రాయలసీమ న్యూస్, వై.యస్.ఆర్: ప్రొద్దుటూరు : ప్రొద్దుటూరు పట్టణంలోని బకరాపేటకు చెందిన మంగళ బాలమ్మ (90) అనే వయోవృద్ధ ఓటరు కదలలేని స్థితిలో మంచానికి పరిమితమై ఉండటంతో, ఆమె ఇంటివద్దకే ఎన్నికల హియరింగ్ నిర్వహించిన ఘటన చోటుచేసుకుంది. స్పెషల్ ఇంటెన్షవ్ రెవిజన్ సందర్భంగా ఓటరు పేరులో పొరపాటు ఉన్నందున హియరింగ్కు హాజరుకావాలని పురపాలక సంఘం కార్యాలయం నుంచి నోటీసులు జారీ చేసినట్లు అధికారులు తెలిపారు.
పురపాలక సంఘం కమిషనర్ తూతిక శ్రీనివాస విశ్వనాధ్, స్పెషల్ ఇంటెన్షవ్ రెవిజన్లో భాగంగా ఓటరు వివరాల పరిశీలన కోసం నోటీసులు పంపిన వారిలో మంగళ బాలమ్మ కూడా ఉన్నారని పేర్కొన్నారు. అయితే ఆమె అనారోగ్యంతో మంచానికి పరిమితమై ఉండటంతో, హియరింగ్కు హాజరుకాలేకపోయారని కుటుంబ సభ్యుల ద్వారా కమిషనర్కు సమాచారం అందింది.
దీంతో కమిషనర్ తూతిక శ్రీనివాస విశ్వనాధ్ స్వయంగా 2వ వార్డు, బకరాపేటలోని మంగళ బాలమ్మ నివాసానికి వెళ్లి, ఆమె ఓటరు వివరాలను ఇంటివద్దే నమోదు చేశారు. మంచానికి పరిమితమైన ఓటర్లకు కూడా ఓటు హక్కు వినియోగంలో ఎలాంటి ఇబ్బంది కలగకుండా చూడాలనే ఉద్దేశంతో ఈ చర్య తీసుకున్నట్లు పురపాలక సంఘం వర్గాలు వెల్లడించాయి.
ఈ సందర్భంగా కమిషనర్ తూతిక శ్రీనివాస విశ్వనాధ్ ప్రతి ఓటరు తమకు ముఖ్యమని, అనారోగ్యంతో హియరింగ్కు హాజరుకాలేని మంచానికి పరిమితమైన ఓటర్ల వివరాలను అధికారులు స్వయంగా వారి ఇళ్లకు వెళ్లి నమోదు చేస్తారని స్పష్టం చేశారు. ఎన్నికల జాబితాలో తప్పులు సరిదిద్దే ప్రక్రియలో ఎవరూ వెనుకబడకుండా ఉండేలా చర్యలు తీసుకుంటున్నామని ఆయన పేర్కొన్నారు.
మంగళ బాలమ్మ ఇంటివద్ద నిర్వహించిన ఈ హియరింగ్కు కమిషనర్తో పాటు బూత్ లెవెల్ అధికారి దీప్తి కూడా హాజరయ్యారు. ఓటరు హక్కు పరిరక్షణలో భాగంగా పురపాలక సంఘం అధికారులు చూపిన ఈ స్పందన స్థానికంగా చర్చనీయాంశంగా మారింది.
