రాయలసీమ న్యూస్, అన్నమయ్య: అన్నమయ్య జిల్లా లక్కిరెడ్డిపల్లి మండలంలో ఎర్రచందనం అక్రమ రవాణా మళ్లీ వెలుగులోకి వచ్చింది. ఎర్రచందనం దుంగలను కర్ణాటక రాష్ట్రానికి తరలిస్తున్న ఐదుగురు స్మగ్లర్లను పోలీసులు అదుపులోకి తీసుకున్నారు. ఈ ఘటనపై రాయచోటి డీఎస్పీ కృష్ణమోహన్ వివరాలు వెల్లడించారు.
లక్కిరెడ్డిపల్లి మండలం బి.ఎర్రగుడి గ్రామం సమీపంలో పోలీసులు తనిఖీలు నిర్వహిస్తున్న సమయంలో ఎర్రచందనం దుంగలను తరలిస్తున్న షిఫ్టు కారు కనిపించడంతో ఆపి తనిఖీ చేసినట్లు డీఎస్పీ తెలిపారు. కారులో అక్రమంగా ఎర్రచందనం దుంగలను రవాణా చేస్తున్నట్లు గుర్తించిన పోలీసులు అక్కడికక్కడే నిందితులను అదుపులోకి తీసుకున్నారని ఆయన పేర్కొన్నారు.
నిందితుల వద్ద నుంచి సుమారు రూ.10 లక్షల విలువైన ఆరు ఎర్రచందనం దుంగలను స్వాధీనం చేసుకున్నట్లు డీఎస్పీ తెలిపారు. అలాగే రవాణాకు ఉపయోగించిన ఒక షిఫ్టు కారును కూడా పోలీసులు జప్తు చేసినట్లు ఆయన చెప్పారు.
అరెస్టు చేసిన నిందితుల వివరాలను వెల్లడించిన డీఎస్పీ, చిత్తూరు జిల్లా పెనమలూరు చెందిన దయ, అన్నమయ్య జిల్లా లక్కిరెడ్డిపల్లి మండలానికి చెందిన రామాంజనేయులు, రాజశేఖర్, లోకేశ్వర, నాగార్జునలను గుర్తించామని తెలిపారు. వీరిపై సంబంధిత చట్టాల కింద కేసు నమోదు చేసినట్లు పేర్కొన్నారు.
ఎర్రచందనం అక్రమ రవాణాపై ప్రత్యేక దృష్టి పెట్టామని, ఇలాంటి కార్యకలాపాలకు పాల్పడే వారిపై ఎలాంటి సడలింపులు లేకుండా కఠిన చర్యలు తీసుకుంటామని రాయచోటి డీఎస్పీ కృష్ణమోహన్ హెచ్చరించారు. అడవి సంపదను దోచుకునే స్మగ్లర్లను గుర్తించి చట్టం ముందు నిలబెట్టేందుకు పోలీసులు చర్యలను మరింత బలోపేతం చేస్తున్నట్లు ఆయన తెలిపారు.
