రాయలసీమ న్యూస్, నంద్యాల: శ్రీశైలేం:- నాగర్ కర్నూల్ జిల్లా ఏఐటీయూసీ మూడో మహాసభలను జులై 26న శ్రీశైలం ప్రాజెక్టు సుండీపెంటలో నిర్వహించేందుకు ఏర్పాట్లు జరుగుతున్నాయి. ఈ మహాసభలను విజయవంతం చేయాలని ఏఐటీయూసీ నాయకత్వం కార్మిక వర్గానికి పిలుపునిస్తోంది. ఆర్టిజన్ల క్రమబద్ధీకరణ, కేంద్ర ప్రభుత్వం తీసుకొచ్చిన నాలుగు నూతన లేబర్ కోడ్‌ల రద్దు వంటి అంశాలను మహాసభలో ప్రధానంగా ప్రస్తావించనున్నారు.

ఏఐటీయూసీ నాగర్ కర్నూల్ జిల్లా 3వ మహాసభల కరపత్రాలను ఏఐటీయూసీ అనుబంధ యూనియన్ H-64 TG, జెన్కో ఆధ్వర్యంలో విడుదల చేశారు. ఈ కార్యక్రమంలో ముఖ్య అతిథిగా ఏఐటీయూసీ నాగర్ కర్నూల్ జిల్లా ప్రధాన కార్యదర్శి మారేడు శివశంకర్ పాల్గొన్నారు. హలో కార్మిక చలో తాడూర్ పేరుతో తాడూరు మండల కేంద్రంలో జరగనున్న మహా ప్రదర్శనకు కార్మికులు భారీ సంఖ్యలో హాజరుకావాలని ఆయన పిలుపునిచ్చారు.

మారేడు శివశంకర్ మాట్లాడుతూ, హలో కార్మిక చలో తాడూర్ కార్యక్రమం ద్వారా H-64 ఆర్టిజన్స్ కార్మికులను శాశ్వత ఉద్యోగాల్లోకి తీసుకోవాలని, కేంద్ర ప్రభుత్వం అమలు చేయబోతున్న నాలుగు నూతన లేబర్ కోడ్‌లకు వ్యతిరేకంగా కార్మిక లోకం పోరాటాలకు సిద్ధం కావాలని కోరారు. ఆర్టిజన్సీ కార్మికులను పర్మినెంట్ చేయడం, ఆర్టిజన్స్ కార్మికులకు APSEB సర్వీస్ రూల్స్ అమలు చేయడం, ఎంప్లాయిస్‌కు PRC ఇవ్వడం, Jencoను ప్రైవేటు పరంగా మార్చే ఆలోచనను విరమించుకోవడం వంటి డిమాండ్లను ఆయన ముందుకు తెచ్చారు.

కార్మిక ఉద్యమ చరిత్రను ప్రస్తావిస్తూ నాయకులు, 1886లో అమెరికా Chicago నగరంలో 8 గంటల పని, 8 గంటల విశ్రాంతి, 8 గంటల వినోదం కోసం సాగిన పోరాటాలు, ఉద్యమాల ఫలితంగా చారిత్రాత్మక కార్మిక చట్టాలు అమలులోకి వచ్చాయని గుర్తుచేశారు. భారత స్వాతంత్ర్య పోరాట కాలంలో లాల లజపత్ రాయి , బల్ గంగాధర్ తిలక్ , సుభాష్ చంద్ర బోస్ , జవహర్లాల్ నెహ్రు , V.V. గిరి , S.A. డాంగే వంటి మహానీయులు కార్మికుల హక్కుల కోసం, దేశ స్వాతంత్ర్యం కోసం పోరాడి, ఏఐటీయూసీ కార్మిక ఉద్యమాన్ని నడిపించారని పేర్కొన్నారు.

దశాబ్దాల పాటు కార్మికులు పోరాడి సాధించుకున్న 44 శ్రమ కార్మిక చట్టాలను రద్దు చేసి, కార్పొరేట్ శక్తులకు అనుకూలంగా కేంద్ర ప్రభుత్వం తీసుకొచ్చిన నాలుగు నూతన లేబర్ కోడ్‌లను ఏఐటీయూసీ తీవ్రంగా వ్యతిరేకిస్తోంది. 8 గంటల పని దినాన్ని 12 గంటలకు పెంచే యాజమాన్యాల ప్రజా వ్యతిరేక విధానాలను ఈ కోడ్‌లు ప్రోత్సహిస్తున్నాయని, దీనిపై కార్మిక లోకం ఏకతాటిపైకి వచ్చి పోరాడాల్సిన అవసరం ఉందని నాయకులు అభిప్రాయపడ్డారు.

కేంద్ర, రాష్ట్ర ప్రభుత్వాల కార్మిక వ్యతిరేక విధానాలు, జిల్లా వ్యాప్తంగా కార్మిక వర్గం ఎదుర్కొంటున్న సమస్యలపై మహాసభలో విస్తృతంగా చర్చించి, భవిష్యత్తు కార్యాచరణను రూపొందించనున్నారు. తాడూరు మండల కేంద్రంలో జరగనున్న మహా ప్రదర్శనకు కార్మికులంతా భారీ సంఖ్యలో తరలివచ్చి మహాసభలను జయప్రదం చేయాలని మారేడు శివశంకర్ పిలుపునిచ్చారు.

ఈ కార్యక్రమంలో ఏఐటీయూసీ H-64 కార్మిక యూనియన్ శ్రీశైలం ప్రాజెక్టు అధ్యక్షుడు రామయ్య, కార్యదర్శి B. లక్ష్మయ్య, కోశాధికారి రామసుబ్బయ్య, నాయకులు కుమార్, శ్రీను, మబుల్ మల్లికార్జున్, మోష, అబ్దుల్ ఖదీర్ , మహిళా కార్మికులు గౌరీ, చంద్రకళ తదితరులు పాల్గొన్నారు.