రాయలసీమ న్యూస్, తిరుపతి: తిరుపతిలో 80వ స్వాతంత్ర్య దినోత్సవ వేడుకల్లో ఆర్థిక శాఖ మంత్రి ఆనం రామనారాయణరెడ్డి అస్వస్థతకు గురయ్యారు. పోలీస్ పరేడ్ గ్రౌండ్లో ఏర్పాటు చేసిన ప్రధాన వేదికపై ప్రసంగిస్తుండగా అకస్మాత్తుగా కుప్పకూలి పక్కకు వాలిపోయినట్లు ప్రత్యక్ష సాక్షులు తెలిపారు.
వేదికపై మంత్రి ఒక్కసారిగా అస్వస్థతకు లోనవడంతో అక్కడే ఉన్న భద్రతా సిబ్బంది వెంటనే అప్రమత్తమయ్యారు. మంత్రిని పట్టుకుని కుర్చీలో కూర్చోబెట్టి ప్రాథమిక చికిత్స అందించారు. అనంతరం వైద్య బృందం మంత్రిని పరీక్షించి రక్తపోటు తగ్గడంతో అస్వస్థతకు గురైన అవకాశం ఉందని ప్రాథమికంగా నిర్ధారించినట్లు సమాచారం.
పరేడ్ గ్రౌండ్లో జరుగుతున్న అధికారిక కార్యక్రమానికి రాష్ట్ర ప్రభుత్వ ఉన్నతాధికారులు, ప్రజాప్రతినిధులు, వివిధ శాఖల అధికారులు, పెద్ద సంఖ్యలో ప్రజలు హాజరయ్యారు. కార్యక్రమం మధ్యలో మంత్రి ఆరోగ్య సమస్య తలెత్తడంతో కొద్దిసేపు వేడుకల్లో అంతరాయం ఏర్పడింది. అనంతరం కార్యక్రమాన్ని అధికారులు కొనసాగించారు.
ఆనం రామనారాయణరెడ్డిని వెంటనే సమీపంలోని వైద్యశాలకు తరలించి మరింత పరీక్షలు నిర్వహించారు. బీపీ డౌన్ కావడంతో అస్వస్థతకు గురైనట్లు వైద్యులు ప్రాథమికంగా నిర్ధారించినట్టు అధికార వర్గాలు వెల్లడించాయి. ప్రస్తుతం మంత్రి ఆరోగ్య పరిస్థితి నిలకడగా ఉందని, ఆందోళన చెందాల్సిన అవసరం లేదని వైద్యులు తెలిపారు.
మంత్రికి చికిత్స అందిస్తున్న వైద్య బృందం ఆయనకు అవసరమైన మందులు ఇచ్చి విశ్రాంతి తీసుకోవాలని సూచించినట్టు తెలిసింది. స్వాతంత్ర్య దినోత్సవ కార్యక్రమం ముగిసిన తర్వాత కూడా మంత్రిపై వైద్యులు పర్యవేక్షణ కొనసాగిస్తున్నారు. ఆనం రామనారాయణరెడ్డి ఆరోగ్య పరిస్థితిపై ప్రభుత్వ వర్గాలు సమయానుకూలంగా సమాచారం అందిస్తున్నాయి.
