రాయలసీమ న్యూస్, తిరుపతి: తిరుపతి జిల్లా పోలీస్ శాఖ ఆధ్వర్యంలో విద్యార్థినుల భద్రతను లక్ష్యంగా పెట్టుకుని మహిళా పోలీసుల సమన్వయంతో విస్తృత అవగాహన కార్యక్రమం నిర్వహించారు. తిరుపతిలోని శ్రీ పద్మావతి పాలిటెక్నిక్ మహిళా కళాశాలలో ఈ అవగాహన సదస్సు శుక్రవారం జరిగింది.
తిరుపతి జిల్లా ఎస్పీ శ్రీ ఎల్. సుబ్బరాయుడు, ఐపీఎస్ ఆదేశాల మేరకు తిరుపతి మహిళా పోలీస్ స్టేషన్ అదనపు ఎస్పీ శ్రీమతి ఎం. శ్రీలత ఆధ్వర్యంలో, మహిళా పోలీస్ స్టేషన్ ఇన్స్పెక్టర్ శ్రీ ఎం. థమీమ్ అహ్మద్ ఈ కార్యక్రమాన్ని నిర్వహించారు. విద్యార్థినుల కోసం ప్రత్యేకంగా ఏర్పాటు చేసిన ఈ సదస్సులో మహిళలు, చిన్నారులపై జరుగుతున్న వివిధ రకాల నేరాలపై సమగ్ర అవగాహన కల్పించారు.
కార్యక్రమంలో బాల్య వివాహాలు, చైల్డ్ పోర్నోగ్రఫీ, సైబర్ నేరాలు, సోషల్ మీడియా దుష్ప్రభావాలు, అపరిచితులు మరియు చెడు స్నేహితుల వల్ల ఎదురయ్యే ప్రమాదాలు, అధికంగా సెల్ఫోన్ వినియోగం వల్ల కలిగే అనర్థాలు వంటి అంశాలను పోలీసు అధికారులు వివరించారు. విద్యార్థినులు రోజువారీ జీవితంలో ఎదుర్కొనే పరిస్థితులను ఉదాహరణలతో చర్చిస్తూ, వాటిని ఎలా ఎదుర్కోవాలో సూచనలు అందించారు.
అదనంగా మహిళల భద్రత కోసం అందుబాటులో ఉన్న సేఫ్టీ యాప్స్, డయల్-112, మహిళల హెల్ప్లైన్-181, చైల్డ్ హెల్ప్లైన్-1098, సైబర్ హెల్ప్లైన్-1930 వంటి అత్యవసర సేవల గురించి విద్యార్థినులకు తెలియజేశారు. ఏవైనా వేధింపులు, సైబర్ మోసాలు లేదా అనుమానాస్పద పరిస్థితులు ఎదురైనప్పుడు భయపడకుండా వెంటనే పోలీసులను సంప్రదించాలని అధికారులు సూచించారు.
ఈ సందర్భంగా అదనపు ఎస్పీ శ్రీమతి ఎం. శ్రీలత విద్యార్థినులను ఉద్దేశించి మాట్లాడుతూ, తమ జీవిత లక్ష్యాలపై దృష్టి సారించి క్రమశిక్షణతో చదువుకుంటూ ఉన్నత భవిష్యత్తును నిర్మించుకోవాలని సూచించారు. సైబర్ ప్రపంచంలో అప్రమత్తంగా ఉండటం, సోషల్ మీడియాను బాధ్యతాయుతంగా వినియోగించడం ద్వారా తమను తాము రక్షించుకోవచ్చని ఆమె పేర్కొన్నారు.
ఈ అవగాహన కార్యక్రమంలో సుమారు 300 మంది విద్యార్థినులు, అధ్యాపకులు, కళాశాల సిబ్బంది పాల్గొన్నారు. మహిళలు, బాలికలు మరియు విద్యార్థినుల భద్రతపై అవగాహన పెంపొందించేందుకు తిరుపతి జిల్లా పోలీస్ శాఖ తరఫున ఇలాంటి కార్యక్రమాలను నిరంతరం నిర్వహిస్తున్నట్లు అధికారులు తెలిపారు.
