రాయలసీమ న్యూస్, వై.యస్.ఆర్: చాపాడు: జాతీయ అయోడిన్ లోప రుగ్మతల నివారణ కార్యక్రమంలో భాగంగా చాపాడు మండలంలోని నక్కలదిన్నె ప్రాథమిక ఆరోగ్య కేంద్రం పరిధిలోని జడ్పీ ఉన్నత పాఠశాలల్లో 9, 10వ తరగతి విద్యార్థులకు వ్యాసరచన, పోస్టర్ ప్రజెంటేషన్ పోటీలు నిర్వహించారు. నక్కలదిన్నె పిహెచ్‌సి ఆధ్వర్యంలో జరిగిన ఈ కార్యక్రమంలో విద్యార్థుల్లో అయోడిన్ ప్రాముఖ్యతపై అవగాహన పెంపు లక్ష్యంగా చర్యలు చేపట్టారు.
జిల్లా వైద్య ఆరోగ్య శాఖాధికారుల ఆదేశాల మేరకు అక్టోబర్ 21 నుంచి నవంబర్ 5 వరకు నిర్వహిస్తున్న ప్రత్యేక అవగాహన కార్యక్రమాల్లో భాగంగా లక్ష్మీపేట, చిన్నగురువలూరు, నరహరిపురం, అయ్యవారిపల్లి తదితర జిల్లా పరిషత్ ఉన్నత పాఠశాలల్లో ఈ పోటీలు నిర్వహించినట్లు వైద్యాధికారి డాక్టర్ పి. ఓబులేసు తెలిపారు.
వ్యాసరచన పోటీల్లో ప్రథమ బహుమతులు సాధించిన విద్యార్థులుగా నాగలక్ష్మిప్రసన్న, వైష్ణవి, జాస్మిని, జీవన పేర్లు ప్రకటించారు. ద్వితీయ బహుమతులు పొందిన విద్యార్థులుగా చంద్రకళ, గాయత్రి, ఉషాశ్రీ, సాధియలను ఎంపిక చేసినట్లు ఆయన వివరించారు. ప్రతి పాఠశాల నుంచి ప్రతిభ కనబరిచిన విద్యార్థులకు ప్రథమ, ద్వితీయ బహుమతులు అందజేయనున్నట్లు తెలిపారు.
అయోడిన్ లోపం వల్ల కలిగే గాయిటర్, మానసిక ఎదుగుదల లోపాలు, శారీరక ఎదుగుదల మందగింపు, ఇతర ఆరోగ్య సమస్యలపై విద్యార్థులకు అవగాహన కల్పించారు. రోజువారీ ఆహారంలో అయోడిన్ కలిగిన ఉప్పు వినియోగం ఎంత ముఖ్యమో వివరించారు. అయోడిన్ లోపం నివారణకు కుటుంబ స్థాయిలో తీసుకోవాల్సిన జాగ్రత్తలపై కూడా విద్యార్థులకు సూచనలు ఇచ్చారు.
విద్యార్థులు రూపొందించిన పోస్టర్లు, వ్యాసాలు కార్యక్రమానికి ఆకర్షణగా నిలిచాయి. అయోడిన్ ప్రాముఖ్యత, లోపం వల్ల కలిగే దుష్పరిణామాలను సులభంగా అర్థమయ్యే విధంగా చిత్రాలు, నినాదాల రూపంలో విద్యార్థులు ప్రతిబింబించారు. విజేతలకు ప్రశంసాపత్రాలు అందజేసినట్లు డాక్టర్ పి. ఓబులేసు తెలిపారు.
ఈ కార్యక్రమంలో నక్కలదిన్నె ప్రాథమిక ఆరోగ్య కేంద్రం మెడికల్ ఆఫీసర్ డాక్టర్ పి. ఓబులేసు, ఆరోగ్య విస్తరణ అధికారి యం. రాఘవయ్య, డిప్యూటీ హెచ్ ఈ ఓ జయప్రకాశ్, ఆరోగ్య పర్యవేక్షకులు, సంబంధిత సబ్‌సెంటర్ల వైద్య సిబ్బంది, ఆశా కార్యకర్తలు, ఉపాధ్యాయులు, విద్యార్థులు పాల్గొన్నారు.
