రాయలసీమ న్యూస్, నంద్యాల: ఆళ్లగడ్డ నియోజకవర్గానికి చెందిన యువతతో ప్రత్యక్షంగా మమేకం కావడానికి మాజీ మంత్రి భూమా అఖిల ప్రియా రెడ్డి ‘ఆస్క్ అఖిల’ పేరుతో ప్రత్యేక వేదికను ఏర్పాటు చేస్తున్నారు. ఉన్నత విద్య, సాఫ్ట్వేర్, ఐటీ, కార్పొరేట్ రంగాల్లో స్థిరపడి ప్రస్తుతం హైదరాబాద్ నగరంలో నివసిస్తున్న ఆళ్లగడ్డ యువతీ యువకులను లక్ష్యంగా చేసుకుని ఈ కార్యక్రమాన్ని నిర్వహించనున్నారు.
ఆగస్టు 23, 2026న హైదరాబాద్లో జరగనున్న ఈ సమావేశంలో ఆళ్లగడ్డ ప్రాంత సమగ్ర అభివృద్ధి, భవిష్యత్ కార్యాచరణపై యువత అభిప్రాయాలను సేకరించేందుకు భూమా అఖిల ప్రియా ముందుకొచ్చారు. గ్రామీణ ప్రాంతాల్లో మౌలిక వసతుల కల్పన, విద్యా వ్యవస్థ ఆధునికీకరణ, స్థానికంగా పరిశ్రమలు, ఉపాధి అవకాశాల సృష్టి వంటి అంశాలపై హైదరాబాద్లో రాణిస్తున్న ఆళ్లగడ్డ యువత అనుభవం, సూచనలు కీలకమని ఆమె భావిస్తున్నారు.
ఉన్నత విద్య, సాఫ్ట్వేర్, ఐటీ మరియు కార్పొరేట్ రంగాల్లో స్థిరపడి హైదరాబాద్ నగరంలో ఉంటున్న నా ఆళ్లగడ్డ యువతీ యువకులారా.. మన ప్రాంత సమగ్ర అభివృద్ధి, భవిష్యత్ కార్యాచరణపై మీ ఆలోచనలను నేరుగా నాతో పంచుకునేందుకు ఆగస్టు 23న హైదరాబాద్లో "ఆస్క్ అఖిల" వేదికను ఏర్పాటు చేస్తున్నాం. గ్రామాల్లో మౌలిక వసతుల కల్పన, విద్యా వ్యవస్థ ఆధునికీకరణ, స్థానికంగా పరిశ్రమలు మరియు ఉపాధి అవకాశాల సృష్టి వంటి కీలక అంశాలపై హైదరాబాద్లో రాణిస్తున్న మన యువత అనుభవం, సలహాలు ఎంతో అవసరం. ఆళ్లగడ్డ రూపురేఖలను మార్చే ఈ బృహత్తర ప్రయాణంలో భాగస్వామ్యమై, మీ విలువైన అభిప్రాయాలను అందించాల్సిందిగా మనస్ఫూర్తిగా ఆహ్వానిస్తున్నాను. రండి.. మన ప్రాంత భవిష్యత్తును కలిసికట్టుగా తీర్చిదిద్దుకుందాం.
ఈ కార్యక్రమం ఆగస్టు 23, 2026 ఆదివారం ఉదయం 11 గంటల నుంచి మధ్యాహ్నం 3 గంటల వరకు జరగనుంది. నానక్రామ్గూడలోని బాబిలోన్ (Babylon) వేదికగా సమావేశాన్ని ఏర్పాటు చేశారు. కార్యక్రమానికి సంబంధించిన వివరాల కోసం 9993339350 నంబర్ను సంప్రదించవచ్చు.
కార్యక్రమంలో పాల్గొనదలచిన యువత ముందస్తుగా నమోదు చేసుకోవాల్సి ఉంటుంది. ఇందుకోసం ప్రత్యేకంగా ఆన్లైన్ ఫారమ్ను అందుబాటులోకి తీసుకువచ్చారు. docs.google.com ద్వారా అందుబాటులో ఉన్న ఈ ఫారమ్లో వివరాలు నమోదు చేసుకుని ‘ఆస్క్ అఖిల’ కార్యక్రమంలో పాల్గొనాలని భూమా అఖిల ప్రియా పిలుపునిచ్చారు.
ఆళ్లగడ్డ భవిష్యత్ రూపకల్పనలో యువత పాత్రను బలోపేతం చేయడమే ఈ వేదిక లక్ష్యమని ఆమె సోషల్ మీడియా ద్వారా స్పష్టం చేశారు. హైదరాబాద్లో స్థిరపడి ఉన్న ఆళ్లగడ్డ యువతను ఒకే వేదికపైకి తీసుకురావడం ద్వారా ప్రాంత అభివృద్ధి దిశలో స్పష్టమైన కార్యాచరణ రూపుదిద్దుకునే అవకాశం ఉందని ఆమె భావిస్తున్నారు.
docs.google.com/forms/d/e/1FAIpQLSdYU51TRcpwQrYN1xzu0k3sjGHjH6lEcykCIz8Uyu1YPyPaHg/viewform?pli=1
