రాయలసీమ న్యూస్, చిత్తూరు: చిత్తూరు జిల్లా కార్వేటినగరం మండలంలో జరిగిన ఒక కుటుంబ ఘటన స్థానికంగా చర్చనీయాంశంగా మారింది. ఆస్తిపాస్తులు, సంపాద్యాలు ఏవీ లేని తండ్రి మృతదేహానికి తలకొరివి పెట్టేందుకు కన్న కొడుకు ముందుకు రాకపోవడంతో, ఆ బాధ్యతను పెద్ద కుమార్తె స్వయంగా చేపట్టిన విషయం గ్రామంలో విస్తృతంగా చర్చకు దారితీసింది.
కార్వేటినగరంకు చెందిన వెంకటేశ్వర్లు కొంతకాలంగా అనారోగ్యంతో బాధపడుతున్నారు. ఈ అనారోగ్యంతో మంగళవారం ఆయన మృతి చెందారు. సుమారు 15 ఏళ్ల క్రితం ఆయన భార్య శాంతమ్మ మరణించడంతో, అప్పటి నుంచి వెంకటేశ్వర్లు ఒంటరిగానే జీవిస్తూ వచ్చారు. కుటుంబంలో ఇద్దరు కుమార్తెలు, ఒక కుమారుడు ఉన్నారు.
వెంకటేశ్వర్ల కుమారుడు మురళీకృష్ణ బతుకుదెరువు కోసం చెన్నైలో ఉంటున్నాడు. తండ్రి అనారోగ్యంతో ఉన్న సమయంలో పెద్ద కుమార్తె నాగరత్నం ఆయనకు ఆలనాపాలనగా నిలిచింది. ఇప్పటికే నాగరత్నం భర్త మృతి చెందడంతో, తండ్రి బాధ్యతను ఆమెే పూర్తిగా తీసుకుని చూసుకుంటున్నట్లు గ్రామస్తులు తెలిపారు.
వెంకటేశ్వర్లు మృతి చెందిన విషయం తెలిసిన వెంటనే గ్రామస్తులు, బంధువులు చెన్నైలో ఉన్న కుమారుడు మురళీకృష్ణకు సమాచారం అందించారు. అయితే సమాచారం అందుకున్నప్పటికీ ఆయన గ్రామానికి రాలేదు. దీంతో తండ్రి అంత్యక్రియలకు కుమారుడు అందుబాటులో లేకపోయాడు.
ఈ పరిస్థితుల్లో చివరకు పెద్ద కుమార్తె నాగరత్నమే తండ్రి అంత్యక్రియలను నిర్వహించింది. సాధారణంగా కొడుకు చేయాల్సిన తలకొరివి బాధ్యతను ఆమె స్వయంగా చేపట్టి తండ్రి మృతదేహానికి తలకొరివి పెట్టింది. తండ్రి చివరి ప్రయాణంలో కుమారుడి స్థానంలో కుమార్తె ముందుండి అంత్యక్రియలు నిర్వహించడం గ్రామస్థులను కదిలించింది.
కన్న కొడుకు చేయాల్సిన అంతిమ సంస్కారాలను కుమార్తె చేయాల్సి వచ్చిన ఈ ఘటనపై గ్రామంలో తీవ్ర చర్చ జరుగుతోంది. కుటుంబ బాధ్యత, సాంప్రదాయాలు, కాలానుగుణ మార్పులపై పెద్దలు, యువతరం మధ్య వాదోపవాదాలు కొనసాగుతున్నాయి. వెంకటేశ్వర్లకు చివరి వరకు తోడుగా నిలిచిన కుమార్తె నాగరత్నం ధైర్యసాహసాలను కొందరు ప్రశంసిస్తుండగా, కుమారుడు మురళీకృష్ణ హాజరుకాలేదన్న అంశంపై మరికొందరు విమర్శలు వ్యక్తం చేస్తున్నారు.
