రాయలసీమ న్యూస్, వై.యస్.ఆర్: పులివెందుల: మండలంలోని ఈ.కొత్తపల్లి గ్రామంలో అంత్రం, మంత్రం పేరుతో ఓ వ్యక్తిని మోసం చేసి బంగారు ఉంగరం చోరీ చేసిన ఘటన స్థానికంగా కలకలం రేపింది. ఆరోగ్య సమస్యలు తగ్గుతాయని నమ్మబలికి మత్తుమందు ఇచ్చి, సుమారు రూ.80 వేల విలువైన ఉంగరాన్ని అపహరించినట్లు సమాచారం.
పోలీసులు, గ్రామస్తుల కథనం ప్రకారం… ఈ.కొత్తపల్లి గ్రామానికి చెందిన ఆలీపు ఇంటి వద్దకు ఓ ఫకీరు వచ్చాడు. అంత్రం వేస్తే ఇంట్లో ఉన్నవారి ఆరోగ్య సమస్యలు తగ్గుతాయని, శుభం జరుగుతుందని ఆలీపు కుటుంబ సభ్యులను నమ్మబలికినట్లు తెలుస్తోంది. అతని మాటలు నమ్మిన కుటుంబ సభ్యులు అంత్రం చేయించేందుకు ఒప్పుకున్నారని స్థానికులు చెబుతున్నారు.
ఈ క్రమంలో ఫకీరు ఆలీపుకు మత్తుమందు ఇచ్చినట్లు గ్రామస్తులు పేర్కొన్నారు. మత్తులో ఉన్న సమయంలో ఆలీపు చేతిలో ఉన్న బంగారు ఉంగరాన్ని తీసుకెళ్లినట్లు ఆరోపణలు ఉన్నాయి. కొద్దిసేపటికి ఆలీపు స్పృహకు వచ్చాక చేతిలో ఉన్న ఉంగరం కనిపించకపోవడంతో అనుమానం వచ్చి కుటుంబ సభ్యులకు విషయం తెలియజేశాడు.
ఆలీపు వివరణతో అప్రమత్తమైన కుటుంబ సభ్యులు, గ్రామస్తులు కలిసి ఫకీరును వెతికి పట్టుకున్నారు. అతన్ని గ్రామంలోనే నిలువరించి, అనంతరం పులివెందుల పోలీస్ స్టేషన్కు తీసుకెళ్లి అప్పగించారు. ఫకీరు వద్ద నుంచి ఉంగరం దొరికిందా లేదా అన్న వివరాలు ఇంకా బయటకు రాలేదు.
ఫిర్యాదు ఆధారంగా పోలీసులు కేసు నమోదు చేసి విచారణ ప్రారంభించారు. ఫకీరు ఎక్కడి నుంచి వచ్చాడు, ఇలాంటి ఘటనలు మరెక్కడైనా చేశాడా అనే కోణంలో దర్యాప్తు కొనసాగిస్తున్నట్లు పోలీసు వర్గాలు తెలిపాయి. ఆలీపు ఆరోగ్య పరిస్థితి ప్రస్తుతం స్థిరంగా ఉన్నట్లు కుటుంబ సభ్యులు పేర్కొన్నారు.
గ్రామంలో అంత్రం, మంత్రం పేరుతో ప్రజలను మోసం చేసే వ్యక్తులపై జాగ్రత్తగా ఉండాలని, ఏవైనా అనుమానాస్పద వ్యక్తులు కనిపిస్తే వెంటనే పోలీసులకు సమాచారం ఇవ్వాలని స్థానికులు పరస్పరం చర్చించుకుంటున్నారు. ఈ ఘటనతో గ్రామంలో భయం, ఆగ్రహం వ్యక్తమవుతోంది.
