల రాఘవరెడ్డిని మున్సిపల్ చైర్మన్ చేయాలనే ఉద్దేశంతో రిజర్వేషన్ల మార్పు నుంచి ఎన్నికల ప్రక్రియ వరకు అన్నింటినీ ఎమ్మెల్యే నంద్యాల వరదరాజులరెడ్డి తనకు అనుకూలంగా మలుచుకున్నారని రాచమల్లు శివప్రసాద్ రెడ్డి ఆరోపించారు. ప్రొద్దుటూరులో ఓటు హక్కు లేని నంద్యాల రాఘవరెడ్డికి హైకోర్టు లంచ్ మోషన్ ద్వారా ఓటు నమోదు చేయించడంపై జిల్లా కలెక్టర్ స్పష్టత ఇవ్వాలని ఆయన డిమాండ్ చేశారు.
మున్సిపల్ ఎన్నికల నామినేషన్ల సమయంలో ప్రత్యర్థులను అడ్డుకోవడం, పేపర్లు చించివేయడం, ఉపసంహరణ సమయాల్లో ఒత్తిళ్లు తీసుకురావడం ద్వారా సాధించిన ఏకగ్రీవాలు ప్రజా మద్దతు ప్రతిబింబం కావని రాచమల్లు శివప్రసాద్ రెడ్డి వ్యాఖ్యానించారు. ఈ విధంగా ఏర్పడిన ఏకగ్రీవ పాలకవర్గానికి ప్రజల నిజమైన ఆశీర్వాదం లేదని ఆయన అభిప్రాయపడ్డారు.
కొత్త పాలకవర్గం అధికారంలోకి వచ్చిన తర్వాత ప్రొద్దుటూరులో ఎగ్జిబిషన్ ఆదాయం, బొల్లవరం ప్లాట్ల విక్రయాల్లో అక్రమాలు జరిగే అవకాశం ఉందని రాచమల్లు శివప్రసాద్ రెడ్డి ఆందోళన వ్యక్తం చేశారు. ప్రజా ఆస్తుల పరిరక్షణ కోసం వైసీపీ పోరాటం కొనసాగిస్తుందని ఆయన స్పష్టం చేశారు.
