రాయలసీమ న్యూస్, చిత్తూరు: చిత్తూరు నగరంలోని ఎస్కేఎం కోళ్ల మేత కేంద్రం వద్ద మంగళవారం కోళ్ల రైతులు ఆందోళనకు దిగారు. నాసిరకం కోళ్ల మేత విక్రయించడంతో తమ కోళ్లు మృత్యువాత పడ్డాయని ఆరోపిస్తూ సుమారు 25 మంది కోళ్ల రైతులు మృతి చెందిన కోళ్లను తీసుకొచ్చి నిరసన తెలిపారు.
చిత్తూరు సీబీ రోడ్డులోని Little Flower పాఠశాల ఎదురుగా ఉన్న ఎస్కేఎం కోళ్ల మేత కేంద్రం వద్ద ఉదయం నుంచి రైతులు గుమికూడారు. తమ కోళ్లకు ఆ కేంద్రంలో విక్రయించిన మేత వాడిన తర్వాత భారీగా మరణాలు సంభవించాయని, దీంతో తీవ్ర ఆర్థిక నష్టం వాటిల్లిందని వారు పేర్కొన్నారు.
తమకు జరిగిన నష్టంపై పలుమార్లు మేత కేంద్రం యాజమాన్యానికి విన్నవించినప్పటికీ ఎలాంటి స్పందన రాలేదని రైతులు ఆరోపించారు. సమస్యను పరిష్కరించి, తమకు న్యాయం చేయాలని వారు డిమాండ్ చేశారు. నాసిరకం మేత విక్రయించిన వ్యవహారంపై అధికారులు సమగ్రంగా విచారణ జరిపి, బాధ్యులపై చర్యలు తీసుకోవాలని కోరారు.
మృతి చెందిన కోళ్లను కేంద్రం ముందు ప్రదర్శిస్తూ రైతులు నిరసన కొనసాగించారు. నాసిరకం మేత కారణంగా కోళ్ల మరణాలు చోటుచేసుకున్నాయా లేదా అన్న విషయంపై అధికారుల ద్వారా సాంకేతికంగా పరిశీలించి నిజానిజాలు వెలికితీయాలని వారు అభ్యర్థించారు. తమకు జరిగిన నష్టానికి తగిన పరిహారం అందించాలని కూడా డిమాండ్ చేశారు.
రైతుల ఆందోళన నేపథ్యంలో ఎస్కేఎం కోళ్ల మేత కేంద్రం యజమాని పై Animal Husbandry DD గారిని కలసి ఫిర్యాదు చేసినట్లు రైతులు తెలిపారు. అధికారుల జోక్యంతో సమస్య పరిష్కారం కావాలని, భవిష్యత్తులో ఇలాంటి ఘటనలు పునరావృతం కాకుండా మేత నాణ్యతపై పర్యవేక్షణను కట్టుదిట్టం చేయాలని వారు కోరుతున్నారు.
రైతుల ఆందోళనతో ఆ ప్రాంతంలో కొంతసేపు ఉద్రిక్తత నెలకొంది. స్థానికంగా ఇతర కోళ్ల రైతులు కూడా సంఘీభావం తెలుపుతూ ఆందోళనకు మద్దతు ఇచ్చారు. అధికారులు ఫిర్యాదు స్వీకరించిన నేపథ్యంలో, రైతుల ఆరోపణలపై విచారణ ప్రారంభించే అవకాశం ఉన్నట్లు సమాచారం.
