రాయలసీమ న్యూస్, తిరుపతి: చంద్రగిరి:
భార్యపై పెంచుకున్న అనుమానంతో ఓ భర్త కత్తితో విచక్షణారహితంగా దాడి చేసిన ఘోర ఘటన మంగళవారం ఉదయం చంద్రగిరి మండలంలో తీవ్ర కలకలం రేపింది. పోలీసులు మరియు స్థానికులు తెలిపిన వివరాల ప్రకారం.. చంద్రగిరి మండలం కొత్త ఇండ్లు గ్రామానికి చెందిన చంగల్ రాయలు (45) అనే వ్యక్తి గత కొంతకాలంగా తన భార్య మునెమ్మ (38) ప్రవర్తనపై అనుమానం పెంచుకున్నాడు.
పొట్టలో పొడిచి పరారైన భర్త:
ఈ క్రమంలో మంగళవారం ఉదయం ఇద్దరి మధ్య గొడవ జరగడంతో, తీవ్ర ఆగ్రహానికి లోనైన చంగల్ రాయలు ఇంట్లోని కత్తిని తీసుకుని భార్య మునెమ్మ పొట్టలో బలంగా పొడిచాడు. దాడి అనంతరం ఆమె తీవ్ర రక్తస్రావంతో అక్కడే కుప్పకూలిపోగా, నిందితుడు అక్కడి నుంచి పరారయ్యాడు.
ఆసుపత్రికి తరలింపు - పోలీసుల విచారణ:
బాధితురాలి ఆర్తనాదాలు విన్న స్థానికులు తక్షణమే స్పందించి, తీవ్రంగా గాయపడిన మునెమ్మను గమనించారు. వెంటనే వారు 108 అంబులెన్స్కు సమాచారం అందించి, ఆమెను అత్యవసర చికిత్స నిమిత్తం తిరుపతి రుయా ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉన్నట్లు తెలుస్తోంది. ఈ దారుణ సంఘటనపై సమాచారం అందుకున్న చంద్రగిరి పోలీసులు ఘటనా స్థలానికి చేరుకుని క్లూస్ టీంతో ఆధారాలు సేకరించారు. బాధితురాలి బంధువుల ఫిర్యాదు మేరకు కేసు నమోదు చేసి, పరారీలో ఉన్న నిందితుడు చంగల్ రాయలు కోసం గాలింపు చర్యలు చేపట్టారు.
