రాయలసీమ న్యూస్, తిరుపతి:
తిరుపతి నగరంలోని హోటళ్లలో ఆరోగ్యకరమైన ఆహార పదార్థాలు అందించకపోతే కఠిన చర్యలు తప్పవని నగరపాలక సంస్థ హెల్త్ ఆఫీసర్ డాక్టర్ యువ అన్వేష్ హెచ్చరించారు. నగర ప్రజల ఆరోగ్య రక్షణ దృష్ట్యా హోటళ్లలో పారిశుధ్య పరిస్థితులపై మునిసిపల్ అధికారులు ఆకస్మిక తనిఖీలు చేపట్టారు.
తిరుపతి నగరపాలక సంస్థ కమిషనర్ ఎం. జయకృష్ణ ఐఏఎస్ ఆదేశాల మేరకు శనివారం హెల్త్ ఆఫీసర్ డాక్టర్ యువ అన్వేష్, వెటర్నరీ ఆఫీసర్ గుణశేఖర్ కలిసి నగరంలోని పలు హోటళ్లలో ఆకస్మిక తనిఖీలు నిర్వహించారు. ఈ తనిఖీల్లో ఆహార పదార్థాల నాణ్యత, నిల్వ విధానం, వంటశాల పరిశుభ్రత, మురుగు నీటి పారుదల వంటి అంశాలను పరిశీలించారు.
తనిఖీలలో భాగంగా అధికారులు ముందుగా కపిల తీర్థం వద్ద ఉన్న A 2B హోటల్ను పరిశీలించారు. అక్కడ సరైన పారిశుధ్య నిర్వహణ లేకపోవడం అధికారులు గమనించారు. హోటల్ ప్రాంగణంలోని కాలువల్లో విచ్చలవిడిగా వ్యర్థాలను వేయడం వల్ల మురుగు నీటి ప్రవాహానికి ఆటంకం కలుగుతోందని, దాంతో దుర్వాసన వ్యాపిస్తున్నదని గుర్తించారు. హోటల్ నుండి వెలువడుతున్న వ్యర్థాల కారణంగా మునిసిపల్ డ్రైనేజీ వ్యవస్థ బ్లాక్ అవుతున్నట్లు కూడా అధికారులు గుర్తించారు.
అలాగే ఆహార పదార్థాలు నిల్వ ఉంచే ఫ్రిజ్ తుప్పు పట్టి ఉండడం, పరిశుభ్రత లోపించడం వంటి అంశాలను హెల్త్ ఆఫీసర్ యువ అన్వేష్, వెటర్నరీ ఆఫీసర్ గుణశేఖర్ ప్రత్యేకంగా నమోదు చేశారు. ఈ పరిస్థితులు ప్రజా ఆరోగ్యానికి ప్రమాదకరమని అధికారులు అభిప్రాయపడ్డారు.
మునిసిపల్ కార్పొరేషన్ చట్టం 1955 నిబంధనలను అనుసరించి సంబంధిత హోటల్పై తగిన చర్యలు తీసుకునే ప్రక్రియను ప్రారంభించినట్లు అధికారులు తెలిపారు. నిబంధనలు ఉల్లంఘించే ఏ హోటల్పైనా ఇలాంటి కఠిన చర్యలు తప్పవని స్పష్టం చేశారు.
నగరంలో పనిచేస్తున్న అన్ని హోటల్ యజమానులు పారిశుధ్య నిబంధనలను కచ్చితంగా పాటించాలని, ఆహార పదార్థాల నాణ్యతపై ఎట్టి పరిస్థితుల్లోనూ రాజీ పడకూడదని మునిసిపల్ అధికారులు హెచ్చరిక జారీ చేసినట్లు సమాచారం. ప్రజల ఆరోగ్యాన్ని దృష్టిలో పెట్టుకుని ఇలాంటి తనిఖీలు నిరంతరం కొనసాగుతాయని అధికారులు సూచించారు.
