రాయలసీమ న్యూస్, అన్నమయ్య: రాయచోటి: విద్యార్థుల అభ్యసన ఫలితాలను మెరుగుపరిచేందుకు ఉపాధ్యాయులు నిరంతరం తమ బోధనా నైపుణ్యాలను అభివృద్ధి చేసుకోవాలని డైట్ ఇన్చార్జి ప్రిన్సిపల్ మడితాటి నరసింహారెడ్డి సూచించారు. 2026–27 విద్యా సంవత్సరానికి సంబంధించిన స్కూల్ కాంప్లెక్స్ సమావేశాలు శనివారం ప్రారంభమైన సందర్భంగా రాయచోటిలోని గర్ల్స్ హైస్కూల్, డైట్లో నిర్వహిస్తున్న కాంప్లెక్స్ సమావేశాలను ఆయన పరిశీలించారు.
ఈ సందర్భంగా ఉపాధ్యాయులతో మాట్లాడి సమావేశాల్లో చర్చిస్తున్న అంశాలను నరసింహారెడ్డి తెలుసుకున్నారు. ప్రస్తుత విద్యా సంవత్సరంలో స్కూల్ కాంప్లెక్స్ సమావేశాలను పూర్తి రోజు నిర్వహిస్తున్నట్లు ఆయన వెల్లడించారు. ఉదయం 9 గంటల నుంచి సాయంత్రం 4 గంటల వరకు సమావేశాలు కొనసాగుతున్నాయని తెలిపారు.
స్కూల్ కాంప్లెక్స్ సమావేశాల్లో ఉపాధ్యాయుల సబ్జెక్టు పరిజ్ఞానాన్ని బలోపేతం చేయడం, నూతన బోధనా పద్ధతులపై అవగాహన పెంపొందించడం, సమర్థవంతమైన పాఠ్య ప్రణాళిక రూపొందించడం, బోధన–అభ్యసన సామగ్రి తయారీ తదితర అంశాలపై ప్రత్యేకంగా చర్చిస్తున్నట్లు నరసింహారెడ్డి వివరించారు. ఈ సమావేశాలను ఉపాధ్యాయుల వృత్తిపరమైన అభివృద్ధికి ఉపయోగపడే వేదికలుగా సద్వినియోగం చేసుకోవాలని ఆయన సూచించారు.
పాఠ్యపుస్తకాల్లోని క్లిష్టమైన భావనలను గుర్తించి, వాటిని విద్యార్థులకు సులభంగా అర్థమయ్యేలా బోధించే విధానాలపై ఉపాధ్యాయులు పరస్పరం చర్చించుకోవాలని నరసింహారెడ్డి అభిప్రాయపడ్డారు. బోధనలో నూతన పద్ధతులు, సాంకేతికత, సృజనాత్మకతను వినియోగించడం ద్వారా విద్యార్థుల్లో ఆసక్తి, చురుకుదనం పెంపొందించాల్సిన అవసరాన్ని ఆయన సూచించారు.
విద్యార్థుల అభ్యసన స్థాయిని ఎప్పటికప్పుడు అంచనా వేసి, అవసరమైన చోట పునర్బోధన చేపట్టడం ద్వారా అభ్యసన ఫలితాలను మరింత మెరుగుపరచవచ్చని నరసింహారెడ్డి పేర్కొన్నారు. ఉపాధ్యాయులు తమ అనుభవాలను పంచుకోవడంతో పాటు ఉత్తమ బోధనా పద్ధతులను పరస్పరం నేర్చుకునేలా స్కూల్ కాంప్లెక్స్ సమావేశాలు దోహదపడాలని ఆయన ఆకాంక్షించారు.
ఈ కార్యక్రమంలో డైట్ అధ్యాపకులు గిరిబాబు యాదవ్, మోహన్ నాయక్, క్లస్టర్ కాంప్లెక్స్ ప్రధానోపాధ్యాయులు సైరాబాను, నిర్మల, రిసోర్స్ పర్సన్స్ మహబూబ్ సుభహాన్, కృష్ణ కిషోర్ రెడ్డి, అబ్బవరం హరిబాబు, అమానుల్లా, సెకండరీ గ్రేడ్ టీచర్స్, గణిత, సాంఘిక శాస్త్రం ఉపాధ్యాయులు పాల్గొన్నారు.
